قبل ما الواحد يقرر يعمل أي حاجة في حياته، أول حاجة لازم يرتبها هي ميزانية الحاجة دي، وده من أصغر حاجة لأكبر حاجة، وخصوصًا بقى لو الحاجة دي مش بتتكرر كتير في العمر، وهيكون فيها ناس غيري وفيها ترتيبات وتفاصيل كتير، زي حفلة الخطوبة، في ناس بتعملها برا البيت، وفي الحالة دي بيروحوا للمكان اللي بيقرروا يعملوها فيه ويقولهم على المبلغ النهائي المطلوب بناءًا على طلباتهم في الحفلة، لكن لو هتعملي حفلة الخطوبة في البيت، فدي أكيد هتكون مسؤوليتك من الألف للياء، وعلشان تطلع بالصورة اللي نفسك فيها، لازم أول حاجة تحددي ميزانيتها، علشان ما تصرفيش كل اللي معاكي على بند معين، وتيجي على بقية البنود ما تلاقيش معاكي فلوس كفاية، علشان كده هنقولك ازاي تعملي ميزانية الخطوبة في البيت بالتفصيل:
في خطوط عريضة لازم تحدديها الأول قبل الدخول في التفاصيل، زي:
- أقصى مبلغ تقدري تدفعيه لحفلة الخطوبة.
- هل العريس هيشارك في أي حاجة، ولا الحفلة كلها على العروسة.
- فستان العروسة والميك اب بتاعها، داخل ضمن تكاليف الحفلة ولا لا.
- عدد المعازيم، ودايمًا اعملي حساب تزودي شوية عن العدد المحدد علشان ممكن تحصل أي مفاجآت.
ودي كل تفاصيل حفلة الخطوبة في البيت:
-
التنظيم
في خيارين لتنظيم حفلة الخطوبة في البيت، ممكن لو العروسة لها اخوات بنات أو قرايب وصديقات، يتولوا هما تنظيم الحفلة من أغاني وتزبيط للإضاءة، وتزيين المكان والبيت بديكور مناسب، أو لو معاكي مبلغ كافي تقدري تجيبي ايفنت أو ويدنج بلانر تعملك كل حاجة، س تتفقي معاها قبل بداية الشغل على رينج السعر المناسب ليكي، علشان مش بعد ما تخلص تكتشفي إن المبلغ كبير عليكي، التنظيم ده بيدخل تحته شكل الكوشة ومكانها، وهل محتاجين فراشة في البيت، ولا هنستخدم عفش البيت عادي كأماكن للمعازيم.
حفلة الخطوبة في البيت
-
البوفيه
من حسن الحظ إن دلوقتي في خيارات كتير لبوفيه الخطوبة، فتقدري تعمليه أوبن وفيه، أو أطباق أو علب شيك، والأكل نفسه تقدري تجيبيه من مطاعم متخصصة في عمل أكل الحفلات، أو من السيدات اللي بيعملوا أكل بيتي، بس لازم تكوني جربتي واحدة فيهم قبل كده، وعارفه إنها هتكون قد مستوى عمل أكل حفلة خطوبة.
واختيار نوعية الأكل بتعتمد على حاجات كتير، ذوق أهل العريس والمعازيم، إمكانياتك المادية، مدى اتساع المكان، فمثلا لو ما عندكيش مكان تحطي فيه أوبن بوفيه عليه ديك رومي ولحوم وأصناف على النسق ده، يبقى تختاري تقديم الأكل في الأطباق، وتحطي فيها حاجات مناسبة زي اللحوم الباردة، أو الكباب الكفتة، وتجنبي السلطات السايلة، وهكذا.
حفلة الخطوبة في البيت
-
أدوات السفرة
هي كمان هتفرق في الميزانية، فلو هتستخدمي الأطقم الصيني بتاعتك وأطقم المعالق، غير لما تحتاجي تشتري أطباق بلاستيك أو علب لاستخدام المرة الواحدة.
بس خدي بالك لو هتشتري أطباق بلاستيك، ما تسترخصيش علشان ما تعملش فيكي مواقف سيئة مع المعازيم، زي إن الأطباق تتكسر أو تتشرخ وتوقع الأكل على الناس.
-
التورتة
اختيار التورتة هيفرق لو انتي هتقدمي جاتوه ضمن منيو الأكل، ولا هتعتمدي على تورتة العروسة كصنف حلو، ولو مش هتعتمدي عليها، يبقى الأفضل إنك تجيبي تورتة مقاسها معقول، ناعمة وبسيطة للخطوبة، وخلي التورتة الأدوار المبالغ فيها للزفاف.
ولو هتخليها هي صنف الحلو، اختاري توترة متقسمة لأكتر من طعم علشان تناسب كل الأذواق.
-
الفوتوجرافر
لو هتعملي فوتوسيشن للخطوبة، احجزي من بدري مع فوتوجرافر، علشان تقدري تختاري حد سعره مناسب ليكي، لإنك لو اختارتي والوقت ضيق، هتضطري تقبلي بأي سعر يتطلب منك، وده ممكن يؤثر سلبيًا على ميزانيتك.
-
تزبيط البيت قبل وبعد الخطوبة
عمل خطوبة في اليت مش حاجة سهلة خالص، ومحتاجة كل سنتيمتر في البيت يكون نضيف ومتزبط وفي أحسن حالاته، ده غير إن أي حاجة انتي خايفة عليها من الكسر أو الضياع لازم تغلفيها وتشيليها في مكان آمن، وأي سجاد خايفة عليه من البهدلة برضه هتلفيه وتشيليه، وبعد الخطوبة محتاجة ترجعي كل حاجة مكانها، بعد ما تنضفي اليت تمامًا من كل آثار الخطوبة، فأكيد مجهود زي ده هيحتاج منك الاستعانة بناس تساعدك، وده حاليًا بقى مكلف ماديًا، علشان كده محتاجة تحطيه في حسابك وانتي بتعملي ميزانية حفلة الخطوبة في البيت.
بالفيديو: أكثر من 20 نصيحة للتنظيف هتوفر لك فلوس كتير
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك