العلاقة الجنسية بين الزوجين، من أهم الركائز اللي بيقوم عليها الزواج، ونجاح العلاقة الحميمة أو الرضى عنها، بيساهم بشكل مباشر في نجاح الزواج، والمفروض إن الراجل والست يحاولوا الوصول لأحسن حالة في العلاقة الزوجية، بس بعد الحمل والولادة بتحصل تغيرات خارجة عن إرادة الطرفين، وده بيأثر بالتأكيد على العلاقة الزوجية، بس مهم تعرفي إيه التغييرات دي عشان تعرفي تتعاملي معاها، فهنقولك على أهم تغيرات في العلاقة الجنسية بعد الحمل والولادة.
5 تغيرات في العلاقة الجنسية بعد الحمل والولادة
-
فروق التوقيت
والتغيير ده خاص بالولادة أكتر من الحمل، لإن في إنسان صغير عايش معاكم دلوقتي، وله احتياجاته ومواعيد نومه، فمش في أي وقت تيجي على بالكم ممارسة الجنس، يبقى بالضرورة هتعرفوا تمارسوه، لازم تكونوا مأمنين احتياجات البيبي من رضاعة وتغيير حفاضة، عشان أكيد مش هتكونوا مبسوطين لو سمعتوه بيعيط أو بيزن فجأة وانتو بتمارسوا العلاقة الحميمة، دي غير إن الزوجة مش هتقدر تكمل وهتقوم تشوف احتياجات البيبي.
في الحمل ممكن يكون في مراعاة للتوقيت بدرجة أقل من ولادة، وخصوصًا في الشهور الأولى اللي بتعاني فيها الحامل من الغثيان الصباحي، أو أي آلام تانية.
-
مكان ممارسة العلاقة الجنسية
أهم مكان تمارسوا فيه الجنس هو المكان اللي الطفل مش موجود فيه، فممكن تلاقوا نفسكم سايبين أوضة النوم للبيبي، وبتدورا على مكان تاني مناسب ليكم في البيت، لإن مهم جدًا نفسيًا إن الطفل لا يسمع ولا يشوف أي حاجة من العلاقة الحميمة، حتى لو بيبي صغير.
ممكن تشوفي هنا هل ممارسة العلاقة الحميمة قبل الولادة الطبيعية مفيد؟
-
الرغبة الجنسية للزوجة
الرغبة الجنسية هي أصلا معتمدة على الهرمونات، والحمل والولادة أكبر حدثين في حياة الست فيهم تغيير جذري في الهرمونات، علشان كده ممكن يحصل تعارض بين هرمونات الحمل والولادة وهرمونات الرغبة الجنسية، فمثلا هرمون البرولاكتين اللي بيسبب إفراز حليب الثدي، بيضعف الرغبة الجنسية عند الست.
هنا إزاي تتصرفي مع زيادة الرغبة الجنسية عند الزوج
-
أوامر الطبيب وموانع تانية
- في حالات كتير بيمنع الطبيب الحامل من ممارسة الجنس، زي التعرض للولادة المبكرة، أو النزيف المهبلي، وحالات طبية تانية بتعتبر الممارسة الجنسية فيها خطر على الحامل أو الجنين.
- بعد الولادة بتكون فترة النفاس أكتر من شهر.
- الولادة الطبيعية واتساع المهبل أو ألم فيه.
-
الأوضاع الجنسية المناسبة للزوجة
- مع الحمل بتتغير الأوضاع الجنسية المناسبة للحامل، وبتتمنع الأوضاع اللي فيها ضغط على بطن الزوجة وعلى الجنين.
- بعد الولادة القيصرية بتكون في أوضاع بتضغط على مكان جرح الولادة وبيسبب ألم للزوجة.
- بعد الولادة الطبيعية واتساع المهبل، في أوضاع بتساعد على تضييق المهبل علشان يسبب استمتاع أكبر للزوجين.
ومهما حصلت تغييرات، افتكري إن لو في صعوبات في العلاقة الزوجية بسبب الحمل والولادة فده كله هيعدي، والبيبي هيكبر وهترجع حياتكم لطبيعتها مع التعود والتنظيم، وإن الحياة العاطفية مع التغييرات دي أهم من العلاقة الجنسية، وبنفكرك إنك لو لقيتي إن التغييرات في العلاقة الزوجية ممكن تهدد حياتكم أو مسببة لكم مشاكل كبيرة، إنك تستشيري المختصين.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك