تجنب الصداع في رمضان أكتر حاجة بنفكر فيها دايمًا وبنشيل همها. لكل واحدة القهوة بالنسبة لها حياة، حتى لو بتشربها باردة بعد باص ولانشبوكس الصبح، للي ما بيعرفوش يفوقوا إلا بكوباية القهوة الصبح، للناس العميقة اللي بتشرب قهوة على أغاني فيروز وتشرب قهوة وتنام. عاملين إيه في رمضان؟ صدعت؟ أني آسف D: يعني مما لا شك فيه القهوة بالنسبة لناس كتير إدمان وكوباية القهوة الصبح دي بتبقى الأفيون اللي بيزقوا بيه اليوم، وفي رمضان مدمنين القهوة حرفيًا بيتعرضوا لصداع شديد وهو صداع أعراض انسحاب الكافيين من الجسم، طيب إيه الحل للصداع؟ هنقول لك في المقال ده على أهم النصائح لتفادي الصداع في رمضان.
هنبطل قهوة خلاص في رمضان؟
نصائح تجنب الصداع في رمضان
صعب تقنع مدمن قهوة بكلام إنه فرصة رمضان جاه نبطل قهوة بقى، عشان تقنع مدمن قهوة يبطلها كإنك بتحاول تقنع عيل يسيب أمه تدخل الحمام في حالها من غير ما يصوت.. أمر مستحيل! ومن أبرز أعراض انسحاب الكافيين من الجسم هي التوتر والصداع الشديد وانخفاض ضغط الدم. طيب عشاق القهوة اللي ما يقدروش يستغنوا عنها هيعملوا إيه في نهار رمضان عشان الصداع؟ هنقول لك دلوقتي على أهم النصائح.
اعرفي هنا طريقة عمل قهوة الفرينش بريس في البيت
أهم نصائح تجنب الصداع في رمضان
نصائح لتفادي الصداع في رمضان
- القهوة منزوعة أو منخفضة الكافيين: القهوة أنواع، وفيه بعض الأشخاص مش بتشرب القهوة التركي، ممكن تشرب القهوة سريعة الذوبان اللي بيبقى موجود منها أنواع منزوعة أو قليلة الكافيين، ممكن قبل رمضان تستبدلي قهوتك العادية بيها عشان جسمك يتعود عليها وتخليها قهوتك الأساسية اللي تشربيها بعد الفطار وفي وقت السحور.
- شرب السوائل: اشربي سوايل كتير بين الفطار والسحور واشربي مياه بكترة ما لا يقل عن 2 لتر، وحاولي تقللي عدد كوبايات القهوة اللي هتشربيها واقتصري على كوب واحد فقط أو اتنين ويفضل قبل السحور وتكون منزوعة الكافيين.
- استبدال القهوة: لو هتقدري تستغني عن القهوة، فيه مشروبات تانية فيها كافيين ممكن تشربيها عشان تديكي طاقة، زي الشاي والشاي الأخضر ومشروب الشوكولاتة أو الكاكاو.
- النوم: حاولي تاخدي قسط كافي من الراحة والنوم كل يوم عشان تتغلبي على الصداع، ولو حسيتي بالصداع في نهار رمضان ممكن تحاولي تسترخي وتنامي شوية في جو هادي عشان تقللي الصداع.
- نظام غذائي صحي: خلّي رمضان فرصة إنك تستبدلي إدمان القهوة بنظام غذائي صحي، بدل القهوة ممكن تاكلي شوكولاتة دارك أو تشربي بدل القهوة العصاير زي الكركديه وقمر الدين والدوم.
هنا ممكن تشوفي 5 استخدامات للقهوة متعرفيهاش
ودي كانت اجتهادات شخصية لأهم النصائح الشخصية اللي باتبعها عشان اتغلب على أعراض إنسحاب الكافيين من الجسم، لو عندك أي أفكار تانية بتتبعيها شاركينا بيها في كومنت ورمضان كريم.
التعليق باستخدام حساب فيس بوك