شعر الكوريين واخد عقل ناس كتير جدًا، خاصةً بعد اجتياح المسلسل الكوري سكواد جيم Squid Game. وفي الوقت اللي كان فيه ناس بتتفرج ومندمجة على المسلسل الممتع، كان فيه ناس تانية شغالة سيرش على فيلر الشعر الكوري، وأسرار الشعر الكوري، وشامبو الشيب الكوري. ده غير ماسكات كورية للشعر وشامبو صبغ الشعر الكوري، في محاولة للوصول لنفس درجة الصحة والجمال لشعرهم.
في المقال ده، حبينا نجيب لكم الزيتونة في عناية الكوريين بشعرهم، واللي مش بيتضمن على فكرة الفيلر الكوري للشعر ولا حتى مكواة شعر تورنيدو الكوري! الفكرة كلها بتتلخص في العناية بفروة الراس وصحة الشعر نفسه بطريقة ولا أسهل ممكن تتبعوها معانا في الخطوات ديز
أسرار العناية بالشعر على الطريقة الكورية
- تقشير فروة الرأس
- طريقة وضع الشامبو
- مدلك فروة الرأس
- ماسك الشعر
- الخل السحري
تقشير فروة الرأس
الكوريين بيستخدموا من وقت للتاني شامبو معين لتقشير فروة الرأس، بيحتوي بالأساس على مادة اسمها الساليسيلات، مش بيعمل رغوة لما بيتحط على الشعر لكن في نفس الوقت بيضمن إن فروة الرأس تكون فعلًا نضيفة وخالية من أي جلدة ميت أو قشرة، والكلام ده بيعملوه مرة واحدة كل أسبوعين مثلًا. شوفي كمان: 10 أنواع شامبو خالية من السلفات والسيليكون
وكمان ممكن تقري: تقشير الوجه بأهم 5 طرق طبيعية
طريقة وضع الشامبو
مش أي شامبو ينفع للشعر. في نظام العناية الكوري بالشعر، عادة بيختاروا نوع شامبو لطيف يكون مناسب لنوع الشعر، لكن الفكرة إنهم مش بيكوّموا الشامبو في قبضة إيدهم ويركزوه في مكان معين في شعرهم أثناء الاستحمام، لكن بيتم تدليك فروة الرأس بالشامبو بأصابع اليد أثناء غسل الشعر، وده اللي بيضمن إن الشعر وفروة الراس فعلًا بقت نضيفة وتم تنشيط الدورة الدموية في نفس الوقت.
مدلك فروة الراس
لسه ما خلصناش العناية بفروة الراس، لأنها هنا شبه الأرض الزراعية: العناية بيها هتدي محصول أكبر، وأحسن، لذلك بعد خطوة الشامبو، بيكون في عناية إضافية من خلال حاجة اسمها مدلك فروة الرأس، لتحسين الدورة الدموية في أنسجة فروة الرأس، واللي بدورها بتساعد في تحفيز نمو الشهر. مدلك فروة الرأس بنستخدمه بعد الاستحمام وبعد لما الشعر ينشف تمامًا.
ماسك الشعر الكوري
ماسكات الشعر بزيت الأرغان وجوز الهند وزيت الخروع جزء أصيل من روتين العناية العميقة بالشعر في كوريا، بنتكلم عن حلول جذرية للشعر الجاف والمتقصف واللي أطرافه متدمرة، وده بيكون مرة واحدة على الأقل في الأسبوع، الموز والمايونيز وجوز الهند والفراولة والعسل والأفوكادو دي مش عصاير، دي ماسكات للشعر برضو. وده بيخلى اى شعر كوري شكله صحي ولامع.
الخل السحري
دايمًا على موقع راحة بالي، بنوصف الخل بإنه سائل سحري وده مش من فراغ، وبخلاف استخداماته الكتير جدًا والعظيمة في تنظيف البيت.
الخل كمان جزء من روتين الكوريين في العناية بشعرهم وتحديدًا فروة رأسهم من خلال التنظيف المنتظم لفروة الراس واللي بتساعد على تقشير أنسجة فروة الراس بعمق وإزالة أي أوساخ متراكمة في البصيلات واللي بدوره بيخلي الأكسجين يدخل ويتخلل الشعر أكتر.
الطريقة بتتم من خلال شطف الشعر في نهاية الاستحمام بالخل وده عن طريق تخفيف كوباية خل تفاح مع كوبايتين مياه ونشطف بيه الشعر وبعدين نشطفه بمياه باردة.
في النهاية حابين نقول إن كل أشكال الشعر التقيل والخفيف الناعم والكيرلي جميلة، وكل نوع وله القصة والشكل وروتين العناية اللي يليق عليه هو بالذات ويخلي مفيش أي حاجة تانية شبهه.. اتبسطوا بمنحة ربنا وحبوها.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
التعليق باستخدام حساب فيس بوك