بمجرد ما تتأكدي من خبر الحمل، وبعد ما تبلغي كل اللي بتحبيهم بالخبر ده، بيجي دور إختيار الطبيب أو الطبيبة اللي هتابعي معاها رحلة الحمل شهر بشهر، وهنا بتيجي الحيرة، خصوصا لو إنتي معندكيش طبيب خاص بيكي وعارف تاريخك الطبي. بصراحة الموضوع مش سهل، وفيه حيرة كبيرة، وخصوصا إن الأسماء المشهورة كتيرة جدا، ولو إنتي أم لأول مرة فالموضوع محير أكتر وأكتر لأنك بتحسي إنك مش عارفة إنتي بتدوري على إيه تحديدا، علشان كدة هنكتب لك فيه شوية نصائح تقدري تعتبريها خطوط عريضة لطريقة اختيار الطبيب المناسب لمتابعة الحمل بيحيث يريحك ويصاحبك في رحلة الحمل.
نصائح لأختيار الطبيب المناسب لمتابعة الحمل
- طبيب ولا طبيبة:
كتير من السيدات بيفضلوا متابعة الحمل مع طبيبة، واللجوء إليها في وقت الولادة، وده بيكون بسبب الرغبة في تجنب الشعور بالكسوف من كشف طبيب رجل عليها، عموما النقطة دي بتخضع في المقام الأول لراحة كل سيدة، فإنتي بس اللي تحددي اللي يريحك ويحسسك بالثقة.
- اختاري القريب من بيتك:
سواء متابعة الحمل مع دكتور في عيادته، أو هتابعي الحمل في مركز أو مستشفى متخصصة، فالأفضل تختاري الأقرب لبيتك علشان سهولة الوصول ليها في حالة لا قدر الله إحتاجتي لأي ظرف طارئ تروحي ليها وإنتي لوحدك يكون الموضوع سهل، ده غير إن من المهم تسألي على جروبات سواء الفيسبوك أو الواتس أب عن أسماء أشهر الأطباء في المنطقة الي إنتي ساكنة فيها وتختاري منهم اللي تتابعي معاه وده طبعا بعد ما تجربي وترتاحي معاه.
- اسألي اللي سبقك في الحمل في العيلة:
أكيد هتلاقي في عيلتك ووسط أصدقائك وحتى زمايلك في الشغل اللي سبق ليها الحمل، روحي لهم واسئليهم عن أفضل الأطباء اللي راحوا ليهم وكانوا مريحين في التعامل، تبادل الخبرات في المواقف دي بتكون إيجابية جدا.
- اختاري الطبيب المناسب لميزانيتك:
فترة الحمل فترة طويلة، وبتحتاج لمتابعة مستمرة وخاصة لو حالة الحمل صعبة اللي بتحتاج زيارات دورية ممكن توصل لكل أسبوع، وده طبعا غير لتحاليل الطبيبة والإشاعات المختلفة، وده حقيقي بيكلف كتير خاصةلو إنتي معندكيش تأمين صحي،علشان كدة من المهم اختيار المركز الطبي أو المستشفى أو عيادة طبيب خاصة حسب ميزانية زوجك.
- خبرة وسمعة الطبيب المتابع للحمل:
سمعة الطبيب وخبرته الطبية نقطة مهمة ورئيسية في اختياره، فإنتي محتاجة حد عنده خبرة وقدرة على التعامل مع أي ظرف صحي طارئ ليكي أو للجنين، حقيقي مافيش مجال للخاطرة في الفترة دي، علشان كدة من المهم جدا تختاري اللي تتأكدي من إحترافيته وخبرته.
- حالة حملك بتحدد طبيبك:
أوقات إختيارك لطبيب متابعة الحمل مش بتكون رفاهية، إنما الحالة الصحية ليكي أو للجنين أو ليكم إنتوا الإتنين بتحتم عليكي إختيار طبيب أو طبيبة نساء متخصص في الحالة دي، يعني هتحتاجي تختاري استشاري صاحب خبرة كافية لمتابعة الحمل.
- اتأكدي من سهولة التواصل معه في أي وقت:
ضروري جدا إن يكون في إمكانية لسهول التواصل مع طبيب النساء الخاص بيكي في أي وقت، علشان إنتي بتكوني مش عارفة المفجأة ممكن تيجي أمتى، ده غير الحاجة إنك تسألي عن مثلا إمكانية السفر أو تناول أنواع معينة من الأكل أو الأدوية. لو ظهرت عليكي مثلا أي أعراض أثارت جواكي مخاوف من المهم إنك تقدري تتواصلي مع طبيبك في أسرع وقت .
- اسأليه عن المستشفيات اللي بيتعامل معها:
سؤال مهم جدا إنك تعرفي فين المستشفى اللي بيتعامل معاه الطبيب، ومستوى نظافتها، وجودة الرعاية الطبية والتمريض إذ يجب أن وإن المستشفى تكون قريبة منك، علشان تقدري تروحي لها في اي وقت.
- اختاري اللي بيشجع الولادة الطبيعية:
أكيد حالتك وحالة الجنين هي اللي بتحدد إذا كان ينفع لك ولادة طبيعية ولا قيصرية، لكن فيه بعض الأطباء اللي بتعاملوا مع اختيار الولادة القيصرية كإختيار أول وأسهل وطبعا مربح أكتر بدون أي حاجة طبية للإجراء ده، بننصحك تبعدي عن النوعية دي من الأطباء، واختاري اللي عنده أمانة وياخد معاكي الخطوة اللي تناسب حالة حملك.
تقدري تقولي إن دي أهم النصائح الخاصة بموضوع إزاي تختاري طبيب متابعة حملك، من المهم ترتاحي نفسيا ليه، تسئليه على كل اللي عايزة تعرفيه، لا تعتمدي على جروبات الفيسبوك، لأن كل حالة ليها ظروفها الخاصة، دايما اكتبي كل اللي عايزة تعرفيه في ورقة واتناقشي مع طبيبك بدون إحراج لحد ما فترة الحمل تعدي على خير وتقومي إنتي والجنين بألف سلامة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر
www.healthline.com
www.nectarusa.com
www.sevenminerals.com
التعليق باستخدام حساب فيس بوك