محتويات المقال
جهاز العروسة، الكلمة لوحدها أصبحت تشكل رعب ومساحة تحدي وتباهي بين الناس حتى لو وصل بيهم الموضوع إنهم ياخدوا قروض من البنك، أو يوقعوا على نفسهم شيكات من غير رصيد. المهم، الناس ما تاكلش وشنا! الشقق الحديثة كلها بمساحات صغيرة بجد، وبالتالي هي واخدة وضع إن فرشها لازم يكون عملي وسمارت، لكن ثقافة المجتمع اللي بتخلي الناس تشتري جهاز لعدد 2 فرد فقط لا غير يكفيهم لتالت جيل، الدواليب بتكون زحمة، والبيت مليان عفش لدرجة أوقات بيكون تنضيفه وترتيبه صعب جدًا رغم إن المساحة نفسها صغيرة.
تجربتي مع شراء الجهاز
المصريين دايمًا ماشيين بمبدأ إننا لازم نجيب عفش على 4 عربيات كبيرة ونفرج الناس كلها قد إيه اشترينا جهاز ما حدش جابه قبل كده. والنتيجة بعد سنتين ولا تلاتة من الجواز، إن أغلب الحاجات دي يا غير عملية، يا ما تفتحتش، يا ابتديتي تستخدميها كمخزون هدايا ومجاملات للناس اللي تعرفيهم، الحاجة كده كده لسة بكرتونتها، أو آخر حاجة تزهقي منها جدًا وتشوفي الجديد ويبقى نفسك تجيبي منه ومش قادرة لأن انتي عندك فرع مصغر من العتبة في بيتك، وده حقيقي شيء مزعج بشكل غير عادي.
لا والأحلى إن دايمًا فيه حاجات معينة كده أتفق الخلق كلهم على إنها غير عملية بالمرة، أجيال ورا أجيال متفقة على كده، وعلى الرغم من كده بيشتروها برضه بجد من غير أي تفسير علمي أو منطقي.
علشان كده، وكنداء إنساني أخير، ومحاولة مننا لجعل حياتكم أسهل، هنقول لكم الأول قايمة الحاجات اللي مالهاش أي لازمة وما تشتريهاش وبعدها شوية نصائح اعتبريها دليل لسياسة الشراء وانتي بتجهزي أو حتى بتغيري بيتك.
اعرفي من هنا 10 أدوات مطبخ مالهاش لازمة من وجهة نظري
قائمة ما تشتريش
عملًا بمبدأ قبل الوقوع الفاس في الراس، جمعت لك مجموعة منتجات بتكلف آلافات، وفي نفس الوقت بلا أي فايدة، ومنها المجموعة دي:
شنطة المعالق:
ليه بجد؟ يعني الشنطة المفتخرة دي الصالحة لتبادل أسرار المافيا وأكل اللورد كرومر إيه لازمتها? ويا ريتها بتستخدميها في حاجة، لأ، هي قاعدة مشرفة عندك كده من غير أي لازمة، وغالية جدًا، وتقيلة جدًا، حقيقي اختيار فاشل.
العجانة:
طالما انتي بتحضري الغدا بالعافية، وما فيش أي نية إنك تقدمي برنامج للخبز، بتجيبي الجهاز اللي شبه لودر العربيات ده يعمل عندك إيه؟ يعني بجد جهاز كبير مالوش استخدام واقعي في حياتك تدفعي فيه آلاف الجنيهات ليه؟
كيتشين ماشين:
هو جهاز شكله مفتخر بجانب إن فيه نظرية كدابة بتقول: هاتي كيتشين ماشين: جهاز واحد عملي، وده طبعًا فخ، لسبب بسيط، دايمًا الجهاز تقيل وغالي، وفيه كمية قطع انتي عمرك ما هتستخدميها أصلًا، الأفضل تشتري كل حاجة لوحدها، الخلاط، الكبة، المطحنة، ده لو مرة الكيتشين ماشين اتحرقت زي أي جهاز له عمر، هتلاقي مطبخك اتعطل حرفيًا، فبلاش منه بجد.
السجاد الكبير:
قبل ما تشتري السجاد، لازم تعرفي مساحة شقتك إيه، بلاش سجاد قاعات المؤتمرات دي في شقة 80 متر، لأن هتلاقي نفسك جايبة سجاد كبير جدًا، مفيش مكان ليه أصلًا، ده غير طبعًا الصعوبة في تنضيفه والتعامل معاه، وهيكون مزعج بجد.
بلاش دراي كلين محطة السلام:
ليه حد يجيب غسالة فول أتوماتيك، ونص أوتوماتيك، وغسالة ملابس أطفال؟ ليه بجد حد ممكن يعمل في نفسه كده؟ طالما مافيش أي خطة عندك لفكرة فتح مشروع دراي كلين، فغسالة واحدة فقط تكفي، ودلوقتي الدنيا متطورة بالشكل الكافي إن فيه غسالات ببرامج غسيل مختلفة هتلاقي فيها كل اللي إنتي محتاجة له. اعرفي هنا أنواع غسالات مختلفة ومواصفات كل واحدة فيهم.
لكل وجبة طقم:
إيه الدافع اللي يخليكي تجيبي طقم للفطار وطقم للغدا وطقم للعشا؟ ده غير طقم الآيسكريم، وفيه حاجة للجيلي، وطلع فيه كمان طقم للسلطة، إيه المبرر لكل الأطباق دي؟ اللي انتي مش عارفاه إنها هتتحول لوحش أسطوري في الحوض هيربطك بيه للأبد، ده غير طبعًا كل الفلوس اللي هتروح عليه، طقم واحد كفاية.
85 حلة علشان نعمل مكرونة وبانيه:
من المسلمات المجتمعية إنك هتقضي أول 5 سنين في الجواز في عمل المكرونة والبانيه كأكلة أساسية على الغدا، حقيقي مش عارفة ليه بيتعاملوا على إنها أكلة سهلة، بينما أنا من وجهة نظري باعتبرها أكلة صعبة، محشي البتنجان أسهل بجد! بس عمومًا خلينا نرجع لفكرة إن علشان تعملي مكرونة وبانيه، انتي مش محتاجة طقم استانلس ستيل، وطقم تيفال، وطقم جرانيت، وطقم ألمونيوم، صدقيني مش محتاجة لكل ده، طقم واحد من ماركة محترمة معاه طقم صواني فرن وطقم طاسات للقلي وكده هيكون تمام جدًا.
مفرش السرير:
كيان شيطاني كده نزل أسواقنا المصرية، عبارة عن كوم من القماش التل والدانتيل والفايبر اللي بيشوك، مع ملمس خشن، غير قابل للتغطية بيه ولا غسيله، ولما بيتفرش على السرير بياكل المساحات المتبقية من الغرفة، وبآلاف الجنيهات، وبيتشال باقي العمر في العلبة بتاعته، ليه بجد نجيب حاجة مريعة زي دي، حقيقي قبيح في كل موديلاته، ومالوش أي موقع من إعراب حياتنا.
علبة ميكاب أفلام التمانينات:
يعني إيه تجيبي علبة ميكاب على شكل وردة أو قلب متعددة الأدوار، فيها مجموعة ألوان بتنقلك بشكل مباشر لأفلام حسين الشربيني؟ فاضل بس تليفون لاسلكي في مرسيدس الخنزيرة والبوليس يجي يقبض عليكي، بجد شيء سيء والغريبة إنها غالية، والأغرب إنك تجيبيها وعمرك ما هتستخدميها لأنها وحشة بجد.
خد عندك 1000 قطعة لانجيري:
مش هنقدر ننكر حماس البدايات، بس هو فعليًا لحد ما الحماس ده يخبو، هتلاقي نفسك ما استخدمتيش كل اللي جبتيه، وشكل جسمك اتغير، ده غير إن كل شوية تطلع موضة جديدة، اشتري طبعًا بس في المعقول، وبلاش ريش كتير.
طقم إمبراطور الصين:
طبعا عرفتي أنا باتكلم عن إيه.. الطقم أبو 10 آلاف جنيه المخصص لغداء الإمبراطور، واللي دوره إنه لا يستخدم أساسًا مالوش معنى من أساسه، فبلاش منه.
النيش:
الدولاب اللي موجود في بيوتنا في مصر على أساس إن كلنا أصولنا فرنساوية، وكنا عايشين في قصر الإليزيه، بس الزمن حكم وجينا نعيش في شقة في المقطم على الدائري، بلاش منه بجد خصوصًا لو شقتك صغيرة.
أوضة طفل حديث الولادة:
لا معنى لها أبدًا، ولو هتبصي للموضوع بشكل أعمق، هتلاقي نفسك صرفتي فلوس على أوضة غير عملية في بداية حياتك، غير إن بعد الإنجاب بكذا سنة، هتلاقي إنك محتاجة تغيريها، وده موال لوحده. فالأفضل لو عندك غرفة زيادة قادرة على تأسيسها، فخليها غرفة بسريرين أو سرير فرد بحيث إنها حتى تكون مكان مناسب لاستقبال ضيوف. كل اللي هتحتاجيه لما تخلفي سرير بيبي انتي هتحطيه جنبك في الأوضة بتاعتك أصلًا.
الدليل الكافي الوافي في شراء جهازي:
أغسطس 1998:
هتقولي لي اشمعنى، هاقول لك، في السنة دي يا كنتي مولودة قبلها بكذا سنة أو اتولدتي فيها أو لسه هتتولدي، اللي بيحصل إنك بتكتشفي إن مامتك بدأت في الحقبة الزمنية دي تجهزك، ولما تيجي تشوفي إيه اللي موجود، تلاقي نفسك قاعدة وسط أثريات بينزلوا بوستات عنها في الفيسبوك كمثال عن مرور الزمن الجميل اللي فات وراح وكانت الناس بتاكل في أطباق مشجرة بكل سلام وحب، وده طبعًا مش هتوافقي أبدًا تستخدميها في بيتك.
المطبخ:
المكان ده هتنشأ بينك وبينه علاقة طويلة الأمد بنفس عمر جوازك، فكري في ألوانه كويس، فكري في الخامة كويس، حطي في اعتبارك إنك محتاجة مكان تقعدي فيه وانتي في المطبخ، مش طول الوقت هتفضلي واقفة.
الحمام:
عدوك الأول في الحمام هو السراميك المط، مهما كان شكله حلو في المعرض، هنفضل فاكرين إن ما في المعرض يظل في المعرض، بس مع الاستخدام، هتظهر لك مشكلة إنك مش هتحسي إنه بيلمع مع استخدام الصابون، مهما كانت شطارتك في التنضيف، هيظهر من الوقت للتاني ترسبات صابون على الأرض أو الحيطة، ومع السراميك المط ده هيكون شيء محبط جدًا.
الصالة أو الريسبشن:
الصالون المدهب اللي محدش بيقعد عليه لا في بيتك ولا في بيت مامتك ولا جدتك ولا جدة جدتك حقيقي مالوش موقع من الإعراب، أي كرسي في البيت مش هتستخدميه وهتجيبيه منظر بس يبقى من الأفضل بلاش تجيبيه، جهزي بيتك بحيث يكون مساحة لراحتك.
غرف النوم:
معرض المفروشات اللي في الدواليب وتحت السراير ده هيجري وراكي في أحلامك، حقيقي يعني، الخامة رقم واحد قبل الشكل، القطن 100% يستاهل كل جنيه يدفع فيه، الشكل يكون بالنسبة لك رقم 2 وممكن 3، لكن النعومة وقيمة الخامة لا تنازل عنها أبدًا.
تقدري تقولي إن دي الخطوط العامة لفكرة الشراء، هو حماس البدايات ده صحيح بيوقعنا في أخطاء لا حصر لها، لكن الاستفادة من أخطاء الآخرين بيوفر علينا كتير. هاقول لك دلوقتي إيه اللي ما تفكريش تشتريه وانتي بتجهزي.
أنا قلت لك خلاصة خبرتي، كل دي أخطاء هيكون جميل جدًا إنك تتجنبيها في تجهيز بيتك، ونصيحة أخيرة مهم قوي تهتمي بيها، افرشي بيتك بالستايل المناسب لحياتك وعادات حياتك انتي وشريك حياتك، ما تتعامليش إن بيتك معرض لمفكو حلوان.
1 comment
حبيت اسلوبك جدا وكلامك صح جدا