محتويات المقال
“باي باي كاش، اللي جاي إلكتروني”. دي مش مجرد جملة في إعلان ترويجي، دي حقيقة مستقبل التعاملات المالية في مصر والعالم. التعاملات بالكاش بتقل كل يوم عن اللي بعده، واللي هيحصل في المستقبل القريب إن كل التعاملات المالية تقريبًا هتكون من خلال كروت الائتمان والكروت مسبقة الدفع. لكن زي ما دي أخبار كويسة، لها برضو جانبها الوحش. علشان مع زيادة التعاملات الإلكترونية بتزيد مخاطر الاحتيال والنصب في الشراء أون لاين أو زي ما بيسمى بـ التسوق عبر الأنترنت . علشان كده، عاوزين نقول لك شوية حاجات لازم تاخدي بالك منها وانتي بتشتري أون لاين.
التسوق عبر الإنترنت: إزاي تتسوقي أون لاين زي المحترفين؟
أهم نصائح الشراء أون لاين بدون احتيال ونصب
عند الشراء أون لاين ادفعي بكروت مسبقة الدفع، مش بالكروت الأساسية
المعلومة الأولى من مقال مهم جدَا من موقع سنغافوري مهتم بحماية بيانات الناس أونلاين بينصحوا في المقال بضرورة استعمال البطاقات مسبقة الدفع لما تيجي تعملي مشترياتك. والبطاقات مسبقة الدفع دي ممكن تحصلي عليها من البنك. وبتحطي فيها المبلغ اللي هتعملي بيه المعاملة المالية أو أزيد بحاجه بسيطة. بحيث لو اتسرقت بيانات البطاقة، اللي سرقها مش هيلاقي فيها رصيد كبير.
تابعي حسابك البنكي أول بأول
ومن موقع staysafeonline.org، قرينا مقال فيه نصيحة تانية مهمة، وهي ضرورة متابعة الحساب البنكي أول بأول، علشان تتأكدي إن المعاملات اللي بتتم على الحساب انتي فعلًا اللي بتعمليها، وإن مفيش أي شخص أو جهة تانيه بتستغل الحساب أو بتسحب منه فلوس.
والنهارده، ومع التطور الكبير، ممكن تطلبي من البنك اللي بتتعاملي معاه يعمل لك حساب إلكتروني Online Bank تقدري تتابعي منه كل العمليات اللي بتتم على حسابك أونلاين من غير ما تستني كشوف الحساب الشهرية، أو تضطري تروحي للبنك علشان تسألي على عملية معينة.
حدثي تطبيقاتك، اختاري مواقعك
ومن المقالة المنشوره على موقع safewise.com، فيه نصيحة مهمة وهي ضرورة اختيار المواقع اللي بتتسوقي منها. يعني بلاش تكتبي بيانات الكريدك كارد بتاعك على موقع لسه جديد أو مش موثوق، أو أي أبليكيشن لسه ما أثبتش جديته على الموبايل.
كمان مهم جدًا لو بتشتري من خلال موبايل أبلكيشن، تتأكدي إن الموبايل بتاعك واخد آخر تحديث له. والتطبيق اللي بتشتري منه واخد آخر تحديث له لضمان إن مفيش ثغرات ممكن تخلي حد يعرف بيانات بطاقتك.
وبكده، نكون شاركنا معاكم بعض النصايح المهمة علشان تحموا نفسكم من النصب والاحتيال أثناء التسوق الإلكتروني. تابعونا علشان هنتكلم أكتر على بطاقات الدفع الإلكتروني وأنواعها وأسهل طرق الحصول على بطاقات بنكية في مصر في الموضوعات القادمة.
التعليق باستخدام حساب فيس بوك