محتويات المقال
أوقات وابني صغير شوية، كنت أبقى قاعدة جنبه وهو نايم، أسمع صوت سنانه كإنها بتتكسر من كتر الجز عليها، والحقيقة كنت باتفزع وباخاف عليه، وساعات كنت باصحيه من النوم اتطمن. وبعدين، اكتشفت إن ده من المشاكل المنتشرة والمعروفة بين الأطفال. عشان كده، في مقال النهارده، أخدنا رأي دكتور أحمد عصام (أخصائي طب أسنان الأطفال، وعضو الجمعية المصرية لطب أسنان الأطفال وذوي الاحتياجات الخاصة) وسألناه عن الضغط على الأسنان أثناء النوم عند الأطفال إيه سببه وإيه حله.
اعرفي من هنا أسباب تأخر التسنين عند الأطفال
أسباب الضغط على الأسنان أثناء النوم
دكتور أحمد قال لنا إن فيه أسباب كتير، من أهمها:
- الضغط العصبى أو النفسي (مشاكل أسرية أو عنف أسرى أو مشاكل في المدرسة)
- بعض أمراض الجهاز الهضمي
- اضطرابات هرمونية
- سوء التغذية، وده بيؤدى لنقص عناصر مهمة لانبساط العضلات، زي الكالسيوم والمغنيسيوم
- الأطفال كمان اللى بتتنفس من بقها وهي نايمة نتيجة تضخم اللوز
- وممكن السبب يكون من الاسنان نفسها لو فى مشكلة في وضعها وعددها مع مساحة الفك.
اعرفي علامات التسنين عند الأطفال وطرق تخفيف الألم
إيه أعراض الجز على الأسنان؟
دكتور أحمد قال إنه غير طبعًا الصوت اللي بنسمعه من احتكاك أسنان الطفل ببعض أثناء النوم، بيظهر كمان على هيئة ألم في الودان، وأوقات تآكل في طبقة المينا للأسنان، وألم في عضلات الفكين، وفي بعض الحالات كمان بيسبب الصداع.
سألنا دكتور أحمد هل ده ممكن يأثر على صحة الأسنان اللبنية أو الدايمة؟
طبعًا بيأثر لإنه بيؤدي لتآكل طبقة المينا من على الاسنان فـبتضعف وتكون حساسة وتكون عرضة للكسر أو التسويس والفقدان المبكر، بيأثر كمان على مفصل الفك وحركة الفتح والغلق الطبيعية.
طيب إيه العلاج؟
مفيش علاج معين بعينه لكل الحالات كل حالة، لازم نعرف سبب الجز ونعالجه ونمشى على بروتوكول مع دكتور الأطفال وفيه حالات مع النمو بتخف بدون تدخل. لكن عمومًا فيه نقط علاجية زي:
- تقليل الضغط النفسي على الأطفال
- الاهتمام بالتغذية السليمة والفيتامينات والمعادن
- شرب مياه بكميات كافية
- بلاش الطفل اللي بيجز على أسنانه ده ياكل لبان أو نواشف
- لو اتدخلنا، بنعمل جهاز نايت جارد لحماية الاسنان أثناء النوم وفي الحالات المتقدمة بنضطر لحشو الأسنان وتغطية الضروس الخلفية بتيجان أو طرابيش للأطفال
إمتى أقلق واطلب المساعدة وإمتي لا؟
أي طفل اتلاحظ إنه بيجز، لازم يزور دكتور أسنان الأطفال كل 3 شهور للمتابعة والوقاية وتحديد بروتوكول بسيط وسهل للعلاج.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك