محتويات المقال
المراهق والعادة السرية .. هل ده فعلا صحيح ممكن يحصل؟ “أنا شاكة إن ابني بيمارس العادة السرية” \ “بنتي المراهقة بتقفل على نفسها باب الأوضة كتير” \ “شوفت ابني ماسك أعضاؤه التناسلية”
الجمل ده وزيها كتير بسمعها من أهالي مراهقين، وكانوا دايمًا بيطلبوا مساعدة واحدة بس وهي “نمنعهم ازاي؟”. واللي دايمًا ردي اللي نوعًا ما بيكون محبط للأهل هو “ما نقدرش نمنع المراهق من حاجة هو مش مقرر إنه يوقفها”.
وهي ده الحقيقة اللي كتير مننا مش قادر لسه يقبلها، وهي إن سواء اتفقنا أو اختلفنا مع فكرة إن العادة السرية ده شيء طبيعي ومرحلة من مراحل النمو النفسي الجنسي إنه يحصل (وهنا بنتكلم من منظور علمي وطبي وليس منظور ديني)، فهو في جميع الأحوال احنا كأب وأم ما نقدرش نمنع مراهق من ممارسة عادة تخص جسده إلا لو هو قرر بنفسه يوقف العادة دي.
معلومات مهمة لازم نعرفها كأهل بخصوص المراهق والعادة السرية
- الاحتلام شيء طبيعي جدًا، وبيحصل نتيجة للنمو الجنسي في فترة البلوغ.
- العادة السرية هي ممارسة طبيعية في فترة المراهقة عند الولد والبنت.
- من حق الطفل أن يكتشف جسده، وواجبنا نقبل ده.
- مهم واحنا بنوعي ولادنا عن أجسامهم إننا ما نربطش العادة السرية بإحساس الخجل أو الذنب لأن ده هيأثر عليهم بصورة سلبية جدًا على المدي الطويل.
امتي نقلق من ممارسة العادة السرية للمراهق ونتدخل كأهل؟
لما طفلي المراهق يبدأ ينعزل عن كل الأنشطة في حياته، ويفضل قاعد في أوضته يمارس العادة السرية باستمرار ويستخدمها كبديل للحياة الاجتماعية والرياضة والتمارين واللعب كمان. وقتها تبقى العادة بتتحول لإدمان هيضر بصحة الطفل النفسية والاجتماعية ومحتاجين نستشير متخصص.
هنا ممكن تشوفي علاج المشكلة أنا مش عارفة اتصرف! بنتي بتلمس المنطقة الحساسة باستمرار
نعمل إيه عشان العادة السرية ما تتحولش لإدمان؟
نشغل المراهق طول الوقت بأنشطة مفيدة ولعب رياضة وما نسيبهوش بدون رقابة مع الإنترنت يستكشف ويشوف اللي هو عايزه، وفي نفس الوقت نقدم له توعية جنسية مناسبة لسنه ولأسئلته ولفضوله عشان ما يضطرش يلجأ إنه يدور علي إجابات علي الإنترنت أو من اًصحابه.
وفي النهاية احنا كأهل مش من حقنا نحسس الطفل بالذنب أو بالخجل والعار نتيجة استكشافه أو تعامله مع جسمه بطريقة احنا اتربينا إنها غلط ومش مسموحة، علاقتنا القوية بولادنا وكلامنا بصورة واضحة معاهم عن الجسد والجنس والخصوصية، نتكلم معاهم عن البلوغ من بدري وعن التغييرات النفسية والجسدية والهرمونية اللي هيعدوا بيها، ده من أهم الأساسيات اللي هتخلي الطفل عنده وعي بجسمه ومش خايف يسأل أو يطلب مساعدتنا لما يحتاج.
1 comment
مكتوب حلو و متوازن
تحياتي