زمان، كنت باحاول اتجنب أي أكلة فيها خضرة الكزبرة والبقدونس والشبت عشان حقيقي لو رحت عند الخضري كنت باتهان، مش عشان هي أكلة صعبة وكده، لأ عشان ما كنتش باعرف الفرق بينهم D: كل الخضرة دي باحسها حصل لها استنساخ عشان كلهم يبقوا شبه بعض زي الأستاذ حسين ومصطفى فهمي وعلي جابر، فيها روح شريرة تخليك تشوفهم واحد زي ما بنشوف كل الرجالة واحد زي مصطفى أبو حجر، بس الحقيقة مش كده خالص! وكل واحد فيهم ليه طعم وريحة مختلفة! لو عايزة تعرفي الفرق بين الكزبرة والبقدونس والشبت وباقي الخضرة، اقري المقال وما تنسيش تدعي لنا عشان قلنا لك على الفرق أو اعملي لنا حلة محشي.. أيهما أقرب D:
إزاي تعرفي البقدونس
إزاي تعرفي البقدونس
البقدونس ليه عيدان طويلة وجامدة شوية، ورقه ما فيهوش تعرجات كتير وملوش ريحة قوية وورقه أغمق حاجة بسيطة عن الكزبرة.
اعرفي من هنا طريقة عمل كول سلو زي كنتاكي بالضبط
إزاي تعرفي الكزبرة
إزاي تعرفي الفرق بين الكزبرة والبقدونس
لونها أخضر فاتح شوية وعيدانها أقصر من البقدونس وورقها فيه تعرجات كتير وليه ريحة ظاهرة أكتر عن البقدونس.
إزاي تعرفي الشبت
إزاي تعرفي الشبت
مالوش علاقة بالبقدونس والكزبرة أساسًا، بس أهو اسمه بيتذكر معاهم وخلاص، وبيحصل لخبطة مع إنه مش شبه البقدونس ولا الكزبرة، بس هو بيتذكر في النص بالغصب كده D:
مش عارفة تخزنيهم، هنقول لك هنا طرق حفظ وتخزين الخضروات الورقية
إزاي تعرفي الكرفس
إزاي تعرفي الكرفس
أعواده طويلة جدًا وسميكة وورقها كبير في الحجم بشكل لافت عن البقدونس و الكزبرة.
النعناع
النعناع
الورق بتاعه خشن بشكل ملحوظ وأوراقه مدببة وطبعًا هتعرفيه بشكل أفضل من ريحته المميزة اللي مش موجود لها شبيه في البقدونس والكزبرة والكرفس.
اعرفي من هنا طريقة 5 مشروبات منعشة لزيادة المناعة
والفيديو ده للشيف نجلاء الشرشابي هيساعدك أكتر إنك تتعرفي على الفرق بينهم
بنتمنى إن معضلة الطبخ تكون اتحلت يا ست الكل. ما تنسيش تعملي save للمقال، والمرة الجاية اللي هتيجي تشتري فيها خضرة محشي، افتحي المقال ده وواجهي العالم وافردي صدرك وانتي رايحة تنقّي D: وما تخليش الخضري يتّنك عليكي تاني وهو جاي يطلع لك اللي انتي عايزاه، وصحتين على قلبك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك