محتويات المقال
نظام الأكل النباتي بقى منتشر دلوقتي بين ناس كتير لأسباب مختلفة: بعض الناس بتتبع نظام الأكل النباتي لأنهم ما بيحبوش يؤذوا الحيوانات، والبعض ما بيحبش طعم اللحوم والبعض عرف إنه نظام غذائي صحي أكتر، غير إن فترة الصيام المسيحية بيكون فيها نظام غذائي نباتي. بغض النظر عن السبب ورا إتباع نظام الأكل النباتي، حابين نعرفك إن فيه تلات أنظمة مختلفة بيطلق عليها أكل نباتي. في المقال ده، هنعرفك التلات أنظمة دي: vegetarian وvegan وplant-based diet.
أولًا: النظام الغذائي الـVegetarian
النظام الـvegetarian هو أخف نظام من ناحية إن فيه اختيارات كتير تتاكل وطرق طبخ مفتوحة أكتر. يعني في النظام ده، الممنوع بس هو اللحوم بأنواعها (لحوم حيوانات، أو لحوم فراخ، أو سمك). فيه بعض الناس اللي بتفضل تاكل أسماك ومأكولات بحرية وبتمتنع بس عن لحوم الحيوانات ولحوم الفراخ ودول بيتسموا pescetarian وبيعتبرو الأسماك هي المصدر الوحيد للبروتين. النظام الـvegetarian عمومًا فيه اختيارات أوسع لأنك تقدري تاكلي منتجات ألبان وبيض وعسل وكمان ممكن تاكلي طبيخ مصري عادي بس تستبدلي الشوربة بميا. وممكن تاكلي حاجات محمرة ومش صحية بالضرورة. مصدر البروتين في النظام ده ممكن يكون حيواني من البيض والألبان وممكن يكون نباتي من البقول والبسلة والكينوا والمكسرات.
ثانيًا: النظام الغذائي الـVegan
النظام الـvegan هو الدرجة الأصعب من الـvegetarian لأنه مش بس ممنوع فيه اللحوم كلها، ده كمان ممنوع منه منتجات الألبان والبيض والعسل. بس الحقيقة إن بالرغم من كده تقدري برضه تاكلي بطاطس محمرة وحاجات مش بالضرورة صحية. مصدر البروتين في النظام ده بيكون بس نباتي من البقول والبسلة والكينوا والمكسرات.
ثالثًا: النظام الغذائي الـPlant-Based Diet
نظام الـPlant-Based Diet هو الأصعب على الإطلاق. ده لأنه ما فيهوش إمكانية أكل أي شيء محمر. مش بس كده، هو بيمنع الأرز الأبيض والدقيق الأبيض والشوفان الأبيض لإنهم معالجين كيميائيًا، وبيمنع الزيوت كلها والسكر والملح. بيمنع الفواكه المجففة والدبس. كمان المكسرات لازم تكون نية مش محمصة. وده أكتر نظام غذائي من التلاتة بيستخدم للتخسيس مش بس كنظام حياة. ومصدر البروتين في النظام ده زي الـvegan بيكون بس نباتي من البقول والبسلة والكينوا والمكسرات.
في النهاية، بنفكرك ترجعي لدكتور التغذية قبل ما تبدأي في أي نظام غذائي لأن مش كل الأنظمة الغذائية تنفع لكل الأجسام. وفي المصادر، هتلاقي صفحات تقدري تقري فيها معلومات أكتر عن كل نظام.
التعليق باستخدام حساب فيس بوك