محتويات المقال
حلم بنات وستات كتير إنهم يخلفوا توأم، لكن اسألي أي أم لتوأم، هتقول لك قد إيه هي تعبت أول .. هنقول .. 25 سنة! العناية بتوأم مهمة صعبة لكن جميلة. وعشان تقدري تشوفي جمالها وتحسيه، هنقول لك النهارده طريقة العناية بالتوأم عشان نساعدك في الجزء العملي ونسيب لك المشاعر والجمال.
التمييز بين التوأم المتماثل
من تحديات العناية بالتوأم في أوائل أيامهم التمييز بين التوائم. أشهر وأبسط طريقة هي الألوان. اشتري الهدوم بلونين مختلفين واشتري كمان الببرونات والتيتينات باللونين دول. بالطريقة دي، مش بس هتميزي بينهم، انتي كمان هتتفادي إنك تأكلي حد فيهم مرتين وحد ولا مرة، أو حد فيهم يعدي التاني وهو تعبان.
تقسيم الاهتمام بالتساوي
- أكيد مش من أول يوم هتقدري تقسمي انتباهك واهتمامك بين طفلين. فطبيعي إنك تحسي إنك مايلة لواحد فيهم خاصةً لو واحد فيهم فضل في الحضانة وقت أكتر من التاني.
- مهم تتفقي انتي والأب على وقت مخصص لكل واحد فيكم مع واحد من التوأم، بالطريقة دي تضمني إنكم انتم الاتنين هتقدروا تدوا الاهتمام والانتباه للتوأم بالتساوي.
- وانتي بترضعي كل توأم، رضعيه لوحده (سواء رضاعة طبيعية أو صناعية)، وبصي له كويس، وامسحي راسه والمسي إيده. ده هيقرب بينك وبين كل واحد من التوأم.
- يستحسن وقت التغيير، كل واحد يغير لحد، انتي والأب، وغنوا لهم واضحكوا مع بعض ومعاهم.
نوم التوأم
طبعًا نوم الرضيع عمومًا ويومك المقلوب بيسببوا مشكلة لكل أم جديدة. اضربي ده في اتنين بقى! بس السبب مش بس زيادة العدد، خالص. فيه أسباب علمية وموضوعية:
- التوائم عمومًا غالبًا بيتولدوا بدري، وعشان كده، ممكن يقضوا فترة في الحضّانة فبيتعودوا على الإحساس باللمس والإرضاع المتكرر. لما بيروحوا البيت، بيبقى واحشهم اللمس والرضاعة دول، ومش عايزين يناموا إلا بالطريقة دي.
- لو واحد من التوأم في الحضّانة والأم بتروح له، فصعب تعمل روتين نوم للتوأم التاني.
- معدة الأطفال الرضع وخصوصًا الخدج بتكون صغيرة جدًا، فهيحتاجوا يرضعوا كل ساعتين أو تلات ساعات. وده مش بيخلص قبل الشهر السادس.
- لو واحد منهم صحي مفزوع، لازم تريحيه بسرعة قبل ما يصحي التاني.
ازاي تظبطي نومهم؟
- لازم نومهم يكون وضعيته آمان، نيميهم على ظهرهم والقدم لامس السرير.
- حاولي ما يعرقوش في السرير، خصوصًا لو نايمين في سرير واحد.
- لازم النوم يكون في ميعاد محدد كل يوم.
- لو بيناموا في سرير واحد، وحركة واحد فيهم بتصحي التاني، جربي تفصلي بينهم.
- لما ترضعي واحد فيهم بالليل، رضعي التاني بعدها على طول عشان ما يجوعش واحد فيهم قبل أو بعد الأول بكتير.
المصدر
التعليق باستخدام حساب فيس بوك