محتويات المقال
بعد أول دقيقة بتشوفي فيها مولودك الجديد، العالم بتاعك بيتغير تمامًا، وبتقعدي تفكري في طرق تملي بيها حياتكم سوا، بتبصي على البيبي وبتشوفيه وهو بيبص على وشك ويسمع صوتك ويحس بدفا بشرتك، إدراك البيبي ده ممكن يكون لعب بالنسبة له حتى لو ما أخدتيش بالك.
في المقال ده هنعرفك على طرق جديدة للعب مع طفلك حديث الولادة:
صحيح إن البيبي الجديد مش بيقدر يشيل الألعاب أو يشارك فيها بس الطفل هيحس بالملل والوحدة لو الأم ما قدرتش تتواصل معاه طول ماهو صاحي، انتي بتكوني متخيلة إنه مش بيعمل حاجة غير الأكل والشرب والإخراج، بس حاجات زي إنه يبص حواليه ويدور على صوت اللي بيتكلم أو يركز عينه على لعبة معينة بتطلع صوت وبتتحرك، الحاجات دي بالنسبة للطفل لعب .
3 طرق اللعب مع حديثي الولادة
الطريقة الأولي للعب مع طفلك
إنه يكون مع حد كبير دايمًا ودي أفضل حاجة بالنسبة للطفل المولود، حطي سريره الهزاز أو الكرسي بتاعه جنبك وانتي بتعملي أعمالك المنزلية وخليه يشوف العالم حواليه.
كلميه وخلي اللي حواليك يكلموه وينبهوه لوجودهم وخليه دايمًا جنبك وانتي بتقرأي أو بتشوفي التلفزيون وخليه دايما معاكي في أي مكان تروحيه في البيت.
الطريقة الثانية للعب مع حديثي الولادة
ده وقت الشيل وهو ده أكتر وقت بيستمتع بيه الطفل، إنك تشيليه وتخرجي الشارع تروحي الحديقة أو السوبر ماركت ده بالنسبة لابنك زي إنك تتفرجي على فيلم، عشان كده دوري على شيالة أطفال مريحة ليكي وفيها دعم كويس لراس طفلك، ده هيخلي إيديكي تكون مرتاحة وفاضية تقدري تعملي بيها حاجات بسيطة أو تتسوقي من السوبر ماركت.
الطريقة الثالثة للعب مع طفلك الرضيع
إدي طفلك فرصة إنه يشوف ويكتشف حاجات كتير عن طريق إنك تنقلي مكانه أو سريره مثلًا لمكان تاني مثير أكتر للاهتمام، صحيح إنه مش هيقدر يشوف تفاصيل حاجة أبعد منه بعشرين سم لكن برضو هيتبسط بالظلال اللي الستاير بتعملها وشكل الستارة وهي بتتحرك على الشباك وأشكال الزرع من بره وصوت العصافير.
وأخيرا ما تخليش إحساسك إنك لازم تلعبي مع طفلك طول الوقت وتحفزي نموه يضغط عليك، أبدًا!
الأطفال حديثي الولادة بيحتاجوا وقت يقدروا يستوعبوا فيه كل اللي بيحصل حواليهم وبس يرتاحوا ويتأملوا في الفراغ، ده بيساعدهم على النمو بشكل أفضل.
تمنياتنا ليكي بوقت مبهج مع طفلك.
المصادر:
التعليق باستخدام حساب فيس بوك