اتكلمنا في مقال قبل كدا عن التربية الجنسية وأهميتها وضرورة فتح حوار حقيقي مع ولادنا من سن صغير. في المقال ده، هنكلمك عن التربية الجنسية للسن الأصعب “سن المراهقة” زي ما بيقولوا كدا “ليفيل الوحش” في تربية ولادنا.
المراهقة بتبدأ من 11-12 سنة لـ 18- 19. الوقت اللي بيحس الطفل فيه إنه بقى مستقل وله رأي خاص وحياة خاصة وبيبدأ ينفتح أكتر على العالم ويتمتع بحرية أكبر. فعشان تبقي متطمنة عليه من أهم الحاجات اللي تقدري تقدميها له إنك تبقي موصلة له المعلومات الصح الحقيقية عن الجنس واللي تكون طبعًا تدريجية مناسبة لسنه.
سن 11- 12 سنة:
- لو ما كنتيش شرحتي له قبل كده عن فرق جسم الراجل والست، فدا الوقت اللي ما ينفعش تتأخري عنه في الشرح. اشرحي له أعضاء جسم الولد والبنت والفرق ووظايفهم.
- كلميه عن العادة السرية، واشرحي له إيه هو السائل المنوي والتبويض واستخدمي رسومات واضحة وسهلة وعلمية مناسبة له.
- كلميهم عن النضج الجنسي والبلوغ وعلاماته عند الولد والبنت.
- اتكلمي معاهم عن استخدام الإنترنت وعن المشاهد اللي ممكن تظهر بالغلط قدامهم وعن خطورتها.
- أكدّي لهم إنك دايمًا موجودة ومستعدة لإجابة أي سؤال ييجي في بالهم.
من سن 13 – 18 سنة:
- سن الهرمونات! بيحصل في جسمهم تغيير هرموني كبير ويبدأ الطفل يدوّر على هويته وغالبًا بيكون بيسمع لأصحابه أكتر.
- هتلاقي طفلك بيتكلم معاكي عن عالم الجنس الكامل الخاص بالكبار من مصادره اللي غالبًا بتكون أصحابه في المدرسة، هتحتاجي تأكدي على كل المعلومات اللي بنيتيها معاهم من سنين ولو ما كنتيش بدأتي فما تتأخريش.
- ابدأي ثقفيهم جنسيًا واشرحي معاهم مفاهيم مهمة زي:
النشوة الجنسية، العادة السرية، الحمل وإنه ممكن يحصل لأي شخص بمجرد البلوغ، وبيحصل إزاي، وإزاي تحافظ على نفسها. - كلميهم عن الأفلام الإباحية وأضرارها وأهمية البعد عنها وعن اللي ممكن بتسببه لصاحبها من قلق وإدمان وتوصل له مفهوم غلط عن الجنس لو أفرط في مشاهدتها.
- في السن ده، ممكن تستخدمي مع ابنك أو بنتك أسلوب الأسئلة عشان تفهمي اللي بيدور في دماغهم.
- محتاجة دايمًا توصلي لولادك إن كونها بنت أو إن كونه ولد، ده حاجة لازم تفتخر/يفتخر بها.
- دور التلفزيون والميديا الفترة ده مهم جدًا. بدل ما تغيروا القناة لما يجي مشهد فيه طابع جنسي، استغلوا الفرصة وافتحوا حوار مع ولادكم. اسألوهم أسئلة زي “إيه رأيك في الموقف ده؟” أو “حصل لك قبل كدة موقف زي دا؟ أو مع أصحابك؟”
الأسلوب ده بيساعدك تفهمي أولادك أكتر و ردود أفعالهم ووعيهم ومفهومهم عن الجنس.
- كلميهم عن مفاهيم الجنس الصح والمقبولة دينيًا واجتماعيًا.
- أكدّوا دايمًا على ولادكم إن الجنس فطرة ربنا خلقها ومن حقنا نستخدمها بس في الوقت المناسب وبالطريقة المناسبة.
- خليكي واضحة وحقيقية وجاوبي على أسئلتهم اللي مستعدة لإجابتها واللي ما تعرفيش إجابته، اطلبي منهم إنك تسألي وتردي عليهم.
وفي الآخر، نحب نأكد على دور الأب في التثقيف الجنسي للولد في سن المراهقة لأن كلام الأب بالذات لما بيكون صديق لابنه بيكون مقنع أكتر ومريح للولد. مع التأكيد عليهم إن المناقشة والتثقيف الجنسي هدفهم إنهم يقدروا يحافظوا على نفسهم وإن ما حدش يوصل لهم معلومات غلط من أصحابهم أو الحياة العامة.
مصادر ساعدتنا في كتابة المقال:
كتاب معين الأباء في التربية الجنسية للأبناء، د.مأمون مبيض.
https://www.aboutkidshealth.ca/Article?contentid=716&language=English
https://www.aboutkidshealth.ca/Article?contentid=718&language=English
https://www.todaysparent.com/family/parenting/age-by-age-guide-to-talking-to-kids-about-sex/
