الرضاعة الطبيعية لها فوائد كتير على الأمهات وعلى الرضع. واحدة من الفوائد دي للأم إنها احتمال الرضاعة الطبيعية تنحف الأم أو العكس ان الرضاعة الطبيعية تزيد الوزن للأم المرضع. بنقول احتمال ليه، عشان نسبة كبيرة من المرضعات رضاعة طبيعية فعلًا وزنهم بينزل أثناء الرضاعة الطبيعية لكن نسبة منهم ما بيحصلش معاهم ده.
الرجوع لوزن ما قبل الحمل
الوقت المطلوب عشان تخسي أو ترجعي وزنك بعد الولادة بيختلف من ست للتانية لكن كتير من الأمهات بتقول إن الرضاعة الطبيعية ساعدتها جدًا في الرجوع لوزن قبل الحمل بسرعة. لكن فيه أمهات تانية قالت إن الرضاعة ما فرقتش خالص في وزنهم ولا بالسلب ولا بالإيجاب.
الرضاعة الطبيعية تنحف الأم .. ازاي؟
- الرضاعة الطبيعية بتحرق لحد 500 سعر حراري في اليوم وده كإنك لعبتي رياضة من 45 ل60 دقيقة.
- عشان انتي هتكوني مركزة في اللي بتاكليه عشان عارفة إن كل حاجة بتاكليها بتنزل للبيبي، ده بيخليكي كإنك عاملة دايت وعليه بتخسي بسرعة. (اعرفي من هنا منتجات مهمة جدًا للرضاعة الطبيعية).
- في دراسة اتعملت لاقت إن الأمهات اللي رضعوا أطفالهم رضاعة طبيعية فقدوا كيلو ونص أكتر من الأمهات اللي رضعوا رضاعة صناعية حتى وهم ملتزمين بأكل صحي.
ازاي الأم المرضع تخس أثناء الرضاعة الطبيعية؟
- كلي قليل بس مش قليل قوي. خدي بالك مش عشان تخسي تحرمي جسمك من المواد الغذائية اللازمة عشان تغذيتك وتغذية طفلك.
- العبي رياضة. ما تخافيش، الرياضة طالما مش تمارين قاسية أو عنيفة مش هتقلل اللبن ولا هتهدد صحتك بأي شكل. الرياضة المعتدلة مع الأكل الصحي هيساعدك تكسبي عضلات وتفقدي دهون.
- خلي الخيارات الصحية دايمًا قدامك. أوقات لو كل اللي شايفاه عينيكي شوكولاتة ومأكولات مش صحية، هتضطري تاكليها. مش هتفكري إن فيه أكل أحسن ممكن أقوم أعمله، هتاكلي المتوفر. عشان كده، املي المساحة اللي حواليكي بخضار وفاكهة عشان لو جعتي تستسهلي أكلها.
- اشربي ميا كفاية. واشربي عصاير طبيعية ومشروبات مش محلاة.
- كلي بالراحة وبتركيز. خدي وقتك جدًا وانتي بتمضغي الأكل عشان ده مش بس بيساعد في الهضم إنما كمان في الإحساس الأسرع بالشبع.
- نامي كل ما تقدري. النوم في أول فترة بعد الولادة بيكون متقطع جدًا وقليل. لكن خدي بالك إن قلة النوم هتسبب لك الجوع والرغبة في أكل مأكولات مش صحية.
نتمنى لك فترة رضاعة طبيعية مغذية ومفيدة وصحية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر
Healthline
What’s your Reaction?
التعليق باستخدام حساب فيس بوك