حاليًا كتير مننا بيلاحظ إن قبل ما المسلسلات تبدأ، بيتحط تحذير إن المسلسل أو حتى الفيلم بيحتوي على مشاهد قد لا تناسب الأطفال أو قد لا تناسب المراهقين، أو حتى قد لا تناسب البعض إشارة إن فيه مجموعة بمعتقدات فكرية أو دينية قد لا تتقبل المحتوى اللي هيتم تقديمه. والتحذير ده بيشمل أرقام مختلفة زي مثلا PG + 7 أو PG +12 أو PG + 18.
يعني إيه PG أصلًا؟
طيب دلوقتي كلمة الإرشاد الأسري دي معناها إيه والتصنيف جاي على أساس إيه؟
حقيقي للإجابة على السؤال ده، هنتكلم على مستوى التعريف العالمي، بمعنى إن القيم اللي بيمثلها التحذير قد تكون مختلفة عننا احنا هنا في بلادنا المحافظة اللي بتحب تحط حدود يمكن أكتر من أي مكان تاني في العالم.
فدلوقتي أول ما تشوفي الشعار ده، هتفهمي إن سن أطفالك بيسمح أو وبيمنع إنهم يشوفوا المحتوى ده، وعليكي بكل جدية إنك تاخدي التحذير ده في الاعتبار لإنه بيجنب أطفالك أولًا إنهم يشوفوا حاجة قد تسبب لهم صدمة انتي في غنى تمامًا إنهم يمروا بتجربة زي دي، فتعالي نفهم أساس التصنيف ده إيه.
تصنيف الأفلام
تصنيفات الأفلام أو المسلسلات جاية من Motion Picture of America MPAA والكلام ده كان سنة 1968 في الولايات المتحدة، علشان المحتوى المقدم ياخد تصنيف بيخضع للجنة اسمها “CARA” إللي بتتكون من مجموعة من الآباء المستقلين اللي بيطلعوا على العمل وبناء على كتيب معاهم بيحددوا مدى مناسبة المحتوى ده لسن معين، خلال العملية دي بيحطوا في الاعتبار اللغة والمشاهد الجنسية والعنف والمخدرات وغيرها من المواقف اللي بيهم الأهل إن أولادهم ما يطلعوش عليها، فالتصنيف ده بيكون عمومًا وسيلة تحذير مش وسيلة منع أو سماح للأهل، اللي بيحصل إن التحذير موجود والأهل ليهم مطلق الحرية في السماح أو المنع لأولادهم.
ده المفهوم العالمي للإرشاد الأسري لكن زي ما بنقول دايمًا، في مجتمعنا اللي بيميل إنه يكون محافظ وعنده حرص أكبر على أطفاله، ناس كتير منهم بيهمل التحذير اللي بيتكتب في الأول، وده بيعرّض أطفالهم للإطلاع على محتوى غير لائق وغير مناسب بالمرة لسنهم ومستوى استيعابهم.
علشان كده، رجاءً انتبهي للتحذير ده، ولو تقدري تشوفي المحتوى لوحدك قبل ولادك ما يشوفوه، هيكون ده تصرف آمن أكتر ومناسب أكتر، لأن فعليًا كلنا بنحاول نبعد أولادنا عن أي شيء ممكن يسبب لهم صدمة.
المصادر
www.canr.msu.edu
www.filmratings.com
www.en.wikipedia.org
التعليق باستخدام حساب فيس بوك