محتويات المقال
فيتامين د من الفيتامينات اللي ظهر اسمها بقوة في السنين الأخيرة، والكلام عن مدى أهميته وفايدته وحتى عن مدى نقص كميته في جسم الست المصرية. أغلب اللي راحوا حللوا نسبته في الجسم، طلع عندهم منخفض، وطلع نقصه ده سبب أعراض لأمراض أو آلام جسدية بيعانوا منها. وعلى الرغم من إن بلادنا دافية ومشمسة أغلب أيام السنة، إلا إننا بنعاني من قلة التعرض للشمس اللي هي المصدر الرئيسي للفيتامين ده في جسمنا.
بل إن مننا اللي بيتهرب من التعرض للشمس وبيحرصوا على وضع مستحضرات تحميهم منها. مع إن زمان أيام جداتنا، كان أساسي عندهم القعدة في البلكونة أو جنينة أو حتى الريف وتعريض جسمهم للشمس. علشان كده، كان نادر زمان نسمع عندهم أعراض زي اللي عندنا دلوقتي. بس خلينا نسأل شوية أسئلة عن فيتامين د اللي من خلالها هنفهمه ونتعلم ازاي – وعن طريق الشمس مش الأدوية ولا الحقن – هنقدر نحصل على احتياجنا الطبيعي منه.
ازاي جسمك بيحصل على فيتامين د من الشمس؟
اللي بيحصل إن بمجرد تعرض جسم الإنسان للشمس، الجزء المكشوف من جسمه بيبتدي يمتص الآشعة فوق البنفسجية UVB اللي بمجرد امتصاص الجسم ليها، بيبدأ يتكون فيتامين د عن طريق تكسير كوليسترول معين في البشرة، ويبدأ الجسم بستفيد من الفيتامين المنتج ده ويمتصه وينقلها مباشرة للعظام والأعصاب.
هل كلنا بنحتاج نفس فترة التعرض للشمس للحصول على فيتامين د؟
الحقيقة الموضوع بيحكمه لون البشرة: كل ما كانت البشرة فاتحة، فتحتاج بس لفترة من 10 دقايق لـ 15 دقيقة بالكتير. بينما كل ما لو البشرة أصبح غامق، بيحتاج من 40 دقيقة لحد ساعتين. والسبب في كده إن التصبغات في الجلد كل ما كان أغمق، فهي بتشكل درع طبيعي ضد امتصاص الآشعة فوق البنفسجية اللي بيها بس بيتكون الفيتامين ده. علشان كده، أصحاب البشرة الفاتحة بيحتاجوا وقت أقل. ولو زاد عن المفروض، بيعرضهم لخطر حروق الجلد. علشان كده، من الضروري إن الوقت لا يزيد عن 15 دقيقة يستخدموا واقي من الشمس للحفاظ على بشرتهم.
طيب إيه فايدة فيتامين د المباشرة في جسمنا؟
وجد الأطباء إن الفيتامين ده له تأثير مباشر على توجيه الأمعاء لامتصاص الكالسيوم والفسفور من الأكل وإرساله للعظام. ده غير إن تم الربط بين نقصه في الجسم وما بين ظهور أمراض زي هشاشة العظام، أنواع من السرطانات، الإحساس بالكأبة، ضعف العضلات. وفي أوقات ممكن تصل للموت.
هل في أنواع من الأكل الغني بفيتامين د؟
الحقيقي إن كم الأكل اللي بيتوفر فيه قليل قوي. والموضوع قد يتطلب منك إنك تتناوليها يوميًا علشان تحصلي على احتياجك من الفيتامين ده: زي أنواع من الأسماك الزيتية زي السلمون والتونة، الكبد البقري، صفار البيض، والسردين. ولو كان مكان إقامتك ضعيف من حيث تعرضه للشمس، فمن الضروري تناول مكملات غذائية زي زيت كبد الحوت اللي بيكون غني بفيتامين د.
إيه أفضل وقت للتعرض للشمس؟
لازم أولًا تعرفي إن لو انتي بتفتحي الشبابيك وبتدخّلي نور الشمس من غير فتح الإزاز، فانتي مش هتحصلي على النتيجة المرغوبة. ده لأن الإشعة فوق البنفسجية مش بتخترق إزاز الشبابيك. في بلادنا العربية، الشمس متوفرة أغلب أيام السنة، غير اللي بيعيش في البلاد الأوروبية. وبالتالي، احنا هنا عندنا أفضل وقت للتعرض للشمس يا في الصبح بدري قبل ما تعلى درجة الحرارة، أو في فترة العصرية. الفكرة إننا عايزين نتعرض لضوء الشمس مش حرارة الشمس. على عكس مثلًا في أوروبا أفضل وقت بيكون فترة الظهيرة لإن الشمس بتكون في أفضل درجات حرارة ليها على عكسنا بتكون حرارة عالية جدًا وخطر على جلدنا.
هل تعرض وشي وإيدي بس كفاية للحصول عليه؟
الحقيقة لأ. لإن دي مساحة صغيرة جدًا من جسمك وقدرتها على الإنتاج هتبقى أقل من احتياجك. الأطباء بيقولوا إنك محتاجة تعرضي مش أقل من 30% من جسمك للشمس، ولفترة بتتراوح من 10 دقايق لـ 30 دقيقة ثلاث مرات في الأسبوع وبشكل منتظم علشان تحصلي على احتياجك.
هل استخدام واقي الشمس يأثر على إنتاج فيتامين د في الجسم؟
مبدأيًا كل حاجة بالعقل مفيدة وأي زيادة أو نقصان ليها تأثير سلبي أكيد. بمعنى إن الإكثار من التعرض للشمس أكيد له تأثير سلبي وخطير على الصحة، زي أمراض شيخوخة للجلد، تصبغات غير مرغوبة، ضرر لشبكية العين، الإصابة بأنواع من السرطانات، وغيرها. علشان كده، كان المعدل المنطقي والطبيعي للتعرض للشمس من 10 لـ 30 دقيقة مع ارتداء قبعة ونظارة شمس. وبعد مرور الوقت ده، استخدام كريم حماية للجلد وتكرار استخدامه كل 2 لـ 3 ساعات طالما لسه قاعدة في الهواء الطلق.
دي أغلب الأسئلة اللي قدرنا نجمعها واللي بتشرح أهمية فيتامين د. في الآخر ما تحرميش نفسك ولا أولادك من الشمس لإنها نعمة كبيرنا في بلدنا. اختاري الوقت المناسب والمكان المناسب للحصول على جرعتك اللي محتاجة لها. انتظمي عليها وحافظي على صحتك طالما فيه إمكانية للحصول عليه بشكل طبيعي، هيكون أفضل مليون مرة من التدخل الدوائي.
التعليق باستخدام حساب فيس بوك