دلوقتي وصلتي للثلث الأخير من الحمل بعد رحلة عناء طويلة تعبتي فيها وكنتي بطلة قوية وجميلة، وجات أخيرا نهاية الرحلة وبدأتي تفكري هتعملي إيه في وقت الولادة خاصة لو بتخططي للولادة الطبيعية وخايفة من الألم وحاسة بلخبطة حقيقية.
في المقال ده هنساعدك بمعلومة جديدة عن النعمة اللي ربنا أعطاها للأمهات في وقت الولادة، الساعة الذهبية.
إيه هي الساعة الذهبية وقت الولادة؟
موقع مخطط ستانفورد الطبي بيقول إن الساعة اللي بعد الولادة الطبيعية بتعمل فرق كبير جدا في ارتباط الأم بمولودها الجديد، والأبحاث العلمية الحديثة أثبتت إن ملامسة بشرة الأم لبشرة المولود بيحفز كيميا الدماغ إنها تتغير بسرعة وتفرز جوه جسم الأم الهرمونات اللي بتعزز رغبة الأم إنها ترضع المولود، وده بيخلي جسم الأم ينتج الحليب بشكل أسرع .
مش بس كد ، ده كمان الأبحاث بتقول إن الأم لما تحط ابنها المولود الجديد على صدرها ده بيخفف على البيبي صدمة خروجه من الرحم بسبب جسم الأم الدافي وبيساعده على تنظيم درجة حرارة جسمه بشكل أسهل وأسرع وبيساعده يتنفس كمان بطريقة أحسن ويقوي جهازه المناعي ويقلل من فرص إصابته بفقر الدم .
كمان الأبحاث بتؤكد إن ده بيخفف من نسبة إصابة الأم نفسها باكتئاب ما بعد الولادة.
طيب: لو انتي هتولدي قيصري؟ تعملي إيه؟
أمهات كتير بتلجأ للولادة القيصرية لأسباب مختلفة وممكن يستفيدوا من الساعة الذهبية إنهم يطلبوا الملامسة المباشرة للبيبي من الدكتور اللي مشرف على الولادة .
صحيح إن ده هيكون وقت أقل من الساعة بس هيكون كفاية وهتستفيدي منه كمان .
افتكري دايما إنك أحسن أم لابنك وإن سواء ولادتك كانت طبيعية أو قيصرية فمن أكتر الحاجات اللي ممكن تعزز ارتباطك انت وابنك سوا ويحسن صحتكم العامة ويقيكم من اضطرابات صحية كتير هو انك تضعي مولودك الجديد على صدرك لفترات طويلة كافية إنها تعمل بينكم رباط مش هيتقطع أبدا.
مع تمنياتنا ليكي بالصحة والعافية والولادة الآمنة والسعيدة كمان.
المصادر:
news.sanfordhealth.org
thedaisyfoundation.com
التعليق باستخدام حساب فيس بوك