“من أول يوم ولادة هتشوفي البيبيي هتحبيه وتحسي بيه علطول” جملة غالبًا أي أم حامل جديد بتسمعها واللي أوقات كتير عادي ممكن ما يحصلش، ندخل أوضة الولادة ونخرج ونشوف البيبي هوب عادي مفيش فيضان المشاعر اللي بنسمع عنه ده! فين التواصل مع الطفل من أول يوم اللي بيقولوا عنه؟ فبنبدأ نتخيل إني أم وحشة أو ليه مش زي باقي الأمهات وقعت في غرام الكائن الصغير ده علطول! بس الحقيقة لا اللي حست بالتواصل والحب مع طفلها دي أحسن أم ولا اللي ما حستش أسوأ أم. لأن ده مشاعر بتكبر معانا وكلنا مختلفين تمامًا في التعامل معاها وعلى أساسها. آه كلنا بنحب ولادنا بالفطرة، دي يمكن مش هنختلف عليها، لكن مش كلنا بنتواصل ونحس بالقرب من البيبي بتاعنا أول ما نشوفه.
عشان كده في مقال النهارده، هاقول لك كام حاجة يساعدوكي على التواصل مع البيبي من أول يوم ولادة، مع احترامي الكامل لاختلافاتنا كأمهات عن بعض ومع التأكيد الكامل إن مفيش “لازم” أو “مفروض” عشان الشيء الـ”لازم” الوحيد هو الحاجة اللي إنتي كأم مستعدة ومرتاحة وإنتي بتعمليها.
نصائح لـ التواصل مع الطفل من أول يوم ولادة
- الرضاعة الطبيعية
- التواصل البصري
- التلامس
- الشيل
- الكلام
-
الرضاعة الطبيعية
فيه أمهات بتحب الرضاعة الطبيعية وأمهات مش بتحبها وبتشوفها مجهدة، لكن في جميع الحالات الرضاعة الطبيعية مش مجرد نغذية للطفل ولكنها رابطة وتواصل وقرب أجسامكم من بعض وسماعه لضربات قلبك وارتباطه بيها من قبل ما يتولد بيخلق التواصل.
-
من أول يوم ولادة ..بصي في عنيه وإنتي بترضعيه
هل معني إن الرضاعة الطبيعيه بس هي اللي هنخلق بيها التواصل؟ أكيد لا، الرضاعة الصناعي كمان نقدر نخلق بينا وبين البيبي الرابطة القوية بس المهم نكون مركزين على التواصل معاه بعنينا في عين بعض ووضعية الرضاعة تسمح لي إني أضمه في حضني كويس ونسيب من إيدينا الموبايل ونبص في وشه ونستمتع بيه قبل ما يكبر.
-
جسمك وجسمه
الدراسات الحديثة بتنصح إن البيبي أول ما يخرج من بطن مامته يتحط مباشرة على جسمها skin to skin لأنها من أكتر الحاجات المفيدة للطفل وللأم واللي كمان بتساعد على تهدئة الطفل وسهولة الرضاعة الطبيعي بعد كده.
-
هيتعود على الشيل
الجملة ده بالنسبة لي من الخرافات اللي بتتقال لينا كأمهات، ما يتعود علي الشيل عادي هو مولود عشان يقعد علي جنب لوحده! تواصلك مع البيبي وتلبيتك لاحتياجاته مهم جدًا ليكي وليه بالذات أول شهور حتي لو الاحتياج ده مش باين هو ممكن يكون محتاج بس يتطمن جوا حضنك ويسمع ضربات قلبك اللي متعود عليها.
-
اتكلمي معاه:
بعد الولادة غالبًا كلنا بنحس بالوحدة والتعب وإن محدش حاسس بينا بالذات في ليالي السهر الطويلة اللي بنبقي فيها لوحدنا احنا والبيبي. عوّدي نفسك في الأوقات ده ترغي وتفضفضي مع البيبي بتاعك. اعتبريه صاحبك أو صاحبتك الجداد اللي بيسمعوكي باهتمام.
وماتنسيش في وسط كل ده تاخدي وقتك لنفسك وتطلبي الدعم والمساعدة من اللي حواليكي بصورة واضحة عشن كل ما بقيتي أحسن كل ده ما هينعكس على البيبي وعلى تواصلك معاه أحسن.
التعليق باستخدام حساب فيس بوك