الخيانة في أي علاقة أيًا كان نوعها مؤلمة جدًا للطرف اللي تمت خيانته. وأكتر أشكال الخيانة اللي بنتكلم عنها هي الخيانة ما بين الأزواج، والنهارده هنتكلم عن خيانة الزوج. الموضوع ده يمكن من أكتر المواضيع اللي أخدت مساحات كبيرة جدًا من الأبحاث النفسية والسعي لمعرفة أسبابها وازاي يتم علاجها ده غير طبعًا نصائح الدايرة المحيطة بيكي. خلينا نتكلم بشكل أبسط، كل ست بتكون عارفة تفاصيل زوجها وعندها قدرة كاملة في ملاحظة أي تغيير فيه ولو كان طفيف. يعني مهما كان حجم احتراف زوجك في التخفي، فيه جواكي حدس بيديكي علامة إن فيه حاجة متغيرة أو مختلفة. بس فيه نقطة مهمة جدًا لازم تحطيها في دماغك: لو كانت طبيعتك شكاكة بزيادة، فنقطة تصديق الحدس هتحتاج منك مراجعة.
نقطة كمان في غاية الأهمية: علامات التغيير اللي بتلاحظيها واللي هنقول لك هنا مجموعة منها فيها ملاحظتين:
- ظهور بعضها لا يعني وجود خيانة بالضرورة، يمكن فعلًا علاقتكم أصابها الضعف، وده ساعد زوجك إنه يخلق لنفسه عالم بعيد عنك.
- إن تعاملك مع الموقف بيكون غالبًا المسبب للنتيجة النهائية، سواءً في صالح العلاقة اللي بينكم أو ضدها.
بشكل أوضح: وجود خطأ في العلاقة أمر مشترك، رد فعل كل واحد منكم تجاهها مسؤولية فردية. يعني لو وجدتي إن فيه فعلًا أخطاء بتعمليها، يبقى لازم تعترفي بيها، ولو أخطاء هو اللي بيعملها، يبقى هو كمان لازم يتعرف بيها.
ده مش دعوة لتبرير الخيانة. إنما دعوة لمواجهة الواقع والحقيقة والتعامل مع الطرف الخائن إنه إنسان بيخطئ بحكم بشريته وإنه مش ملاك. كل ده بيحكمه مدى رغبتك في الحفاظ على العلاقة دي. واللي هي لازم تكون مشتركة مع زوجك. يعني مش هينفع تخافي على جوازكم لوحدك. لازم انتم الاتنين مع بعض.
هنستعرض معاكي أشهر علامات تقدري تعتبريها إنها علامة على إن في حياة جوزك ست تانية، أو خلينا نقولها بشكل تاني: إن فيه حاجة غلط بتحصل.
علامات الخيانة
- بيتجنبك:
هتحسي إنه بياخد جنب منك، مفيش تغيير بيحصل فجأة، إنما بييجي دايمًا بالتدريج. هتحسي إنه بيمسح سجل مكالماته دايمًا. بيمسح رسائل الموبايل، بينزعج جدًا لو شافك ماسكة الموبايل بتاعه على غير عادته، بيقعد بعيد عنك قدر المستطاع ومش بيتفاعل معاكي كعادته.
- أسراره كترت:
صحيح فيه نوع من الرجالة طبيعتهم كتومة، مش بيشاركوا معلومات كتير مع شريكة حياتهم. بس زي ما قلت طبيعتهم كده. لكن لو العادي بتاعكم المشاركة، وزي ما بيتقال كده سركم مع بعض، هتلاقي إنه بيخبي الموبايل بتاعه خصوصًا لو جات له رسالة على الموبايل سواء sms أو WhatsApp ساعتها هتحتاجي إنك تنتبهي.
- بدأ يقارنك بغيرك:
رغم إن فيه رجالة من عادتهم – غير المحببة واللي بعيدة عن اللطف نهائي – إنهم يقارنوا بين زوجاتهم وسيدات أخريات. بس لما تبقى عادة جديدة عليه إنه مش راضي عن مظهرك أو تصرف كان اعتيادي عندك وهو متقبله بل وسعيد به، وفجأة بقى يرفضه وينفر منه، يبقى هو في حياته، ظهر سلوك من سيدة أخرى وصلته لكده معاكي.
- اهتمام مفاجئ بنفسه:
فيه رجالة بتهتم بشكلها ولبسها والبرفيوم بتاعها في العادي بتاعهم. ودي بتكون حاجة جميلة جدًا أكيد، بس لو حسيتي إنه غيّر من الستايل بتاعه من غير ما يستشيرك، بقى يهتم بشكل مبالغ فيه، بينزل الجيم بحماسة غير اعتيادية، يبقى شغّلي علامة الإنذار عندك. فيه دخيل في المكان!
- كل ما تتكلمى معاه يتعصب:
الكلام نشاط إنساني طبيعي ووسيلة التواصل الأساسية بين البشر. بس الأسلوب + الموضوع المتناول بيفرقوا جدًا في مستوى التواصل. يعني لو انتي من النوع اللي كل ما تشوف جوزها يا تشتكي، يا تتعصب، يا تلوم، يا تظهر عدم رضاها وانزعاجها المستمر، خلينا منصفين. ده يخلّي أي إنسان في الدنيا بتجنب الكلام معاكي أو يتعصب فعلًا منك. لو فيكي الجانب ده، ما تقدريش تعتبري عصبية جوزك معاكي علامة خيانة. لكن لو انتي من النوع اللي كان قادر على تواصل مع شريكه بشكل إيجابي وده اختفى وبقى فيه رفض من ناحية شريك حياتك، يبقى هنا لازم وقفة.
- بيقلل من الوقت اللي بيقضيه معاكي:
كل علاقة زوجية لها نمط خاص بيها، روتين اعتيادي وطريقة تعامل مع الأمور سهل التنبؤ بها بين الطرفين، يعني فيه أزواج الطبيعي بتاعهم إنهم بيقعدوا وقت طويل مع بعض، فيه نوع تاني من الأزواج، الطبيعي إنهم بيقضوا وقت قليل لكن غني ومليان مشاعر وتواصل. لو حسيتي إن جوزك بيتهرب من وقتكم الخاص وعايز يكون له وقت خاص بيه بعيد عنك يبقى هنا فيه مشكلة.
بس نقطة نظام: الطبيعي بين البشر إن كل واحد يكون له الوقت الخاص بيه بيقضيه مع نفسه بيمارس اللي بيحبه مع نفسه بهدوء من غير تواصل مع الشريك، وده جانب لازم يحترم في أي علاقة زوجية لأنه بيعتبر متنفس طبيعي ما بينهم. لكن زي ما قلت لك، لو لاحظتي إنك لما تطلبي تقعدي معاه، بيرفض أو بيتحجج بأي حجة غير مقنعة وغير حقيقية، يبقى هنا فيه مشكلة.
- العلاقة الحميمة بينكم تلاشت:
من الأمور اللي كتير من السيدات، خصوصًا بعد الحمل والولادة، وحتى مع كبر السن بتتعامل معاها على إنها أمر ثانوي وغير مستحق كل الاهتمام هي العلاقة الحميمية. وده خطأ كبير جدًا. خلينا نعترف إن الرجالة مختلفين عن الستات في نقطة إن حبهم للعلاقة دي فيه نوع من أنواع الأنانية زيادة شوية عننا احنا الستات. ولما زوجك يلاقي إنه كل ما يطلب يتواصل معاكي بالشكل ده، بتقابليه بالرفض والصد، يبقى إنتي بتفتحي باب تقدر واحدة تانية تتسلل منه.
العلاقة الحميمة مش سبب قيام حياة زوجية، لكن مفيش حياة زوجية صحية وصحيحة من غيرها. والمشاكل فيها هتنعكس بالضرورة على شكل حياتكم اليومية. فلو انتي من النوع اللي مش بيهتم بيها، يبقى ده خطر وخطأ منك. إنما لو كانت ليها وتيرة طبيعية ومستمرة وفجأة وقفت، يبقى لازم تاخدي بالك. ملاحظة أخيرة بخصوص النقطة دي: التعب الجسدي أو حتى النفسي اللي ممكن يصيب أي واحد فيكم لأي سبب، ممكن يسبب توقف العلاقة الحميمة بينكم لفترة. لازم انتم الاتنين تكونوا منفتحين على بعض في النقطة دي ومتفاهمين، ولو فيه أي مشاكل عضوية، يبقى تدعموا بعض نفسيًا وتتشاركوا رحلة العلاج، يعني ما تعتبريهاش علامة خيانة.
دول أشهر 7 علامات ممكن تخليكي تقولي إن فيه ست تانية في حياة زوجك. ظهور علامة منهم مش دليل قاطع أبدًا على وجود الخيانة دي، ظهور أكتر من علامة منهم على زوجك، دليل يدفعك للشك.
أهم النصائح لو عندك إحساس إن جوزك بيكلم ست تانية
- احساسك بالشك ما ينفعش تواجهي بيه زوجك من غير دليل. لما تيجي تواجهي، لازم يكون معاكي دليل قاطع.
- إعجاب زوجك بنموذج من السيدات حواليه شيء إنساني طبيعي إنتي نفسك ممكن تمري بيه إنك تعجبي بنموذج رجالي حواليكي. الإعجاب ده لا يعتبر خيانة إنما شيء إنساني طبيعي. بيتحول خيانة لما التفكير يبقى زايد عن حده ويبدأ السعي إن الموضوع يعدي حدود الإعجاب الطبيعي.
- عصبيتك وغضبك وسوء إدارتك للموقف مش هتوصّلك غير لنقطة الفشل وإنهيار العلاقة. لما توصلي لمرحلة إنك اكتشفتي الخيانة، لازم تقفي مع نفسك، وتسألي سؤال مهم: هل أنا فعلًا عايزة علاقتي الزوجية مع الرجل ده تستمر؟ ولا أنا محتاجة أتخلص منها؟ إجابتك الصادقة مع نفسك هي اللي هتحدد سياسة التعامل مع الموقف ده.
- كوني ذكية وراقية جدًا في التعامل مع الموقف. هو حقيقي حساس. جوزك هو اللي عليه كل اللوم، يعني ما تجيش تقولي إن الست التانية خطافة رجالة، وكل المصطلحات الاعتيادية اللي بنضحك بيها على نفسنا دي. خيانته ليكي قراره الشخصي والخاص، مش قرار حد تاني.
- عالجي الموقف بينك وبينه: دخول أطراف أخرى مش هيجيب غير كلام كتير وبالتالي غلط كتير. ابعدي عن الناس اللي هتتعاطف معاكي بالشكل اللي – زي ما بنقول – هيسخنوكي ويسيطروا على مسار تفكيرك.
- لو طلع إنك فعلًا غلطتي في إدارة حياتك بالشكل اللي إدى مبرر لزوجك إنه يبحث على اللي بيدور عليه عند حد تاني، مش عيب تعترفي بكدة وإنك تطلبي مساعدة حقيقية.
في الآخر هنقول لك: الموقف صعب، بس طالما فيه أرضية مشتركة ما بينكم، وإحساسك إن التاريخ اللي بينكم يستحق المحاربة علشانه، يبقى ما تتردديش. الحياة الزوجية شيء جميل خصوصًا لو مع إنسان كويس غلط مرة. بس لو الموضوع تحول لأسلوب حياة والغلط استمر، يبقى للأسف هتحتاجي تاخدي وقفة لإنهاء المهزلة.
ملحوظة: هذا المقال يعبر عن وجهة نظر الكاتبة الشخصية، ولا يمثل بالضرورة سياسة راحة بالي
التعليق باستخدام حساب فيس بوك