محتويات المقال
من أكتر التصرفات المحبطة والمقلقة لينا كأهالي إننا نكتشف إن ولادنا بيكذبوا! ونفضل نلف وندور حوالين نفسنا ونسأل “ليه”، إيه اللي بيضطر طفلي للكدب! وممكن كمان نفقد ثقتنا فيه ونتصرف على الأساس ده. وبالتالي يضطر الطفل يكذب أكتر محاولة منه لإثارة إعجابنا أو كسب ثقتنا من جديد!! فنفضل في دايرة مفرغة مش عارفين نخرج منها. في المقال ده، هنعرف سبب الكدب عند الأطفال وازاي نتعامل معاه تربويًا ونعالجه بطريقة صح.
إيه سبب الكدب عند الأطفال؟
- خيال واسع: فيه أطفال كتير خيالها واسع ومبدعين وبيألفوا كتير في حياتهم اليومية وبيصدقوها عادي. وفي الغالب كمان بيكونوا شايفين أصدقاء في خيالهم هم بس وبيتعاملوا معاهم ومقتنعين إننا شايفينهم، وده احنا بنتخيل إنه كذب ولكن الحقيقة إنه بيختفي كل ما الطفل يكبر. اعرفي أكتر من هنا: الصديق الخيالي: ابني بيكلم حد أنا مش شايفاه
- أوقات الطفل بيكذب عشان يريح نفسه أو عشان ما يعملش حاجة مطلوبة منه، زي مثلًا لما نسأله “غسلت سنانك ولّا لسه” يقول إنه غسلها عشان مكسل يقوم.
- كذب عشان خايف من العقاب أو التأنيب. وده من أخطر الأنواع، لإن ممكن الطفل بعد كده يعتمده في حياته طول الوقت.
- كذب عشان بيقلّد، زي إننا في البيت نكون بنكذب على الطفل أو إننا نطلب منه يكذب عشاننا. وبالتالي بيشوف إن ده شيء مسموح وطبيعي.
- الكذب المرضي: وده لما بيتحول الكذب لداء مزمن يحتاج لمتابعة طبيب نفسي لعلاجه.
المصدر: pinterest – الكذب عند الأطفال
علاج الكذب عند الأطفال
طيب نتصرف مع ولادنا صح ازاي لما يكذبوا؟
في حالة الكذب المتكرر وعلى مواقف احنا شايفينها مش مستاهلة من وجهة نظرنا، لازم ندور على السبب اللي بيخلّي الطفل يعمل كده ممكن يكون من كتر ما بنزعق أو بنعاقب مثلًا!
- ما نعملش label أبدًا على الطفل إنه كذاب أو نقول له “مش هتبطل تحوير بقى!” عشان ما يصدقش الصفة دي عن نفسه ويتعامل على أساس إنه كداب.
- لما نلاحظ إن الطفل كذب في حاجة واضحة بالنسبة لنا بدل ما نقول له “بطل كدب” نحاول نعمل إعادة صياغة لكلامه “هممم.. قصدك غسلت سنانك امبارح بس لسه النهارده بما إن الفرشة ناشفة يعني مش كده؟!” فالطفل يفهم إنك فاهمة، وفي نفس الوقت مش بتتهميه بالكذب.
- لو الطفل بيكذب إنه يألف قصص ما حصلتش، ممكن نوجّه اهتمامه إنه عنده خيال جميل يستغله “حلوة قوي القصة دي.. إيه رأيك أي قصة تبقي عاوز تقولها من خيالك تعالى نكتبها في حدوتة ونعمل كتاب ليك؟”
- نستخدم الحكي وقصص قبل النوم لتوصيل ضرر الكذب على اللي بيكذب وعلى الناس اللي حواليه ونسأل الطفل عن رأيه ليه ممكن يكون بطل القصة بيكذب عشان نفهم إيه اللي بيدور في دماغه.
- نفتح دايمًا حوار مع الطفل ونشجعه يحكي ويتكلم ويقول رأيه براحة من غير خوف أو قلق أو تقليل أو تريقة على اللي بيقوله.
- مهم إننا ما نعاقبش الطفل ونقسو عليه بسبب الكذب لإن للأسف ده هيخليه يلجأ له أكتر وأكتر، ويبتكر طرق يكذب بيها ويفلت من العقاب. لكن في نفس الوقت، لازم يكون فيه عواقب منطقية وطبيعية مناسبة للموقف. اعرفي من هنا نظام العواقب.
- نستغل أي موقف الطفل ما لجأش للكذب فيه ونشكره عليه قوي ونشجعه. ودايمًا نركز إن لو الطفل كذب وبعدين رجع قال الحقيقة إننا نوصل له إن عدم الكذب هو اللي ساعده إن الموقف يتحل حتى لو في مشكلة، بجملة زي “أنا مبسوطة قوي إنك قولتي لي الحقيقة. تعالي نفكر سوا ازاي نحل الموضوع ده”.
وفي النهاية محتاجين إننا نكون قدوة قصاد ولادنا ونتحرى الصدق دايمًا. ونورّيهم بالمواقف إننا مش هنكذب حتى لو كذبة صغيرة ممكن تساعدنا دلوقتي، ونحاول احنا نسهل الدنيا على ولادنا عشان ما يضطروش يكذبوا. لازم يحسوا إننا دايرة أمان موجودة طول الوقت ليهم حق يقولوا أي حاجة عايزينها معانا من غير خوف مننا، يحسوا إنهم محبوبين ومقبولين بدون شروط وإنهم مش مضطرين يكذبوا عشان يحسوا بده.
التعليق باستخدام حساب فيس بوك