محتويات المقال
دايمًا بيظهر كل فترة على السوشيال ميديا بلوجرز كتير، منهم اللي بيطبخ أو بيعمل ريفيوز عن مطاعم، ومنهم بيحب الموضة والفاشون، ومنهم الملقبين باليوتيوبرز.. اليوتيوبرز بيبقى ليهم قناة على اليوتيوب يقدروا يعملوا من خلالها فيديوهات متنوعة وطبعًا بيبقى ليهم عائد مادي مقابل الفيديوهات دي.. بدون الدخول في تفاصيل الماديات بس كل ما زاد عدد الـSubscribes والـView على فيديوهاتهم بيبقى ليهم ربح من يوتيوب.. من أشهر اليوتيوبرز اللي بقالهم فترة كبيرة شغالين في المجال ده هما أحمد حسن وزينب، بس من يومين ظهر ليهم فيديو استفز كل متابعينهم وعمل ليهم مشكلة كبيرة هنقولك عليها في المقال ده.
مين هما أحمد حسن وزينب؟
أحمد حسن وزينب زوجين اشتهروا بفيديوهاتهم اللي بتخلي متابعينهم يتابعوا أسلوب حياتهم، من أول فرحهم وحتى يوم الولادة اللي أحمد صور زينب فيه وهي تحت تأثير البنج لكل تفاصيل حياة بنتهم أيلين وكمان سفرياتهم ومقالب وحرفيًا شبه كل تفصيلة في حياتهم بيتم تصويرها وتتحط فيديوهات على اليوتيوب.. بعض متابعينهم بيتهموهم بعمل فيديوهات استفزازية عشان تخلق جدل عشان الناس تدخل تتفرج وتزود عدد المشاهدات وخصوصًا في الفترة الأخيرة.
إيه سبب الإهتمام الشديد بيهم في الفترة دي؟
معروف إن الCouple المشهور بيعملوا فيديوهات مقالب وفيه ناس بتحب تتفرج عليها وفي ناس ضدها، بس آخر فيديو مقلب ليهم أخد مسار تاني خالص لما ظهرت فيه زينب بشكل مخيف للطفلة الصغيرة عشان تخوفها، الفيديو لاقى جدل كبير جدًا وأعلن المجلس القومي للطفولة والأمومة عن اتخاذه الإجراءات القانونية ضدهم بسبب المقلب اللي عملوه في أيلين، مش بس كده اعلن مدير عام خط نجدة الطفل بالمجلس القومي للطفولة والأمومة في مداخلة إن الفيديو إستهتار من الوالدين وإستغلال للطفلة بشكل تجاري ودي جريمة يعاقب عليها القانون وممكن توصل للمؤبد.
آراء المتابعين
بعض الناس شايفة إن لازم يتم إيقافهم وإنهم غير مسئولين، وبعض الناس شايفة إن مفيش حد هيخاف على ولاده أكتر منهم وهما مش قصدهم يبهدلوها وأهالي كتير بتعمل مقالب في ولادها بس محدش بيعرف عنهم حاجة، وفي جانب آخر خالص من الرأي بيقول إن الميك أب اللي عملته زينب فيه إهانة لأصحاب البشرة السمرا.. قوليلنا رأيك في الموضوع ده وإنتي مع ولا ضد؟
المصادر:
التعليق باستخدام حساب فيس بوك