“ابني بيسرق من أصحابه في المدرسة” / “شفت ابني بياخد فلوس من شنطتي من ورايا كذا مرة، وهتجنن، مش عارفة اتصرف” مشكلتين اتبعتوا لي على الصفحة، وقررت أكتب عنهم مقال عشان عارفة قد إيه الموضوع ده مهم وصادم لأي أم بتعدي به مع ابنها/بنتها، وممكن تكون فيه أمهات بتعاني منه ومش قادرين يتكلموا أو يطلبوا مساعدة!
بس عشان نقدر نعرف علاج السرقة عند الاطفال لازم نعرف ايه هي اسباب ودوافع السلوك ده.
أسباب سرقة عند الأطفال
طيب تعالوا نعرف الأول إيه ممكن يكون سبب الموضوع ده قبل ما ندور على حلول
- طبعًا في السن الصغير لغاية خمس وست سنين ممكن أصلا ما يكونش لسه مستوعب فكرة الملكية ومجرد بيعمل الحاجة اللي هو عايزها (حاجة عجبته، فقرر ياخدها، ببساطة بغض النظر من حقه أو لا)
- لكن بعد سن ست سنين لو الطفل بياخد حاجات مش بتاعته (مش باحب أسمّيها سرقة)، فممكن تكون دي محاولة غلط منه للفت النظر له، لو حاسس بالإهمال، وإنه مش مهم ومتشاف في البيت.
- للأسف أوقات الطفل في الحالة دي بيكون حاسس بحرمان وبيقرر إنه يعاقب باباه ومامته بالطريقة دي.
- أو إن اللي حواليه أحسن منه أو موجود في وسط مختلف عنه، فبيحاول يكون زيهم أو يرسم فدام أصحابه صورة مختلفة عنه.
- أوقات بيكون بسبب تجاهل لطلبات الطفل أو رفضها معظم الوقت من غير مبررات ومن غير وجود بدايل.
- معاملة الطفل طول الوقت لأوامر وتعليقات على تصرفاته، ومحاسبة صارمة على الغلط طول الوقت.
- ساعات الأهل بيتخيلوا إن لو مش حارمين الطفل من حاجة، والفلوس قدامه في أي وقت، ده هيحميه من الوقوع في فخ السرقة. لكن أوقات وجود الفلوس طول الوقت قدام الأطفال بدون حساب، بيشجّعهم ياخدوا منه من غير استئذان ويحسوا إن ده حقهم.
- آخر حاجة ممكن تكون السبب هو السرقة المرضية، ودي طبعًا بتكون مختلفة ومستمرة وعلى أتفه الحاجات، وبتحتاج تدخل أخصائي نفسي.
علاج سرقة عند الأطفال
طيب نقدر نعمل إيه علشان ولادنا يبطلوا ياخدوا حاجة مش بتاعتهم ونعالج الموضوع ده إزاي؟
- أول وأهم حاجة هي إنك ما تقوليش أبدًا لطفلك “يا حرامي” / “انت بتسرق”. ما تتهميهوش بالسرقة أبدًا.
- لو لسه طفلك في سن مش فاهم كويس فكرة الملكية، يبقى لازم تفهميها له أكتر، وده لازم يبان في تصرفاتك، يعني ما تاخديش منه حاجة بتاعته غير لما تستأذنيه، ولازم يبقى عارف إن فيه حاجات في البيت تخصك وحاجات تخص باباه وحاجات مشتركة بينكم كلكم ومش من حق حد يتعدّى على ملكية التاني.
- واجهيه بهدوء مع إعادة توجيه لتصرفه، من غير إتهام مع توضيح كامل إن ده تصرف مش مقبول تمامًا مهما حصل ومؤذي له ولغيره ومستحيل تسمحوا بيه تحت أي ظرف.
- عرفيه إنه لازم يصلح غلطه ويتحمل مسؤولية تصرفه واسأليه ممكن يعمل ده إزاي. وخليه يفكر هو، ويتعب في الحل، زي إنه ازاي هيرجّع لك الفلوس، هيحوش من مصروفه ويقسط الفلوس مثلًا، لو أخد حاجة ممكن ترجع، لازم يرجعها لصاحبها. المهم إن الموضوع ما ينفعش يتفوت غير لما يتحمل نتيجة اللي حصل ويصححه.
- استغلي أي فرصة واتكلمي معاه واحكي له قصص عن الأمانة وإن ما ينفعش حد ياخد حاجة مش من حقه وإيه اللي بيحس به اللي بناخد منه حاجته وإيه عواقب إننا ناخد حاجة مش بتاعتنا من غير إذن.
- راجعي نفسك في تلبية احتياجات ورغبات الطفل. شوفي لما بترفضي طلبه بترفضيه إزاي، ولو طفلك موجود في وسط مناسب ليكم ماديا واجتماعيا ولا لأ.
- لو طفلك ما بياخدش لسه مصروف، ابدأي إدي له مصروف وساعديه على التخطيط في استخدام الفلوس دي وهيصرف في إيه وهيحوش إيه. ولو أصلًا بياخد مصروف، اتأكدي إن المصروف ده مناسب لمصاريفه وفاجئيه كل فترة بزيادة في المناسبات (لكن ما تزوديش مصروفه أبدًا بعد الموقف ده كنتيجة للسرقة).
واتكلمي معاه لو محتاج يزوّد دخله ممكن تساعديه إزاي زي إنه يساعد في مهام زيادة مش مطلوبة منه وياخد أجرها بدل ما تستعينوا بحد تاني (زي غسيل عربية باباه مثلًا).
وأخيرًا السرقة عند الأطفال مش كارثة زي ما احنا كأمهات بنحس، لإن ده سلوك غلط ممكن أي طفل يقع فيه ومحتاج تعديل وتعامل صح معاه مش أكتر. المهم كأب وأم بيعدوا بالموقف ده إنكم تدعموا الطفل نفسيًا وترجعوا تعاملوه باحترام وما تتعاملوش معاه كإنه حرامي أو تتكلموا في الموضوع وتفكروه بيه مع كل غلطة أو تفضحوه قدام إخواته وتقللوا منه.
افتكروا دايمًا إن الغلط هي فرصتهم عشان يتعلموا ويكبروا.
التعليق باستخدام حساب فيس بوك