خيانة الزوج لمراته من أبشع الحاجات اللي ممكن تمر بيه أي ست، واحدة ست كانت بتحكي إنها بتبص على الساعة الذكية بتاعة جوزها اللي بتشوف مجهوده العضلي وحرقه ولقت إن أعلى نسبة حرق عنده كل يوم الساعة 2 الفجر.. تفتكروا كان بيسيبها نايمة ويروح يلعب تمارين كارديو مثلًا؟ دي كانت طريقة من الطرق اللي الستات حكوا إنهم قفشوا خيانة أزواجهم بيها. هنا هاقول لكم على علامات واضحة تدل على الخيانة الزوجية وكمان ستات بتحكي قصص حقيقية عن ازاي تكتشفي خيانة جوزك .. وربنا يقدرنا على فعل الخير 🙂
علامات خيانة الزوج
- التواصل اتغير.
- علامات الخيانة الزوجية التي تظهر على الجسد.
- التحوير الكتير.
- برود جوزك في التعامل.
- تغيرات في الحياة الجنسية بينكم.
- خيانة الزوج عبر الهاتف.
هنا بقى 7 علامات مؤكدة بتقول أن جوزك في حياته واحدة تانية
-
التواصل اتغير
- لو انتم من عصافير الغرام اللي دايمًا بتقولوا بحبك وبعشقك ويا روح قلبي، هتلاقي دول اختفوا أو قلّوا قوي.
- هتلاقي المشاكل زادت، وهتلاقي الاتهامات في المشاكل بتزيد، انتي ما بقيتيش تعملي كذا، انتي بقيتي مهتمة بكذا، وحاجات عمركم ما كنتم بتتكلموا فيها.
- هتلاقيه بيغير الموضوع لما تكلميه عن تغيرات معينة في وقته أو لبسه أو حتى طريقة كلامه.
-
علامات الخيانة الزوجية التي تظهر على الجسد
- فيه العلامات الواضحة اللي معظم الوقت مش هتقفشيها (لإنه أكيد هياخد باله ويداريها) زي اللاف بايت love bite اللي هي العضة اللي على الرقبة أو الروج وخصلة الشعر والجو الخمسيناتي ده.
- فيه تغيرات في المظهر زي ستايل لبس جديد، أو اهتمام بالمظهر هو مش متعود عليه سواء ابتدا فجأة يعمل دايت عشان الكرش فجأة ما بقاش عاجبه أو في لبسه. فاكرين سعيد صالح وهو بيقول لمامته في العيال كبرت “ما جيبتيهاش حمرا لييييه يا زينب؟” هو ده التغيير اللي هتفاجئي بيه في ذوق جوزك.
- غير دول، فيه علامات بتظهر على الجسم زي علامات القلق مثلًا لما تكوني موجودة معاه لوحدكم، هتلاقي عينيه دايمًا مش في عينيكي وانتو بتتكلموا، هتلاقي ملامحه بتتغير لما بيحكي حاجة.
-
تحوير جوزك الكتير
” امبارح كنت فين يا حبيبي؟ في الجيم! جميل”
وانتم على السفرة بتاكلوا، تفتحي معاه الكلام وتقولي له وانت بقى في الجيم امبارح، أنا كنت … فتلاقيه لمدة كام ثانية كده مش مستوعب انتي أصلًا بتتكلمي عن إيه! وتلاقيه بيلحق نفسه وهو بيقول لك إنه ما راحش الجيم امبارح أصلًا.
-
برود جوزك في التعامل
- تبقي قاعدة بتحكي 3 ساعات عن يومك في الشغل ومع الولاد ومين عمل إيه النهارده وبتخططي إيه لبكرة، فتلاقيه أصلًا مش معاكي ولو سكتي في نص الكلام أو قمتي خالص، مش هيفرق معاه نهائيًا. لكن عشان ما نظلمهمش، خلينا نأكد إن الموضوع ده مش لازم يكون عند كل الرجالة دليل للخيانة، فيه رجالة طبعهم اللامبالاة دي.
- “قلت يا واد طنش خااااالص”. فاكرة أيام الخطوبة لو جبتي سيرة زميلك في الشغل اللي قال لك صباح الخير، فالدنيا قامت وما قعدتش؟ لو قلتي له إن زميلك ده قال لك “انتي مزة” مش هتفرق معاه دلوقتي. لو ده حصل، يبقى أكيد فيه خيانة.
-
تغيرات في الحياة الجنسية بينكم
- من علامات خيانة جوزك إنه يكون مش مهتم يمارس العلاقة الحميمة معاكي زي الأول، أو بيطلب حاجات عمره ما كان بيطلبها، زي إنكم تطفوا النور وانتم مع بعض، أو إنك تناديه باسم دلع معين.
- فيه حاجات كتير بيتطلب منك تجربتها معاه، وعمركم ما جربتوها قبل كده. أحب أفكرك إن التجديد والتغيير مطلوب دايمًا لكن لما تكون كل الحاجات اللي بيطلبها حاجات انتم مش متعودين عليها (أوضاع جنسية جديدة، لانجيزي جديد أو لبس شخصيات، تجربة لعب جنسية، جنس فموي أو شرجي) يبقى فيه إنذار.
هنا أسباب صمت جوزك أثناء العلاقة الحميمة
-
خيانة جوزك عبر الهاتف
مبدئيًا، دي أكتر طريقة منتشرة، ودي مش بس علامة على خيانة جوزك، دي طريقة كمان. وهنا هاقول لك علامات خيانة الزوج عبر الهاتف:
- ما تعرفيش باسوورد الموبايل أو اللابتوب حتى لو كنتي تعرفيهم قبل كده.
- الولاد مش مسموح لهم يلمسوا تليفون أبوهم في أي وقت من اليوم.
- كل ما التليفون يرن، تلاقي اسم زكريا مثلًا، بس الغريبة إن زكريا يتصل بجوزك الساعة 1 بالليل و4 الصبح و6 بعد العصر ويقعدوا يتكلموا ساعة والمكالمة كلها في البلكونة. زكريا ده عجيب قوي!
- texting لا ينتهي. عينيه اخضرت من كتر ما بيبص على واتساب!
- فاكرة الخناقة بتاعة البنت اللي كل ما يكح على فيسبوك، تعمل له لاف؟ البنت دي فين؟ ما بقيتيش بتشوفيها ليه؟
قصص حقيقية في اكتشاف الخيانة الزوجية
- ليا صديفة عرفت إن جوزها بيلعب بديله لما جابت له في عيد ميلاده ساعة ذكية، وهو طبعًا عمل لها توصيل بتليفونه واكتشفت إنه طول ما هو بره البيت، بيكلم رقم معين بالساعات، ولما دورت على تروكولر، طلع لها اسم البنت وبشوية دعبسة على السوشال ميديا وصلت لها، وبعدين واجهته إنها عارفة إنه بيكلم فلانة الفلاني كل يوم من الوقت الفلاني وهكذا ومن ساعتها وهو مستقيم.
- صديقة تانية بتقول إنها كانت مسافرة مع صاحباتها وبتكلم جوزها في يوم إنها هترجع بدري عشان مش قادرة تكمل، فاتخانق معاها خناقة جامدة جدًا إنها ما ترجعش. ولما رجعت، عرفت من البواب بالصدفة إن “أخت جوزها” زارته أكتر من مرة وهي مسافرة. طبعًا كلنا عارفين مين اللي كانت بتزوره!
- ست بتحكي إن جوزها كان طول الوقت بيتخانق مع شركة الاتصالات اللي خطه تبعها عشان الداتا بتخلص بسرعة جدًا. فبيقولوا له دايمًا إنه ده استهلاكه. بتعرض عليه تساعده وبتفتح الـ settings عشان يعرفوا إيه الأبليكشنز اللي بتستنزف الباقة وبتكتشف إنه طول الوقت بيستخدم Tinder.
- ست تانية بتحكي إنها لاقت في جيب بنطلون جوزها كوندوم\واقي ذكري وهم عمرهم ما بيستخدموا الوسيلة دي لمنع الحمل، لإنها مركبة وسيلة.
انتي قولي لنا قفشتيه ازاي؟
التعليق باستخدام حساب فيس بوك