محتويات المقال
دكتور محمد فاروق استشاري الجهاز الهضمي للأطفال، وواحد من الدكاترة القليلين المتخصصين في تشخيص وعلاج حساسية الطعام، قابلناه واتكلمنا عن كل التفاصيل والأسئلة اللي ممكن تخطر في بالك عن حساسية الطعام. وكان لنا معاه حوار ممتع ومليان معلومات قيمة مش هتلاقيها في أي مكان تاني. لو لسه عندك أي أسئلة سيبيها في التعليقات ودكتور محمد هيجاوبك عليه.
تعريف حساسية الطعام
- يعني إيه حساسية طعام؟
كلمة حساسية طعام معناها ردة فعل غريبة وشاذة من الجسم تجاه بروتين معين تعرض له الجسم عن طريق الأكل أو اللمس أو الشم أو الحقن، العين، كريمات، أي تعرض للجسم لهذا البروتين بأي طريقة من الطرق أو عن طريق الرضاعة في حالة الأطفال الرضع.
- إيه الفرق بين أعراض حساسية الطعام وبعض الأعراض المقترنة بأكلات تانية ممكن تتعب بدون وجود حساسية؟
حساسية يعني لازم الأعراض الناشئة عن البروتين يكون مصدرها الجهاز المناعي، وبالمناسبة الحساسية مختلفة تمامًا عن ضعف المناعة. حابب أفرق بين عدة حالات بيتعرض لها الناس في حالة وجود مشكلة ليهم مع الأكل:
- فيه أعراض كتير جدًا ممكن ترتبط بالطعام ليها علاقة بخصائص الأكل نفسه، يعني الشطة تعمل حموضة، ومشاكل في المعدة: دي حاجة يستوي فيها كل البشر الطبيعي والحساس. نفس الشيء مع البرتقال والحمضيات نلاقي حموضة أو حرقان في البول، دي أعراض طبيعية بسبب خصائص كيميائية في الطعام نفسه، لكن الأعراض دي غير ناتجة عن ردة فعل مناعية.
- فيه أعراض ناتجة عن نقص بعض الإنزيمات الهاضمة للمادة اللي بتسبب المشكلة زي عوز اللاكتوز بسبب غياب إنزيم اللكتيز في جدار الأمعاء المسئول عن هضم سكر اللاكتوز في اللبن، زي إن الواحد ييجي له امتلاء وكركبة في بطنه أو مغص أو ليونة في البراز أو إمساك. كلها أعراض غياب الإنزيم المسؤول عن هضمها، اسمه عسر هضم سكريات والأعراض بتلتبس على مرضى عندهم حساسية لبن ومرض عنهم عدم تحمل سكر اللبن.
- فيه أعراض مرتبطة بخصائص المادة الفعالة نفسها زي الكافيين ممكن يعمل هياج في حالة الجرعات العالية ممكن يعمل هياج: رعشة وانفعال وارتفاع في ضربات القلب، لإنه مادة منبهة ومستفزة للجهاز العصبي.
- بعض أنواع أطعمة فيها مادة الهيستامين عالية بصورة طبيعية، زي نوع سمك اسمه سكومبرويد فيش فيه مادة الهيتسامين، وكذلك الموز، دول مثالين واضحين لأطعمة هتسبب أعراض حساسية بسبب وجود الهيستامين في الأكل نفسه، أي حد ياكله عنده حساسية أو ما عندهوش معرض يجيله حكة وتورم. مع ذلك، ما نقدرش نقول عليها حساسية.
- فيه أعراض مرتبطة ببروتين الطعام نفسه، يعني لو شربت لبن فحصل قيء فيه دم أو ظهر دم في البراز، أو طلع إكزيما عنيفة جدًا أو حصلت نزلات معوية متكررة أو دخلت المستشفى بجفاف أو الضغط وطي نتيجة القي والإسهال والجفاف. كلها اعراض غير طبيعية تجاه بروتين الطعام، وده ممكن يحصل مع أي نوع أكل الجسم بيتحسس منه مش شرط اللبن.
إذن عشان نقول إن دي حساسية، لازم تكون ردة فعل مناعية من الجهاز المناعي نفسه والتوصيف دا بيستلزم مراحل تطور، بيمر الإنسان الأول بتسامح فموي، لو حصل فيه أي قصور أو اختلال، الواحد يخش في التحسس. الجسم يشوف البروتين مادة غريبة والمرحلة التالتة تظهر أعراض ناتج عن فقدان التسامح مع البروتين، دي الخلاصة في تعريف حساسية الطعام.
الأطفال والحساسية
- نسبة الأطفال المصابين بالحساسية قد إيه؟
ما عندناش إحصائية مصرية دقيقة تقول نسب الإصابة، العالم كله بيتكلم عن نسبة لا تزيد عن 5%. مثلًا 40% من مرضى عيادتي حساسية طعام، وده لأني عيادة متخصصة حتى مع وجود أمراض تانية عند طفل الحساسية، أسرته بتخاف يروح لأي دكتور تاني، بيخافوا من الأدوية اللي ممكن تتعارض مع الحساسية. لكن في النهاية أنا طبيب متخصص معدلها عندي لا يعكسها في الواقع.
خلينا نقول إن نسبة الناس اللي بتشوف نفسها عندها حساسية طعام – بحسب الإحصاءات العالمية – 25% من الناس، والرقم ده لما بنخضعه لفرز وفحص طبي دقيق وناخد التاريخ المرضي ونعمل تحاليل نكتشف إن 5% بس اللي عندهم حساسية.
- ليه وعي الناس بالحساسية في بعض الحالات بيكون أعلى من المطلوب؟
الواحد لما يجي له أعراض مجهولة بيعلّقها على معرفة مجهولة، يدخل على صفحات الحساسية في مواقع التواصل يسأل أو يقارن الشكوى بالمكتوب في المنشورات ويبدأ يقول “لا والله، دي فعلًا علامات حساسية! هامنع الأكلات المتسببة في الحساسية عشان أخف.
المجموعات الافتراضية المتخصصة رائعة وعظيمة وفعلًا بتقدم الدعم، وأفكار لوصفات مناسبة ومعلومات، لكنها تدخلت في تشخيصات غير صحيحة لكتير من الأمهات اللي أعراضهم مش كافية للتشخيص.
في الشهر الواحد بيجي لي مالا يقل عن 15 لـ20 أم محرومة وحارمة أولادها بالباطل، منهم أم لاقيتها مانعة نفسها لأنها مرضعة من وقت لما ابنها كان عمره شهرين فقط، جات لي لما أصبح عمره سنة وتمن شهر، طفل ممنوع من كل حاجة مش بياكل غير جزر ورز ودجاج فقط، محروم من كل الأكل بسبب فكرة غلط.
فكرة إن الناس تشخّص نفسها بنفسها إنهم حساسية أصبحت حاضرة بقوة وكتير من البوستات والتوصيفات والجروبات بتكون أشبه بموجة تخلي أي حد يقارن أعراضه بيها.
- كلمنا عن المنع؟
الامتناع عن الأكل المسبب للحساسية تمامًا مش سهل، دايمًا كأطباء بنميل إننا نأكّل كل حاجة، المنع الذاتي بدون دليل أو أمر من الطبيب نفق مظلم من الحرمان الوهمي، والمصيبة إنه بيكون أدعى إنه ممكن يعمل أنواع حساسيات خطيرة وصدمات تحسسية تمس الجهاز الدوري والجلد وقد تؤثر على الحياة لما الشخص ياكل الحاجات اللي كان مانع نفسه أو ابنه منها فجأة!
كان بيقال المنع آخر تلات شهور حمل وأول تلات شهور رضاعة بيقلل، الحقيقة إنه العكس صحيح. ده بيزوّد فرص الحساسية. الطبيعي الأم تاكل على قد ما تقدر أكلات متنوعة: حبوب، سي فود، مكسرات، وتبعد عن اللحوم المصنعة وتاكل أكل صحي وبيتي. الأكل الصحي له خصائص مقوية للمناعة ومضادة للالتهابات.
لو عاوزين نقلل الخطر، بعض الأطفال اللي أخوهم أو أختهم عندهم حساسية، لو اضطرينا ندّي صناعي، ندّي أنواع منخفضة التحسس ما تستفزش نشوء الحساسية وده بواسطة طبيب. (اعرفي عن خرافات الرضاعة الطبيعية هنا)
الجسم بيذاكر البروتين، فإما يكتسب مزيد من التحسس منه أو التسامح معاه، انقطاع الجسم عن التعرض للبروتين بيحول الجسم للصفة المعادية للبروتين وبيكسبه حساسية.
احنا بنمنع وبعدين بندخل من بروتينات معينة لفترة ونراقب الأعراض ونعيد الادخال ونراقب الأعراض بعد رجوع الأعراض لو تحسن الطفل مع المنع ورجعت الأعراض مع الإدخال فلابد نشخص حساسية طعام، كتير جدًا بيمنعوا وأعراض تتحسن زي المغص والارتجاع وما يتمش إخضاع الطفل لتحدي الإدخال. الفيصل ان الدنيا تتحسن مع المنع وتنتكس مع الإدخال.
أسباب الحساسية
الحساسية بتحصل ليه أصلًا؟
مش معروف لحد دلوقتي، مفيش دليل علمي يقول لنا، لكن الحساسية بشكل عام لها عوامل متعددة بتساهم إنها تكون موجودة زي
- الوراثة
الحساسية استعداد لشذوذ مناعي، بييجي عن طريق إن حد من الأقارب كان عنده حساسية ما في مرحلة ما من حياته سواء حساسية أنف أو صدر أو جلد، في الحالة دي الابن بنسبة 44 % بيصاب بحساسية الطعام بتصب في خانة القابلية الوراثية وتيجي وتورث في صورة حساسية طعام.
- الولادات القيصرية
في حالة الولادة القيصرية الطفل مش بيمر في القناة المهبلية ومش بياخذ في الشهقة الأولى ليه الميكروبات الصديقة الموجودة في القناة دي، واللي بتحمي جهازه المناعي.
- انتشار الرضاعة الصناعية
- كثرة استخدام المضادات الحيوية
في الحالة دي بتنشأ الحساسية لأن المضادات الحيوية بتعمل خلل في توازن البكتيريا الصديقة وغير الصديقة داخل الأمعاء، وبالتالي بيتراجع التسامح الفموي مع بروتينات الطعام وبتزيد فرص نشوء الحساسية.
- الإدخال الظالم
يعني ندخل الأكل بدري جدًا، فيه أطفال عمرهم 40 يوم بيشربوا لبن بقري. وفيه أطفال عند عمر شهر، الأهل بيأكلوهم زبادي، كل ده بيعمل استفزاز مناعي مبكر.
- إيه أنسب سن للأكل؟
إدخال الطعام من أول يوم في الشهر الخامس لأول يوم في الشهر السادس، المرحلة دي بنسميها “شباك الفرصة” لأنها أحسن فرصة لاكتساب التسامح المناعي مع الأمعاء وعشان الأم تتلافى إصابة ابنها بالحساسية في المرحلة دي. ممنوع المنع بدون سند.
أعراض الحساسية
- إيه هي أعراض الحساسية؟ وفي حالة شك الأم المفروض تتصرف إزاي؟
الأعراض متنوعة وبتشمل أكتر من نظام في الجسم، على راسهم الجهاز الهضمي أو التنفسي أو الجلدي، مع فقدان الوزن، أو ثبوت الوزن أو اكتساب غير كافي لنمو الطفل. كل دي أعراض مجتمعة أو منفردة للحساسية بتظهر في أشكال مختلفة زي:
أعراض الجهاز الهضمي:
إسهال أو إمساك أو تقلبات بينهم، ضعف في مناعة الجهاز الهضمي، وأدوار نزلات معوية كتير، وحجز في المستشفيات، وكل مرة تتعالج كنزلة معوية منفصلة، في حين إن الحساسية أضعفت مناعة الجهاز الهضمي، وخلته عرضة للإصابة لميكروبات متعددة، ممكن ارتجاع مع قيء أو بدون، شرقات متعددة، قيء دم أو دم في البراز.
أعراض الجهاز التنفسي:
شرقات، حساسية صدر متكررة، سيلان أنف لا يتوقف.
أعراض جهاز الجلد:
إكزيما أو طفح، أو تسلخات في منطقة الشرج تشيل الجلد مع تقرحات.
نصيحتي في حالة شك الأم: لازم تتوجه لمتخصص، كل الأعراض دي بتلتبس مع أعراض تانية لأمراض وظيفية مختلفة، اللي بيخضع الطفل للتقييم أو الفحص طبيب على دراية كافية وعنده خطوط الفصل الكافية والقاطعة بين الالتباسات دي.
جالي حالة لطفل اتشخص مرض كرونز وعنده نواسير عديدة، لكن مع إعادة التقييم، منعناه من اللبن وطلع حساسية وخفت النواسير فعلًا. الأم ما تلجأش لأم غيرها على فيسبوك أو مواقع التواصل، والأهم ما تمنعش أكل من نفسها.
التشخيص الخاطيء
ليه تشخيص الحساسية بيكون غلط وصعب في أوقات كتير والأمهات بتدوخ لحد لما تتأكد من التشخيص؟
أتفق إنه التشخيص بيكون غلط في أوقات كتير. لكن من المسؤول؟ ممكن بسبب قلة عدد الزملاء المتخصصين، ممكن لأن مفيش شهادات تخصصية للاطباء تخرج أطباء متخصصين في الجزء ده، ممكن بسبب تشخيص الأمهات بنفسهم مع اللجوء لغير المتخصصين، وربما يكون القصص اللي بتتحكي هي اللي حصل معاهم خطأ في التشخيص. أما النهايات السعيدة مش هيطلع يتكلم عن التشخيص الصح. المشاكل دايمًا هي اللي بيتم تضخيمها وذكرها.
في جامعة عين شمس، فيه وحدة كاملة للجهاز الهضمي أنشأها دكتور مصطفى الهديد وعندنا أسماء زي دكتور أحمد حمدي، دكتورة مروة الديب، دكتورة يسرا عوض، دكتورة دينا عبد الحميد، دكتورة دينا حيدر، أعمل معهم على مستوى العيادة التخصصية في الدمرداش التذكرة بـ 3 إلى 5 جنيه بيتم التشخيص يوم الأحد والأربعاء.
في جامعة المنصورة، فريق رائع دكتور محمد عز الرجال ودكتور أحمد مجاهد، دكتور طارق بركات دكتور منصور صقر، وحدة الجهاز الهضمي في جامعة القاهرة، النقطة دي قوية في العيادات الخاصة ربما أفضل من بعض العيادات الخاصة، مع وجود عيادات خاصة قوية، الفكرة في انتقاء التخصص والطبيب وعدم المنع قبل الكشف.
دليل التعامل مع الحساسية
- هل في دليل واضح للتعامل مع طفل الحساسية؟
عندي كتاب بعنوان “حساسية الأطفال من الألف للياء” نفذ منه طبعتين حتى الآن، وحاليًا باعمل عليه تعديلات، كانت أول طبعة في 2014 والثانية في 2016، لكن فعلًا احنا محتاجين كتاب للجمهور من إعداد أساتذة الجهاز الهضمي، لأن الدليل المتوافر حاليًا موجه للأطباء مش الأمهات، والتعليمات واللغة للمعالجين فقط.
محتاجين نقابة الأطباء تنظم ورش عمل للأطباء والجمهور، ومحتاجين وزارة الصحة تتبنى الفكرة وتوفر دليل للأمهات بالإضافة لدورهم في توفير اللبن للأطفال اللي رفع عن الأمهات أعباء جسيمة، العلبة الواحدة من اللبن المناسب للحساسية تمنها 280 جنيه لو عرفنا إن الطفل بيستهلك اتنين أو اكتر في الأسبوع نفهم إنها بتمثل عبء رهيب، ونعرف أكتر الدور اللي قادته وزارة الصحة لما بقت بتصرفه بالمجان، فاضل منظومة للجمهور والأطباء الفترة الجاية.
الممنوعات والمسموحات هي أكتر حاجة مهمة، لازم المريض يعرفها كويس. وهنا ما نقدرش نغفل دور جيش كامل من الأمهات ولادهم خفوا لكن ما زالوا بيبذلوا جهد يوصوا الشركات، ويتواصلوا معاها، ويعرفوا خطوط الانتاج فيها عناصر تحسس زي الجلوتين والكازين وغيرهم ولا لأ. الطفل اللي عنده بيض وصويا مثلًا ممكن يروح مطاعم إيه؟ بيراسلوا شركات برا مصر ويعرفوا إيه الماركات المستوردة اللي ينفع نجربها، أمهات شايلين عبء ومجهود ضخم في التواصل مع الشركات عشان نعرف أنواع المربات والحلويات والمغلفات الخالية من الممنوعات ومنافذ بيع المنتجات الآمنة الخاص منها والحكومي زي منفذ البحوث الزراعية اللي بيبيع منتجات خالية من الممنوعات زي الجلوتين واللبن والصويا، بل إن الامهات حفزوا بعض المنتجين ينتجوا منتجات مناسبة للحساسية.
التعليق باستخدام حساب فيس بوك