في تعريف موقع Psychology Today للإدمان، قالوا إن الإدمان هو الانخراط في سلوكيات آثارها بتحفز تكرارها، بالرغم من مضارها، وإن فيه دلائل علمية على إن السلوكيات الإدمانية كلها بتشترك في نقطة وهي تحفيز مناطق المكافأة والثواب في المخ ودي بدورها بتفرز مادة الدوبامين، ومادة الدوبامين دي هي اللي بتخلي الشخص يعمل السلوك ده تاني عشان تندفع دفعة دوبامين تانية وبالتالي بيكون فيه إدمان للسلوك ده.
السلوكيات الإدمانية بتزيد الحاجة لها أو بمعنى أصح بتزيد احتمالية حدوث إدمان لسلوك معين في أوقات معينة وفي ظروف معينة. يعني مثلًا المصابين بأمراض الاكتئاب والقلق المرضي سهل إنهم يكونوا فريسة لإدمان السلوكيات عن الأصحاء، وفي فترات زي فترة الحظر اللي احنا فيها دي بتزيد احتمالية حدوث إدمان، من الإحساس بالقلق من الشأن العام وكمان من الإحساس بالفراغ وباحتمال فقدان شخص عزيز وهي بتهاجم أفكارنا.
للأسف من بداية الحظر وكتير مننا انخرط في سلوكيات إدمانية أبسطها وأوضحها هي الأكل. بقينا بناكل مش عشان احنا جعانين، بس عشان فيه إحساس بالقلق وبالذعر لازم نسكته بأي شكل. كتير مننا كمان اتجه ناحية حاجات تانية زي إنهم يدخنوا، أو يتفرجوا على مسلسل بحاله في يوم واليوم اللي بعده يشوفوا مسلسل تاني، أو يلعبوا ألعاب موبايل أو فيديو لساعات طويلة، أو يفضلوا ماسكين موبايلاتهم طول اليوم ولو حد أخدها ينزعجوا جدًا، وما يسيبوهاش حتى في السرير وقت النوم.
إزاي أعرف إني أدمنت السلوك؟
أعراض السلوكيات الإدمانية
د. شاهرام حشمت، أستاذ متفرغ في اقتصاديات الصحة الإدمانية في جامعة إلينويز كتب أنماط السلوكيات الإدمانية.
- السلوك ده محتل جزء كبير جدًا من وقتك.
- عندك ميل إنك تقلليه أو حاولتي بالفعل تقلليه وما نجحتيش.
- فيه رغبة شديدة إنك تعملي السلوك ده.
- الانخراط في السلوك ده بيعيقك عن القيام بواجباتك سواء في البيت أو الشغل.
- حتى مع وجود انتقاد من المحيط اللي حواليكي للسلوك ده، انتي مكملة فيه.
- لو فيه حاجة صحية تتطلب وقوف السلوك ده وانتي مكملة.
- لو فيه أعراض انسحاب بعد ما وقفتي السلوك، زي التوتر والرغبة في الرجوع له والمزاج السيء جدًا.
علاج السلوكيات الإدمانية
- علاج نفسي: ممكن تستشيري طبيب نفسي لفترة الإقلاع والتعافي.
- استبدلي العادات غير الصحية بعادات تانية صحية.
- املي جدولك: اكتبي كل يوم جدولك اليومي وما تسيبيش وقت فاضي ممكن يجرك تاني للعادة.
- اطلبي مساعدة محيطك: سواء جوزك أو والدتك أو أخت/أخ/صديقة/صديق، اطلبي بشكل واضح المساعدة بعد شرح الموقف وهم ممكن يساعدوكي في تخطي الأزمة دي.
نتمنى لك صحة نفسية عال وربنا يعدي الحظر على خير.
التعليق باستخدام حساب فيس بوك