محتويات المقال
الغيرة من أكتر المشاعر اللي بنحس بيها في حياتنا عمومًا، وهو شعور إنساني طبيعي. بس المشكلة لما تتحول لوضع مرضي مدمر، وده ممكن يحصل في كافة أشكال العلاقات. بس احنا النهارده هنتكلم عن الغيرة في الزواج. وبشكل محدد أكتر: وضع الزواج مع زوج عصبي وغيور. حقيقي الوضع ممكن يتحول لجحيم، ولو ما تمش علاجه في الوقت المناسب، يبقى الجواز ده في طريقه للانهيار. وعمومًا أي شعور سواءً إيجابي أو سلبي بين الأزواج لو خرج عن معدله الطبيعي واتحول لمرضي، ولم يتم تداركه في الوقت المناسب، يبقى انهيار الجواز هيكون نتيجة حتمية جدًا.
سبب المشاكل
الأبحاث والإحصائيات أكدت إن تلت الأزواج اللي بينهم مشاكل زوجية بيكون سببها الغيرة الشديدة. الغيرة في عمومها وبشكلها المنطقي شعور بيأكد على وجود عاطفة ومحبة قائمة بين الطرفين. لكن لما بتزيد عن حدها، ممكن فعلًا تؤدي إلى تصرفات خطيرة ومرضية زي المطاردة والمراقبة وحتى العنف الجسدي.
الفرق بين الغيرة الطبيعية والشديدة
وعلشان تفهمي حدود الوضع القائم في حياتك، لو انتي حاسة إن فيه مشكلة غيرة موجودة في حياتك الزوجية، لازم تعرفي الفرق بين الغيرة الطبيعية (ودي اللي هتحتاجي تتعاملي معاها بشكل عادي وبدون قلق) وبين إن عندك مشكلة مع زوج غيور غيرة شديدة ومرضية، وبالتالي لازم وقفة وطلب مساعدة مختص.
الغيرة الطبيعية
الغيرة الطبيعية بتتاخد دايمًا في صورة إنها عامل محفز لعلاقة حلوة موجودة فعلًا، وبتخلي الطرفين يعرفوا قيمة بعض عند بعض. لما بتظهر عند طرف، بتحسس الطرف المقابل إنه لسه له قيمة ومكانة مهمة خلت الطرف الأول يحس بالتهديد وبالتالي الغيرة. وأوقات كتير بتعتبر حتى محفز لإعادة الدفء للعلاقة الحميمة بين الزوجين. وأكتر ما يميزها إنها بتخلي الزوجين يقعدوا مع بعض ويتناقشوا بهدوء وبشكل منطقي للوصول للحل الوسط اللي بيرضي الطرفين.
الغيرة غير الطبيعية
هنا بندخل في مجال الخطر، لأن الغيرة الشديدة أو غير الطبيعية بتكون علامة واضحة إنك داخلة علاقة مسيئة. والسمة العامة للزوج الغيور – بما إننا بنتكلم عن الزوج الغيور والعصبي – إنه بيكون شخص عواطفه مضطربة وإحساسه بالثقة تجاه نفسه وتجاه شريكته منخفضة جدًا. فيبدأ يستخدم قوته وسلطته في التحكم في شريكة حياته، وممكن يوصل للعنف اللفظى وأوقات للعنف الجسدي للأسف. علماء النفس قالوا إن الراجل الغيور جدًا بيكون بيعاني من خوف مرضي من الفقد أو الهجران بجانب قلق شديد إنه ممكن يكون مش محبوب بالشكل الكافي عند زوجته. وبتتميز الغيرة الشديدة دي بكذا نقطة.
- ظهور علامات بارانويا أو جنون عظمة في كل اللي بيعمله.
- طلب كشف حساب عن كل خطوات زوجته.
- إظهار خوف وإحساس بعدم الامان بشكل غير عادي.
- التوهم بحدوث قصص وهمية في دماغه هو وتصديقها والتعامل على أساسها.
- الشك المبالغ في سلوك الزوجة والتشكيك في نواياها ورا أي تصرف بتعمله.
- مطاردة الزوجة في أماكن عملها وخروجها ومراقبتها.
- التعدي الشديد على حرية شريكته، وأوقات حرمانها من أصدقائها وأهلها
- تفتيش الإيميلات بتاعتها والموبايل وحسابات التواصل الاجتماعي بتاعتها، وهو متوقع إنه هيلاقي دليل على خيانتها في النص.
نصائح
- دوري على سبب الغيرة
مهم جدًا تدوري على سبب نشوء الغيرة دي بينكم، هل سببها مثلًا إنكم مش بتقضوا وقت أكتر مع بعض؟ فبالتالي شعور زوجك بالخوف وعدم الأمن ظهر بسبب كده. انتي عندك أولويات سابقة تواصلك معاه؟ انتي محتاجة تقعدي معاه وتتكلمي وتسمحي له يتكلم بحرية علشان تحطي إيدك على أساس المشكلة.
- اخلقي جو من الثقة المتبادلة
لا يمكن للغيرة إنها تبقى سمة عامة للعلاقة طالما وجدت ثقة دائمة التطوير بين الطرفين. وده مش بيتم غير لما الطرفين يكونوا جديرين بالثقة محدش فيهم بيلجأ للكدب أو زي ما بنقول للف والدوران.
- طوري من التواصل بينكم
احرصي دايمًا على خلق وقت للتواصل مهما كان يومكم مشغول. في الأول والآخر علاقتك بزوجك من أهم أولوياتك خلال اليوم. وده عن طريق خلق مجالات مستمرة للكلام. الزواج أكبر وأقوى من التشارك في الحياة تحت سقف بيت واحد. لازم يكون التشارك يكون على المستوى الوجداني الأول قبل كل شيء. وفي نفس الوقت، لو حطيتي إيدك على مواضع إثارة غيرة زوجك الشديدة وقدرتي تتجنبيها بالشكل غير المهين ليكي فلازم تتجنبيها بصدق وحب.
- إعرفي وحددي إذا كانت الغيرة دي مؤذية
عرفتي في الجزء السابق من المقالة امتى تكون الغيرة طبيعية وامتى تكون مؤذية. حددي نوع الغيرة وبناء عليها وقفيها واتكلمي مع جوزك.
لو جربتي الطرق السابقة دي وما كانش فيه منها نتيجة، ما تتأخريش عن طلب مساعدة من مستشار علاقات زوجية، طالما انتي وزوجك متفقين على استمرار علاقتكم الزوجية.
التعليق باستخدام حساب فيس بوك