زمان كان الطبيعي للأطفال إنهم يلعبوا ويجروا ويتحركوا طول الوقت، ويتواصلوا مع أصحابهم بالكلام والمشاركة، حتى لما دخل التلفزيون البيوت، كان بيقفل في وقت محدد، والحاجات المناسبة للأطفال كانت قليلة، فماظهرتش أوي مشكلة الشاشات، لحد ما الدنيا اتطورت والأجهزة بقت أشكال وألوان، ومبقتش ثابتة في مكانها، وبقى لها إمكانيات كتير ودخلت السوشال ميديا على الخط، فاتحولت الشاشات من وسيلة تسلية، لوسيلة تخريب للأطفال ورعب للأمهات.
لأنها بدأت تسلب الأطفال حقهم في اللعب والحركة والانطلاق، واللي لا يمكن يتعوضوا في مرحلة تانية من مراحل العمر، لأن لعب الطفل هو مش تقضية وقت بس، لكن هو جزء أصيل من مراحل نموه واكتشافه للدنيا حواليه ولإبداعه.
القبلات في أفلام الكارتون: أقول إيه لولادي لما يشوفوها؟
علشان كده منظمة الصحة العالمية حددت المدة المناسبة لاستخدام الأطفال للشاشات على حسب أعمارهم:
- من الولادة لسن سنة: ممنوع استخدام الشاشات.
- من سنة لسنتين: أقل من ساعة واحدة في اليوم.
- من 3 لـ 4 سنين: لا يزيد عن ساعة واحدة في اليوم.
طبيعي بعد ما تشوفي الوقت المقنن ده تتخضي، وتحسي إنه مش حاجة قابلة للتفيذ خالص، معاكي حق خصوصًا إننا بقينا “نلهي” الأطفال عننا بالشاشات، ولما بنحب نفصل أو نستريح بنقعدهم أدام الشاشة، بس لو عرفتي سلبيات الوقت الطويل مع الشاشات هتغيري رأيك.
ليه مش قادرة أنقذ ابني من “الكارتون”؟
ودي بعض الآثار السلبية لتقضية وقت طويل أدام الشاشات:
- فقدان المهارات الاجتماعية
- البدانة
- المشاكل السلوكية.
- الأرق.
- العنف.
- نقص وقت القراءة.
- تراجع وقت اللعب.
5 حاجات ممكن تحصل لما تسيبي أولادك قدام التلفزيون طول النهار
أعمل إيه علشان أقنن وقت الشاشات لأطفالي؟ :
- مينفعش أمنع حد من حاجة من غير ما أعمله بديل، يعني مثلا مش متوقع إني أطفي الشاشة لابني، واقوله إفضل قاعد كده متعملش حاجة، أكيد مش طبيعي، علشان كده لازم إنتي اللي تشجعيه في الأول وتلعبي معاه بألعابه، أو تخليه يشاركك في أنشطة في البيت زي الطبخ ورعاية النباتات أو الحيوانات الأليفة مثلا.
- لازم تعملي روتين لوقت الشاشة، أكيد هيكون صعب في الأول بس هيتعودوا.
- متربطيش وقت الشاشة بحاجة تانية، زي الأكل أو ترتيب الأوضة، وقت الشاشة هو نشاط مستقل يعمله طفلك بدون الانشغال في حاجة تانية.
- لو ابنك مراهق، ففي الحالة دي الكلام والتوعية مهمين جدًا، لأن التوجيه مش في الوقت بس، ده في المحتوى كمان، ولازم تنفتحي في الكلام معاه عن المشاكل اللي ممكن تقابله وهو بيستخدم السوشال ميديا.
- اخرجي بأولادك على أد ما تقدري، خليهم يطلعوا طاقتهم في الحدائق والملاهي.
8 أماكن ممكن تخرّجي فيهم ولادك في الويك إند
مع تمنياتنا ليكي بوقت سعيد مع أطفالك بعيد عن الشاشات.
المصادر:
التعليق باستخدام حساب فيس بوك