مين فينا ماشافش الشيف بوراك اللي فيديوهاته منتشرة على الفيسبوك وإنستجرام ووصل كمان لفيديوهات الواتس آب، الشيف بوراك أوزديمير تركي الجنسية من أصول سورية وعنده مطعم مشهور اسمه المدينة. والشيف بوراك حقق نجاح وشهرة واسعة خصوصًا بعد فيديوهاته اللي بينشرها على إنستجرام وإشتهر في فيديوهاته دايمًا بإبتسامته وأكلاته اللي غالبًا بتكون عبارة عن حاجات بيحشيها أو حاجات ضخمة زي أطول سيخ كباب ممكن تشوفه وأكبر ساندوتش برجر أو أكبر مصاصة اتعملت.
بس يا ترى ايه السر الفظيع ورا إنتشار فيديوهات الشيف بوراك التركي؟
النظرة والإبتسامة
مفيش ولا فيديو ولا صورة بيتصورها الشيف بوراك إلا ولازم نشوف إبتسامة عريضة من الودن للودن ونظرة ثابتة حتى وهو بيقطع بالسكين وساعات كمان بيقطع بالساطور وهو باصص للكاميرا بنظرة كلها فخر وإعتزاز وفى الحقيقة عنده ثبات إنفعالي رهيب إنه يفضل محتفظ بنفس إبتسامته والنظرة حتى لو بيقطع ومش خايف إنه يتعور أو يطير صباع وده دليل على مهاراته العالية فى التقطيع، بالرغم من الإبتسامة دي الإ إنه اثار جدل رهيب لما ظهر فى فيديو وهو مكشر والناس إستغربت جدًا وكانوا بيحاولوا يلاقوا أسباب ونظريات للتكشيرة والبعض فسرها بإنه مش بيستمتع بتقطيع الخس زي ما بيستمتع بحشو وتقطيع بطة وناس تانية علقت بإنه حسدوه على ضحكته.
مش محشي والسلامة
اشتهر بوراك في فيديوهاته بمهاراته في عمل المحشي زي محشي الورق عنب بشكل جديد والحلة الضخمة بتاعت المحشي اللي بيقلبها بكل سرعة ومهارة من غير ما ولا محشياية تقع ولا أكنه بيقلب بان كيك.. بس مهاراته في المحشي مش مقتصرة على المحشي وخلاص، بوراك طور من نفسه وبقا تقريبًا بيحشي كل حاجة زي الخروف بقا يحشيه محشي كوسة وورق عنب والنعامة اللي حشاها ورق عنب ومحشي فلفل.
النجاح والتواضع
بس هل الشيف بوراك مجرد شيف بيبتسم وعنده مهارات فى التقطيع والمحشي وخلاص؟ في الحقيقة الشيف بوراك إثبت إنه بالرغم من صغر سنه إلا إنه بقا من أشهر الشيفات حوالين العالم وكتير من الفنانين العرب والأجانب بيروحوا عشان يزوروا مطعم المدينة بتاعه زي الفنانة إليسا و آروى وديانا حداد وحسين الجسمي، وبالرغم من شهرته الإ إنه بيتميز بالتواضع وبيحرص دايمًا إنه يتصور مع كل رواد المطعم بتاعه وخصوصًا الأطفال إللي بيحبهم كتير وبيحب يلاعبهم بس فى الحقيقة صور الأطفال بتبين قد إيه هما بيبقوا خايفين ومعجبينه بيهزروا معاه إن الاطفال بتبقى خايفة لا يعملهم محشي.
لو من بتحبي الشوفان شوفي هنا .. 7 طرق صحية لأكل الشوفان على الفطار
الأعمال الخيرية
لما سألوا بوراك فى فيديو الأكل اللي بتعمله ده كله فين بيروح، قالهم إنه بيحرص دايمًا إن كل الشباب اللي بيشتغلوا فى المطعم ياكلوا من كل حاجة بيعملها ولما الأطفال كانوا نفسهم فى كنافة زارهم بنفسه وعمل لكل أطفال المدرسة كنافة زي ما أتمنوا، ودايمًا بيعمل أعمال خيرية زي زيارة بيت المسنين يوم عيد الأم وتقديم الهدايا ليهم أو زيارة مدرسة للأطفال وتقديم الهدايا المختلفة والملابس، وعزومة ذو القدرات الخاصة عنده فى المطعم وكمان إهتمامه بالبيئة وزرع الأشجار المثمرة عشان يحافظ على بيئة بلده.
طريقة عمل شرائح القرنبيط بالجبن
يا ترى الشيف بوراك ساب ايه وماحشاهوش؟ مستنيين نعرف الفيديو الجاي هيعمل إيه.. خير اللهم اجعله خير!
التعليق باستخدام حساب فيس بوك