بنتي دراما كوين \ ابني بيزن أكتر ما بيتكلم \ بتعملوا إيه مع الطفل الزنان \ العيال مش بتبطل زن غير لما أعمل لهم اللي عايزينه
أهالي كتير قوي بيشتكوا من الزن المتواصل اللي بلا هدف والغريب إنه سلوك مش مرتبط بسن معين، يعني ممكن يبقى 3 سنين وزنان وممكن يبقى 10 سنين وطفل زنان برده عادي جدًا. طيب يعني نروح فين ولّا نيجي منين ولاّ نعمل إحنا إيه في وصلة الزن والدراما اليومي الذي لا ينتهي!
هنا ممكن تشوفي ذكاء الأطفال والمذاكرة: “ابني ذكي .. بس مش بيذاكر”
تعالوا الأول نعرف أسباب تخلي الطفل زنان؟
علم النفس “الأدلري” للطبيب النفسي ألفرد أدلر، واللي بتقوم على أساسه التربية الإيجابية بيقولنا إيه بقي؟ إن كل سلوك بيعمله الطفل وراه سبب معين، وإذا عرف السبب بطل العجب. يعني الطفل الزنان ده مش خلقة ربنا أو حبًا في الزن. الطفل الزنان بيزن عشان هو ما يعرفش طريقة غير دي للتعبير عن نفسه ولتنفيذ اللي عايزه. وغالبًا الزن بيزيد لما أهدافه من الزن بتحقق، زي إننا ننفذ للطفل الحاجة اللي عايزها عشان نخلص من الزن. أو إننا نزعق ونعاقب على الزن، فبالتالي يبقى دي الوسيلة الأسهل للفت نظرنا أو استفزازنا.
طيب لو ابنك بيكدب ممكن تشوفي .. الكدب عند الأطفال: ابني بيكدب كتير .. الأسباب والعلاج
طيب نتصرف إزاي مع الطفل الزنان عشان يقلل زن؟
-
بدلي كلمة “لا”
بالنسبة للطفل كلمة لا ده مش مبرر كافي إنه مايطلبش نفس الطلب تاني! ومش مبرر برده إنه ما يعملوش. فبدل ما تقولي “لا” وبس ممكن تردي بطريقة تخل~ي الطفل يفكر ويشوف بديل زي “أه اللعبة حلوة أوي ممكن نحوش سوا وتجيبها”\ “الفلوس اللي معايا دلوقتي للحاجات الأساسية في البيت تعالى نحسب إمتى نقدر نجيبها”.
-
ارفضي الزن من غير زعيق:
لإن الزعيق هيوصل للطفل إنه عرف يستفزنا أو يضغط علينا بالطريقة دي، فأول ما يحب ينفذ اللي في دماغه هيزود الزن على أمل إننا نستسلم. فبدل ما نزعق على الزن المتواصل، نقول بطريقة واضحة “أنا باتوتر من الزن ممكن لما تهدي نتناقش سوا”\ “أنا مش بافهمك كويس في الزن ممكن نتكلم لما تخلص”.
-
ما تنفذيش الطلب:
مهما حصل بقى، اوعي تنفذي له أو تنفذي لها طلبها وهي بتزن عشان زهقتي أو عشان نخلص، لإن ده لو حصل مرة بيدي للطفل إشارة إن ده أنجح طريقة للتواصل والوصول للهدف.
-
اسألي:
اسأليه أسئلة تخليه يفكر في طريقة مختلفة للتعبير عن نفسه، “إنت عارف أنا مش باقدر أتكلم وإنت بتزن ممكن نعبر عن نفسنا ازاي بطريقة أوضح” \ “ممكن تطلب مني ده بطريقة مختلفة ازاي عشان نقدر نتفق سوا؟”
-
ما توصميش الطفل:
ما تحطيش label على الطفل زي “يا زنان” أو “يا عيوطة” لإن ده هيخليه يقتنع أكتر إنه ما يعرفش يعبر عن نفسه غير كده.
والأهم بقى في كل ده هو الثبات على الموقف والاستمرارية، لما يبقى رد فعلك ثابت كل مرة تجاه الزن المبالغ فيه وإصرارك إنه يعبر عن نفسه بطريقة مختلفة عشان تتفاهموا بس من غير ما تتعصبي. ده هيوصل للطفل إن الزن مش هيفيد بحاجة، وهيبدأ يدور من نفسه على بدايل.
التعليق باستخدام حساب فيس بوك