الناس اللي تعافت من كورونا تصوم ولا لأ؟ عمومًا الصيام لمريض الكورونا هو السؤال المتجدد كل سنة من وقت تفشي الفيروس نهاية 2019 ولحد دلوقتي. والأسئلة دايمًا عن فتوى الصيام وكورونا، ووضع الصيام مع مريض كورونا لدرجة إن جوجل قرب ينطق من كتر السيرش عن صيام مريض الكورونا في رمضان 2021 أو حتى صيام مريض الكورونا اللي لسه متعافي.
أثر الصيام على الإصابة بكورونا
زي دلوقتي السنة اللي فاتت، كانت الأسئلة كتير جدًا عن أثر الصيام على الإصابة بكورونا، وهل الامتناع عن الطعام والشراب طول النهار ممكن يأثر على المناعة، وبالتالي يكون سبب في الإصابة بكورونا؟ لكن منظمة الصحة العالمية قطعت الشك باليقين، وقالت بشكل واضح من خلال مكتبها في الشرق الأوسط واللي نشر على الصفحة الرسمية للمكتب على تويتر إن مفيش دليل على إن الصيام ممكن يزود خطر الإصابة بمرض كوفيد 19، وإن المهم فعلًا هو المحافظة على الإجراءات الصحية المتعارف عليها زي الكمامة، والمسافة الآمنة اللي ما تقلّش عن متر، وتجنب الأماكن الزحمة، والمحافظة على آداب العطس والكحة، يعني تكون في منديل أو في دراعنا وغيرها من الإجراءات الاحترازية.
السؤال السنة دي مختلف، لأن نسب المتعافين من كورونا كبيرة جدًا، 156574 حسب آخر إحصائيات مصرية لحظة كتابة المقال.
الصيام لمريض الكورونا وهل يصوم المتعافون من كورونا؟
د/علاء عوض أستاذ الكبد والجهاز الهضمي – الصيام لمريض الكورونا
طيب الشخص السليم وعرفنا إنه ممكن يصوم، والمريض معاه عذره، لكن المتعافي من كورونا هل يقدر يصوم؟ إجابة السؤال ده لاقيناها عند الدكتور علاء عوض، أستاذ الكبد والجهاز الهضمي والأمراض المعدية، واللي قال لنا إنه قرار الصيام من عدمه بالنسبة لمريض كورونا يتوقف على مدى الإصابة، وحدود الفترة الزمنية للمرض وشدته.
يعني لو الأعراض خفيفة والشخص المتعافي ما عندهوش مشاكل، فالصيام ممكن، أمّا في الحالات الشديدة، فغالبًا المريض بيمر بفترة إرهاق ممتدة نسبيًا بتتطلب شرب سوايل كتير جدًا ونظام غذائي صحي. وفي الحالة دي، الصيام مش هيكون مناسب للشخص اللي حالته تتطابق مع الوصف ده.
دكتور علاء عوض أكّد بشكل واضح إنه الحالات اللي كانت أعراضهم بسيطة، مفيش مشكلة بالنسبة لهم مع الصيام بعد التعافي.
اقرأي أيضا: تعليم الأطفال الصيام ..إزاي أعود أولادي على الصيام
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك