محتويات المقال
السمنة علامة خطر عند الكبار والصغار. ومع إن ناس كتير بتهتم تتبع نظام غذائي وتمارس رياضة إلا إننا ما بيجيش في بالنا كتير إن السمنة ممكن كمان تكون عند الأطفال. عشان كده، هنجيب لك الدليل الشامل عن السمنة عند الأطفال، تعريفها وأسبابها وعلاجها وكمان أضرارها.
إيه هي سمنة الأطفال؟
مش دايمًا مظهر الطفل هيكون هو مؤشر السمنة. أجسام الأطفال في طور النمو بتخزن الدهون في أماكن مختلفة، فمش كل شكل من أشكال جسم الطفل هيكون معناه إنه بيعاني من السمنة. السمنة تتعرف بمعدل كتلة الجسم BMI. وده ممكن يعمله بكل سهولة طبيب الأطفال المتابع لطفلك. كمان عشان تطمني أكتر، ممكن يعمل للطفل تحاليل عشان تعرفي لو فيه أي حاجة محتاجة تعمليها.
اعرفي عن فيروس CMV في الحمل وصحة الجنين
سمنة الأطفال الرضع
منظمة اليونيسيف عملت دراسة في أكتر من 16 دولة عن الرضاعة الطبيعية والصناعية وعلاقتهم بـ سمنة الأطفال الرضع. الدراسة لاقت إن الرضاعة الطبيعية بتمنع فرصة سمنة الأطفال بنسبة توصل لـ25%. ممكن كمان تقري أكتر عن اللبن الصناعي وعلاقته بزيادة وزن الطفل من هنا. احرصي على الرضاعة الطبيعية الحصرية لأول سنة أو على الأقل 6 شهور. وما تدخليش أكلات دسمة للطفل الرضيع أبدًا. اعرفي من هنا 4 وجبات مبتكرة لطعام الطفل في عمر السنة.
أسباب السمنة عند الأطفال
- أخطاء في نمط الحياة.
- عوامل وراثية
- الهرمونات
أخطاء نمط الحياة
نمط الحياة السريع اللي احنا فيه خلانا معظم الوقت ما بنلتفتش لتغذية الطفل بشكل سليم، ولا حتى لتغذيتنا احنا. فلو طفلك بياكل أكلات سريعة من برا البيت أو بياكل المقرمشات والمحمرات الموجودة في السوبرماركت بماركات مختلفة. أو بيشرب مشروبات غازية، طبيعي هيكون معرض أكتر إنه يصاب بالسمنة. كمان لو الطفل ما بيعملش أي نوع من الأنشطة الرياضية أو ما بيتحركش كتير، ده بيضيف لأسباب السمنة.
عوامل وراثية
لو الأب أو الأم عندهم خلل ما في وظائف الجسم بيؤدي للسمنة، غالبًا في الحالة دي، الطفل بيورث العوامل دي وبالتالي بيصاب بالسمنة.
الهرمونات
لو ابنك بياخد أدوية معينة لأي سبب، ممكن يكون من آثارها إنها بتزود هرمونات معينة أو بتلخبط هرموناته وبالتالي بتؤثر على وزنه.
علاج السمنة عند الأطفال
ده طبعًا بيختلف على حسب سبب السمنة نفسه. يعني كل حالة ولها علاج.
لو السبب نمط الحياة
دي أكتر حاجة مقدور عليها، تقدري ببساطة تروحي لطبيب تغذية وتشوفي أنسب طريقة لتخسيس طفلك من غير ده ما يضر تغذيته ونموه إيه. أرجوكي اوعي تقولي لطفلك جمل مدمرة نفسيًا عن وزنه وشكله. اعرفي هنا فوائد الرياضة: إيه لازمة الرياضة في حياة الأطفال. وخليني أقول لك إن الأساس دايمًا إننا نكون قدوة لأطفالنا في التغذية السليمة.
وبدل ما تخلي السناك هو حاجة محمرة أو مقرمشات من السوبر ماركت، خليها تفاحة أو موزة أو حتى فشار. وبلاش “هاجيب حاجة حلوة لو سمعت الكلام” لإنها بتديه إحساس إن الحاجات المسكرة دي جايزة.
لو عوامل وراثية
حتى في حالة العوامل الوراثية، لازم تاخدي بالك من تغذية طفلك ورياضته، لإنها بتلعب نص الدور والعوامل الوراثية بتلعب بس النص التاني.
لو الهرمونات
لو ابنك بياخد أدوية هي اللي بتسبب زيادة وزنه، ارجعي للطبيب اللي وصف العلاج، واطلبي دوا بديل ما يكونش من آثاره الجانبية اضطراب في الهرمونات مش بس عشان السمنة، لكن كمان عشان صحته العامة.
أضرار السمنة عند الأطفال
دلوقتي ممكن حد يتسائل: إيه المشكلة أصلًا يعني إن الطفل يبقى وزنه زيادة؟ ما هو لسه هيكبر ولما يكبر يبقى يخس. لكن الحقيقة إن السمنة عند الأطفال لها أضرار كتير جدًا.
- مرض السكري خاصة النوع التاني.
- ارتفاع الكوليسترول وضغط الدم.
- آلام المفاصل.
- مشاكل في التنفس.
- دهون الكبد.
التعليق باستخدام حساب فيس بوك