رغم إنه المتوقع في مجتمعنا وفي العالم كله إن الإنسان بعد التخرج من الجامعة بيقضي سنة أو اتنين في اختيار شريك حياة وبعدين يتجوز في العشرينات، وبالتالي يمارس الجنس في العشرينات، إلا إن الرغبة الجنسية عند المرأة مش بالضرورة يكون ده أفضل سن لممارسة الجنس عند المرأة أو حتى عند الرجل. أيوة الجسم بيكون جاهز فسيولوجيًا إنه يمارس الجنس، لكن ما بيكونش ده أحسن تجربة جنسية، الحلو لسه قدام. هنا هنتكلم بالتفصيل عن إيه أفضل سن مناسب للعلاقة الجنسية وكمان طرق الحفاظ على الرغبة الجنسية عند المرأة
أفضل سن للعلاقة الجنسية عند النساء
في دراسة نشرتها الانتدبندنت البريطانية، العلماء لقوا إن 86% من الستات اللي فوق ال36 سنة واثقات في شكلهم وبيأدوا أحسن وكمان بيوصلوا للأورجازم أحسن وأكتر من الستات الأصغر (أقل من 23 أو من 23 – 35).
ولما اتسألوا عن عدد المرات اللي بيمارسوا فيها الجنس، معظم الستات اللي فوق ال36 سنة اللي بيختبروا أحسن علاقات جنسية قالوا إنهم بيمارسوا الجنس من مرة لتلات مرات أسبوعيًا.
طرق الحفاظ على الرغبة الجنسية عند المرأة
أولًا: الانبساط العمومي في العلاقة
ما ينفعش أكون عايزة أحافظ على الرغبة الجنسية مع راجل بيضربني أو بيشتمني أو بيسخر مني أو بيعاملني وحش. منطقي! لو مش مبسوطة في العلاقة العامة مع شريك حياتك سواء لأسباب زي اللي قلتها أو أسباب تانية مهما بانت بسيطة، مش هيكون عندك رغبة جنسية ناحيته.
ثانيًا: التخفيف من ضغوط الحياة
صعبة جدًا لكن أساسية عشان صحتك النفسية والجنسية، لو طول الوقت مضغوطة بالشغل والبيت والبوتي تريننج والسابلايز و100 حاجة، مش هتعرفي تتبسطي ومش هيكون عندك رغبة جنسية. حاولي تتكلمي مع جوزك في تقسيم المهام المنزلية وحاولي تمارسي التأمل وتقللي الضغوط اللي عليكي.
ثالثًا: الدلع
ودي مهمة الزوج، كل ما الست اتدلعت وسمعت كلام حلو عن شكلها وجسمها وقد إيه هي جميلة ومثيرة، كل ما أكيد هتحب ممارسة العلاقة الزوجية.
رابعًا: الوقت
الست غير الراجل في الاستثارة، فالمفروض إن الطرف التاني يكون عنده استعداد إنه يدلعها ويداعبها ويضمن إنها توصل للأورجازم قبل ما يبدأ في الإيلاج. بالطريقة دي، الست هتحب العلاقة الحميمة أكتر وهتكون دايمًا عندها رغبة فيها.
مصادر ساعدتنا في كتابة المقال
Independent
WebMD
1 comment
فعلا كلام صحيح وواقعي