النهاردة عايزة أتكلم عن فيلم وثائقي عظيم شفته من يومين، حقيقي هيغير طريقة تفكيرك 180 درجة عن الأكل وهيخليكي تاكلي إنتي وأولادك أكل صحي بجد مش كدة وكدة.

الفيلم اسمه That Sugar Film من تأليف بطولة وإخراج شاب استرالي اسمه  Damon Gameau.

الفيلم بيتكلم عن السكر الخفي الموجود جوة المنتجات والعصاير إللي في السوبر ماركت إللي مكتوب عليها إنها “صحية ومناسبة للريجيم”. وبالذات المنتجات الـlow fat  إللي علشان يخلوا طعمها حلو وبتشبع ويخلوا الناس تدمنها بيضطروا يحطوا جواها سكر خفي بدل الدهون إللي شالوها..

ديمون جامو، بطل الفيلم.. عاش آخر 3 سنين من حياته وهو مستغني تمامًا عن السكر المصنع في أكله وده بسبب إنه صديقته وحبيبته ده نظام حياتها فهو شاركها فيه.. وبدأ ديمون يهتم بالقراءة عن الأكل الصحي.. ولما عرف إنه صاحبته حامل جتله فكرة إنه يعمل فيلم وثائقي هدية لبنته عن السكر علشان لما تكبر تبقى بصحة كويسة..

ديمون قرر إنه يرجع يدخّل السكر المصنع الخفي تاني في نظامه الغذائي لمدة 60 يوم ويشوف تأثير ده على وزنه وعلى التحاليل بتاعته..

وعلشان كدة ديمون استعان في الفيلم ده بمجموعة من الأطباء والخبراء علشان يتابعوا حالته ويشرحوا للناس التغيرات إللي بتحصل، وكمان يوعوهم ويمدوهم بمعلومات عن السكر..

أحد الأطباء قال لديمون إنه المواطن الأسترالي بياخد في اليوم حوالي 40 معلقة سكر خفي مستخبية جوة الأكل الموجود على رفوف السوبرماركت زي مثلا الكورن فليكس والجرانولا والزبادي بالنكهات والعصير الدايت!  بعد كدة اتعمل لديمون نظام المفروض إنه “صحي” وبيعتمد كله على منتجات -بيتقال إنها صحية- من السوبرماركت علشان يضمنوا إنه ياخد أربعين معلقة من السكر الخفي بشرط يحافظ على نفس سعراته إللي كان بياخدها وهي 2300 سعر.

ديمون بيبدأ ياكل على النظام الجديد وبيفرجنا على المنتجات وبيخلينا نقرأ ونحسب مع بعض السكر إللي فيها وكل شوية فيه خبير بيتكلم لمدة دقيقة أو اتنين عن السكر.. الفيلم بيناقش أنواع السكر.. وليه بيخبوه جوة الأكل المصنع وتأثيرة على الكبد ومقاومة الأنسولين وإزاي السكر سبب أساسي للإجهاد والاكتئاب والتقلبات المزاجية وتسوس الأسنان إلخ وطبعا كل ده بالشرح والأدلة والمصادر والحالات المختلفة.

في النهاية هنشوف إنه بعد شهرين بس من تناول السكر الخفي في المنتجات الصحية وزن ديمون زاد 8 كيلو وبقى عنده مشكلة الدهون على الكبد  fatty liver وغيرها من المشاكل التانية الصحية..

وفي آخر الفيلم، البطل بيكلمنا بقى على نظامه الصحي القديم وبيرجعله تاني كذا شهر لحد ما صحته بتتظبط وبيخس تاني وبترجع تحاليله زي ما كانت وهيرجع يخس تاني رغم إنه بياخد نفس سعراته بس علشان غير نوعيه أكله واستبدل السكر المصنع بالدهون الصحية والبروتين والخضار..

عادة، الافلام الوثائقية العلمية بتكون مملة وصعبة ودمها تقيل.. لكن ده من الأفلام الوثائقية القليلة الممتعة من أول لآخر ثانية وإللي بيوصل المعلومات الطبية بمنتهى السلاسة.

بجد الفيلم ده شجعني جدًا أرجع تاني أخلى بالي من السكر الخفي في أكلي وعندي إحساس إنه هيفرق معايا في رحلة الأكل الصحي وخسارة الوزن وبتمنى تشوفوه كلكم وتعلموا إللي فيه لأولادكم.

رابط قصير