رسايل كتير جدًا بتوصل للنجم رامى جمال من وقت إصابته بالبهاق، عن المرض وأسبابه، وحاجات كتير تتعلق بيه، وده اللي دفعه إنه ينشر فيديو على إنستاجرام بيتكلم فيه عن مرض البهاق وازاي خف منه زي ما ناس كتير بدأت تسأله مؤخرًا، خاصةً بعد تنمر ناس كتير عليه.
كلام مش عن الفن
رامي ظهر في الفيديو، واتكلم بمنتهى الصدق وقال: “أنا مش بحب أتكلم في حاجة غير الفن، بس بتوصلني أسئلة كتير جدًا عن علاج البهاق، ودائمًا أرد عليهم في الرسائل الخاصة، الناس بتقولي خفيت ازاي، عاوز أقول لهم إني ما اتعالجتش من البهاق، لكن أنا اتعالجت نفسيًا من الأثر النفسي له بدعمكم ليا، كل الناس دعموني، من أصدقائي في الوسط الفني، وأهلي، والبهاق طلع ميزة مش عيب، لأني شفت بسببه حب كبير، البهاق موجود في كل جزء في جسمي”.
الشفاء الحقيقي
رامي خلال الفيديو بدأ يشاور على مناطق في وشه وإيده وقال: “زي ما انتم شايفين، البهاق مالي إيديا ووشي، وفي كل حتة في جسمي، وأنا زمان كان لو في نقطة في جسمي باقعد أراقبها، وكنت بابقى حزين جدًا وزعلان، خصوصًا إن كان فيه ناس في البداية فاكرينه معدي وكانت بتخاف تسلم، ولكن الحقيقة البهاق مرض مناعي، العلم ما لاقاش ليه علاج لحد دلوقتي، ما زال البهاق في ايدي وجنب شفايفي وجنب عيني، الشفاء الحقيقي منه هو الشفاء النفسي. عايز أقول لكل أم ابنها عنده بهاق، هو ما عندهوش مشكله بس انتي لازم تربيه إنه ولد عنده ميزة ربنا ميزه بيها والميزة دي حاولي تقنعي كل اللي حواليه بيها”.
ضرب رامي المثل بنفسه وقال “أنا مغني والشكل جزء من شغلي، بس بسببكم بقيت شايف إنها ميزة. أنا لما كنت باصور بوستر ألبومي اللي هينزل، المصور بتاعي قال لي إيدك فيها حتة باينة، قلت له سيبها لإن ده مش عيب واللي شايف ده عيب ما يهمناش. احنا يهمنا التلاتة أربعة اللي حوالينا وبيحبونا، البنت اللي بتقول أنا عندي بهاق وداخله على خطوبة أو جواز، وخايفه عريسي يسيبني. أنا أهو باقول لك، ما تكمليش معاه لو مش قابلك لأن مشاكل الدنيا أكبر بكتير من شوية ألوان في جسمك. أنا باقول لك ما تتجوزيهوش لإنك مميزة، مفيش عندك مشكلة، وممكن أقول لك إنه بياض قلبك بان على جسمك”.
اقري كمان: على طريقة رامي جمال صقف وعمري ما وقفت
رسالة رامي لمرضى البهاق
في نهاية الفيديو، رامي وجّه رسالة لمرضى البهاق في كل مكان وقال لهم: “حبوا نعم ربنا، الألوان دي انتم مميزين بيها. والله اللي عنده بهاق ده مميز، والله أنا بقيت سعيد جدًا وانتم حررتوني وأسعدتوني بدعمكم”.
التعليق باستخدام حساب فيس بوك