محتويات المقال
طبعا لما شوفتوا عنوان المقال، اتحمستوا وفتحتوه عشان باقول لك اتخانقوا عادي وماله! وآه هو وماله فعلًا. الطبيعي ما بين أي اتنين متجوزين إننا نبقي مختلفين أوقات كتير وبنتناقش وتحصل بيننا الخلافات الزوجية عادي، بس الطبيعي برضه والمطلوب إننا لما يبقى عندنا ولاد إننا بنبدأ ناخد بالنا أكتر من كلامنا وتصرفاتنا قدامهم مع الناس ومع بعض في البيت. لإن العلاقة ما بيننا بالنسبة لولادنا بيتبني عليها حاجات كتير قوي وخناقنا قصاد ولادنا برده بيبني في دماغهم بديهيات عن الحياة ممكن جدًا تكون غلط.
بس هل طبيعي أصلًا إننا نقدر نتحكم وما نتخانقش قصادهم؟ طيب هل مطلوب مننا نمثل يعني طول الوقت عشان نثبت لولادنا إننا بنحب ونحترم بعض، ونحافظ على سلامهم النفسي؟ الإجابة لا طبعًا! لإن ده مش منطقي ومش مطلوب أصلًا لإن الاختلاف بين البشر سنة الحياة، ولازم الطفل يشوف ده وهو بيكبر ويعرف إنه طبيعي ومش نهاية العالم. لأن ده صحي ليه إنه يعرف شكل العلاقات الطبيعي مش الوردي، ويشوفنا بنختلف ونزعل ونتصالح تاني عادي. بس المهم في كل ده، واللي ما ينفعش يتكسر في الخلاف هو “الاحترام” وإن الخلاف يكون من غير تطاول.
فاحنا مش مطلوب أبدًا مننا كأهل نخبي وننكر اختلافنا قصاد الولاد، بس المطلوب إننا نركز في الحاجات اللي ممكن تشوه صورة نموذج الأب أو الأم قصادهم، أو تحسسهم بعدم الأمان. في المقال ده، هاقول لك أكتر أربع حاجات ماينفعش نعملها واحنا بنتخانق قصاد ولادنا.
لو ابنك عنده مشكلة الكدب عند الأطفال اعرفي من هنا الأسباب والعلاج
ممنوعات الخلافات الزوجية قدام الأطفال
-
ما نتخانقش على اللي يخص الولاد قصادهم
لما الأطفال بتشوفنا بنتخانق على مصاريفهم أو على تصرفاتهم مثلًا، بيحسوا بتأنيب الضمير والمسؤولية ناحيتنا، وده بيأثر جدًا على إحساسهم بالأمان والانتماء.
-
مانتكلمش وحش على بعض قصاد ولادنا:
لأن ده بيهز علطول صورة نموذج الراجل والست عند الطفل. وأوقات كمان بتحسسه بالذنب لما بيحس بحب ناحية طرف فينا لو هو متعاطف أو متأثر بكلام الطرف التاني.
-
ما تكسروش كلام بعض مع الولاد عشان اتخانقتوا:
أوقات حد من الطرفين بيقرر كطريقة للانتقام من التاني إنه يوافق على حاجة كانت ممنوعة للطفل مثلًا. وده بيوصّل للطفل عكس الصورة اللي محتاج يشوفها وهي إن الأب والأم فعلًا إيد واحدة وقرار واحد. فبالتالي إحساسه بالأمان بيتأثر بالسلب، وكمان أوقات بيستغل ده كطريقة غير صحية يوصل بيها للي عايزه.
-
ما تسيبوش الموضوع من غير ما يتحل قصاد الولاد:
زي ما اتخانقنا أو اختلفنا قصاد ولادنا، محتاجين كمان إننا نتصالح ويشوفونا حلينا الموضوع وعبرنا عن مشاعرنا بطريقة أهدى وأوضح قصادهم. فيه دراسات بتقول إن الأطفال اللي بيشوفوا خناقات أهلهم من غير ما تتحل أو تخلص بيكون عندهم معدلات القلق والاكتئاب والخوف الاجتماعي أعلى بكتير.
وأخيرًا ما تنسوش تتكلموا مع الولاد عن اللي حصل قدامهم، واسألوهم عن مشاعرهم وقتها، وطمنوهم إن خناقكم أو اختلافكم سوا مش هيأثر على حبكم لبعض (لو فعلا اختلاف طبيعي ومش مأثر) أو حبكم ليهم. ولو غلطتوا، اعترفوا إن ما ينفعش كنت “أرزع الباب” مثلًا أو “أقول كذا”، عشان ولادنا يكبروا وهم شايفين صورة صحية للعلاقات ولحل المشاكل من غير هروب أو خوف منها.
المصادر:
التعليق باستخدام حساب فيس بوك