محتويات المقال
ليه دايمًا بيتقال على الطفل الوسطاني إنه مظلوم؟ مع إننا لو ركزنا في تصرفاتنا كأ0هالي هنلاقي نفسنا بنعامله زيه زي إخواته عادي، لا كمان غالبا بيكون شخصيته قوية وواخد حقه بزيادة. طيب يا تري الطفل الأوسط فعلًا حقه مهضوم ولّا هو واخد حقه بزيادة ولّا محدش حاسس بيه ولّا إيه نظامه؟
متلازمة الطفل الأوسط
الطفل الوسطاني بيبقى أصلًا الطفل الأصغر وقاعد في أمان الله! فجأة يلاقي ضيف جديد هلّ على البيت وهو اتزحزح من مكانه بقى لا طايل سما ولا أرض.
الباحثين بيسمّوا حالة الطفل الوسطاني بـ “متلازمة الطفل الأوسط” وبيقولوا إنه حتى لو كنا مركزين في العدل بين ولادنا، ترتيب الطفل وسط إخواته بيحتم عليه وعلينا وضع معين. بمعنى إنه لا بيكون طايل الدلع الكبير اللي بيتقدم لآخر العنقود والتغاضي عن غلطاته عشان بالنسبة لنا صغير دايمًا. ولا كمان بيكون طايل الثقة الكبيرة والمسؤولية اللي بتتقدم للطفل الأكبر وأول فرحتنا.
وده طبعًا بيأثر على سلوكياته اللي بتبان في محاولة الظهور وإثبات نفسه أوقات كتير بطريقة غلط. لكن زي ما لها آثار سلبية، فلها كمان جانب إيجابي كبير على شخصية الطفل المسؤول زي إنه بيبقى معتمد على نفسه أكتر وبيتعلم المرونة والتعايش بصورة أكبر نتيجة لترتيبه وسط إخواته. ده غير إنه بيبقى أكتر إخواته عنده ذكاء اجتماعي وبيقدر يكوّن أصحاب بسهولة. طبعًا مع اختلاف الفروق الفردية بين الأطفال.
ازاي اتأكد إن الطفل الأوسط مش مظلوم وسط إخواته؟
قضّي مع طفلك وقت خاص بيكي وبيه هو بس من غير إخواته ومن غير شاشات، تلعبوا وتتكلموا سوا ويحس فيه بأهميته عندك وتركيزك معاه.
-
ممتلكاته:
بلاش يكون بديهي إن لبسه وممتلكاته تروح للصغير، وهو ياخد أوتوماتيك حاجات أخوه الكبير. من حقه تستأذني قبل ما حد من الأخوات ياخد حاجة التاني، ومن حقه كمان يكون له ممتلكات جديدة جاية باسمه.
-
المسؤولية:
في الغالب الطفل الوسطاني بيكون مندفع ومتهور حبتين وبيكون اعتمادنا الكلي على الكبير الهادي الراسي. حاولي تعتمدي عليه أكتر وتساوي بينه وبين الكبير في المسؤوليات والثقة بالذات لو الفرق بينهم مش كبير.
-
المقارنة:
اوعي تقارني بين حد من ولادك لإن ده بيخلق شعور تنافس وغيرة كبير بينهم بدل ما يكون تحفيزي ليهم.
-
وقت الخناقات:
مهم الأول تتأكدي إن مش معني إن الإخوات بيتخانقوا إن كده هم مش بيحبوا بعض، ومهم كمان نركز إننا بتدخلنا ما نكونش بنظلم الطفل الوسطاني ونجبره على التنازل مرة عشان “إنت الكبير” ونسكت الصغير على حسابه، ومرة تانية عشان “إنت الصغير” ونرضي الكبير على حسابه برده.
التعليق باستخدام حساب فيس بوك