محتويات المقال
العقم الثانوي هو حالة طبية وهي عدم قدرة الست على إنها تخلف بالرغم من إنها حملت وخلفت مرة قبل كده، وبيكون في صورة واحدة من حالتين: إما إنها ما بتقدرش تحمل مرة تانية أو إنها ممكن تحمل لمرة تانية لكن الحمل ما بيكملش وينتهي بإجهاض. في المقال ده، هنكلمك عن أهم أسباب العقم الثانوي وطرق التعامل معاه.
أسباب العقم الثانوي:
- واحد من الأسباب راجع للزوج. لو بتجربي كتير تحملي ومش بيحصل حمل، ممكن يكون الزوج حصل عنده خلل في الحيوانات المنوية أو في سرعة وصولها للبويضة.
- إصابة قناة فالوب. في بعض الأوقات وحتى بعد ما بتخلفي مرة، بيحصل مشاكل في قناة فالوب فالحيوانات المنوية بيبقى صعب عليها توصل للبويضات.
- مشاكل التبويض (اللي بتبان في عدم انتظام الدورة الشهرية) ممكن تكون سبب.
- لو حصل مشاكل في الحمل الأول أو في الولادة الأولى غالبًا بيبقى صعب جدًا تحملي تاني أو إن الحمل التاني يكمل للولادة.
- لو سنك كبر عن سن معين أو فيه أدوية معينة أخدتيها بعد الحمل الأول أو وزنك زاد جدًا أو نقص جدًا، فالعوامل دي كلها لها تأثيرها على إمكانية الحمل مرة تانية.
امتى أروح لدكتور النسا عشان أسأله عن العقم الثانوي؟
لو بتمارسي العلاقة الحميمة مع الزوج من غير وسائل منع حمل في أيام التبويض والخصوبة كل شهر وما حصلش حمل لمدة سنة.
إيه أصعب حاجة في العقم الثانوي؟
أصعب حاجة في العقم الثانوي إنك بتبقي في حالة من عدم التصديق والصدمة لأنك بالفعل حملتي قبل كده وخلفتي. كمان لو انتِ حملتي أول مرة بصعوبة، بتكون عندك مشاعر القلق والإحباط واليأس مضاعفة. لو المشاعر دي قوية لدرجة تعطلك عن شغلك أو ممارسة حياتك بشكل طبيعي بننصحك تتوجهي لأخصائي\ة نفسي\ة عشان يساعدك تتخطي الفترة دي.
حضرّي اجاباتك
من أصعب الحاجات في العقم الثانوي برضه هو الأسئلة اللي بتيجي من قرايبك أو أصحابك من “مش هتجيبي له أخ أو أخت؟” أو حتى سؤال ييجي لك من طفلك نفسه عن هو امتى هيكون له أخ أو أخت. في الأوقات دي من الأحس إنك تكوني جاهزة بردود زي: “احنا مكتفيين بطفل واحد” “أنا وباباها مش عايزين أطفال تانية دلوقتي” “ربنا يرزق” أو لو بتكلمي ابنك أو بنتك اللي بيطلبوا أخ أو أخت، ممكن تقولي “انت حلو قوي لدرجة إننا مش عايزين حد تاني دلوقتي” أو “احنا مش متصورين حد ييجي وندلعه ونحبه زيك.”
علاج العقم الثانوي
العلاج هنا بيشبه كتير علاج العقم الأساسي ومنها:
• أدوية رفع الخصوبة زي كلوميد.
• الحقن المجهري.
• في حالة إصابة قناة فالوب فالجراحة لترميم القناة ممكن تكون هي الحل.
• في حالة تكوّن أي زوايد داخل أي جزء من الرحم يمنع من التخصيب، فالجراحة لاستئصال الأورام أو الزوايد دي هو الحل.
التعليق باستخدام حساب فيس بوك