محتويات المقال
عرض مبهر جدًا خطف عيون المصريين والعالم كله، مساء تالت يوم في شهر إبريل، الكل تابع بشغف وفخر الرحلة الذهبية للمومياوات الملكية في رحلتها الأخيرة من المتحف المصري في ميدان التحرير، للمتحف القومي للحضارة في الفسطاط، واللي بيعتبر واحد من أحدث المتاحف في عرض وحفظ ومعالجة الآثار. 22 مومياء ملكية استقرت في مكانها الأخير وكانت السبب في لفت الأنظار لعظمة الست المصرية.
ده حصل مع كل مرة كانت بتظهر فيها واحدة ست على الشاشة، وهي بتضيف شيء أجمل للحفلة اللي تضمنت عناصر نسائية مميزة جدًا، الإبهار بدأ مع الفساتين الجميلة وقدمت للعالم كله انطباع ورسالة إن ستات مصر حقيقي يقدروا يعملوا حاجات كتير، كانوا ملكات في الماضي ونجمات في الحاضر كل واحدة في مجالها بتقدر تقدم إنجاز عظيم.
قائدة الموكب المفاجأة
ميرال ماهيليان في موكب المومياوات الملكية
صاحبة طلة مستحيل تقدر تتجاهلها، كانت أول وش يظهر في الحفلة خلّى كل الناس تسأل مين الست الجميلة جدًا دي يا ترى؟ الإجابة إنها عارضة أزياء مصرية بريطانية اسمها ميرال ماهيليان، واللي علقت من خلال الأكاونت الرسم بتاعها وقالت “أنا فخورة جدًا وحاسة بالشرف لإني جزء من اليوم التاريخي ده، مفيش كلمة تقدر توصف شعوري أثناء السير مع الفراعنة في العرض الذهبي”.
جاسمين طه ملكة الأناقة
جاسمين طه مقدمة حفل موكب الممياوات
أناقة مالهاش حل، ظهرت جاسمين طه بفستان نموذج في الرقة والفخامة والذوق مع لمسة فرعونية واضحة، ده غير اللباقة ومعلومات منظمة ومرتبة، مفيهاش لجلجة، ولا لخبطة ولا حروف مش مظبوطة، القاف قاف والكاف كاف، جاسمين طه من عائلة مرموقة والدها العميد طه زكي وزير الصناعة والثروة المعدنية السابق، حماها رئيس وزراء سابق، ووالدتها الإعلامية الراحلة سهير الإتربي، درست الاقتصاد، ومعاها ماجستير في الإدارة العامة من الجامعة الأمريكية.
ناردين فرج تتألق
ناردين فرج مقدمة حفل موكب المومياوات
ظهرت المذيعة الشابة بجامب سوت عبقرية لونها أحمر، من تصميم مصمم الأزياء العالمي زهير مراد، مطرز بفصوص حمراء وأكمام شيفون طويلة، وكانت لبقة جدًا ومبهجة بأداء يليق بمذيعة واقفة تقدم حفل ضخم قدام رئيس الجمهورية ورئيس الوزراء وكل الشخصيات العامة المحلية والدولية اللي حضرت الحدث، ناردين كانت واجهة مشرفة جدًا لمصر.
آية الغرياني الجميلة
آية الغرياني مقدمة حفل موكب المومياوات
فستانها والأكسسوار على شعرها لفتوا الأنظار لكن أداءها المبهر خلى الجميع يسأل مين المذيعة الشاطرة دي، أدائها المظبوط ولغتها اللي مفيهاش غلطة، كانوا كلمة السر ورا حالة الانبهار اللي حصلت بالمذيعة الشابعة آية الغرياني واللي لبست فستان دهبي بطابع فرعوني وأكسسوارات عليها رمز الملكة إيزيس أسطورة الحب والوفاء عند قدماء المصريين، وأثبتت إنها شاطرة جدًا في اللغتين العربية والفرنسية.
نسمة محجوب
نسمة محجوب في حفل موكب الممياوات
قدمت نسمة في الحفلة أغنية للتاريخ حرفيًا، صوت رائع وكلمات مؤثرة جدا بعنوان “حكاية شعب”، ظهرت بفستان أزرق غامق، مع لمسة فرعونية وشعر كيرلي، وثقة جارفة بالنفس، قالت في مداخلة ليها مع برنامج حديث القاهرة إنها كانت مبهورة ومخضوضة جدًا، لكن حاولت تخرج أحسن ما عندها.
أميرة سليم
أميرة سليم سوبرانو حفل موكب الممياوات
ناس كتير سألت يا ترى مين المطربة الجميلة اللي بدأت الحفلة بصوتها، اختفت الحيرة لما ظهر اسمها في الخلفية بعنوان، السوبرانو المصرية أميرة سليم. أميرة بدأت الحفلة بصوتها الأوبرالي العبقري، وسابت حالة من الانبهار بأغنية باللغة القبطية كلماتها ما كانتش مفهومة لكن وقع كلماتها والموسيقى كان سبب في قشعرة جسم كل اللي سمع الأغنية، وبعدين لما الترجمة نزلت اتضح إنها ترنيمة باللغة القبطية لإيزيس.
والد أميرة هو الفنان التشكيلي الراحل أحمد فؤاد سليم، ووالدتها عازفة البيانو المصرية العالمية مارسيل متى، جمهور أميرة اللي بتقدم حفلات غنائية منفردة كتير على مسرح الأوبرا أكيد بقى أكبر بعد آدائها العظيم خاصة إنها مطربة عالمية أدت الأدوار الرئيسية في مختلف الأوبرات العالمية منها حلاق إشبيلية، وشبح الأوبرا، وأنس الوجود، وأجراس الليل.
ريهام عبد الحكيم
ريهام عبد الحكيم مطربة موكب المومياوات الفرعونية
ارتبطت ريهام عبد الحكيم في الأذهان بالأغاني الوطنية، صوتها القوي وإحساسها العالي جدًا خلالها جزء من الصورة الذهنية عن الفن المصري، صورة كملت بآداها الجميل في الحفلة، ريهام ظهرت بفستان ذهبي رقيق جدا، وغنت باللغة العربية الصحى أغنية بعنوان “مصر لم تنم”.
رضوى البحيري وآلة التمباني
رضوى البحيري عازفة التمباني
صحيح الأوركسترا كان فيه عازفين مميزين جدا، لكن رضوى البحيري بالذات لفتت انتباه العالم كله من مكانها ورا آلة التمباني، قد إيه كانت متمكنة ومسيطرة على الآداء والإيقاع، واثقة من نفسها. في لقاء ليها مع سكاي نيوز، أكدت إنها بتتدرب من 4 شهور عشان العرض يطلع بالشكل الرائع ده، أول واحدة كلمت رضوى بعد الحفلة هي مامتها واللي قالتلها “انتي كنتي البطل الاول في الحفل وصاحبة الحضور الأقوى بين زملائك”.
سلمى سرور
سلمى سرور سولويست حفل موكب المومياوات
سوليست كمان عبقرية، عزفها المنفرد على آلة الكمان خلال الحفل خطف القلوب، وكتم الأنفاس، سلمى غمضت عنيها وانطلقت تعزف بروحها، كل أعضاء الفرقة كانوا بيبصولها بانبهار شديد جدًا، وهي بتعزف على أوتار قلوب الموجودين، في نهاية العزف عينيها دمعت من فرط الجمال، وعيون كل اللي سمع عزفها العبقري.
يسرا
يسرا في حفل موكب المومياوات
“عظماء، معجزة القدماء المصريين إنهم عظماء، بكل التطور اللي حققناه كبشر في العلوم والفنون ولسة الحضارة المصرية القديمة قادرة على إبهارنا بكل غمضوها وأسرارها اللي كل بنكتشف كل يوم سر جديد عنها بيسمع في العالم كله ولما نقول في أي مكان في العالم إننا مصريين نلمح اللمعة في العيون والناس تسألنا مصر.. أرض السحر والجمال؟”بفستان أبيض وتاج فرعوني جميل ظهرت يسرا وقالت كلمتها المؤثرة جدا خلال الحفل اللي قدمت من خلاله نموذج في الجمال والوطنية.
منى زكي
منى ذكي في حفل موكب المومياوات
“إيمانهم صنع حضارتهم وبنى دولتهم أقدم دولة متكاملة الأركان عرفها التاريخ، إيمانهم وعقيدتهم زادوا من قوتهم وكان جيشهم أقوى جيوش الأرض بيحمي الناس والعرض” منى زكي كانت مؤثرة جدا بكلمتها عن تاريخ الجيش المصري، وكانت خير تمثيل للوجوه المصرية، بأداء مؤثر وملابس جميلة، فستان زهري وأكسسوار عبقري ووتسريحة شعر كأنها ملكة جاية من التاريخ.
نيللي كريم
“من آلاف السنين كل الناس بتيجي هنا عشان تزور المكان العظيم ده، بناءه معجزة، معبد الدير البحري بنته الملكة حتشبسوت من حوالي 3500 سنة في حضن الجبل، في عهدها ازدهرت الأحوال، وهي أصل المصري الست بـ 100 راجل”. نيللي كريم كانت لابسة واحد من أجمل فساتين الحفلة وواضح إنها هي شخصيًا كانت منبهرة جدًا بيه لدرجة إنها نشرت كلمتها على صفحتها الشخصية بشكل منفصل وبدأت ستتعرض فستانها الجميل وتعبر عن سعادتها الشديدة إنها شاركت في حدث بالجمال ده.
نيللي كريم في حفل موكب المومياوات
هند صبري
هند صبري في حفل موكب الممياوات
“المصريين القدماء آمنوا بالروح، وآمنوا بنقائها وخلودها وفهموا إن الجسد أمانة وحاولوا يحافظوا عليه لما الروح تغادر وتقابل خالقها، آمنّا بالبعث والحساب والخلود آملين في حياة بعد الموت خالية من الصراعات والشرور جنة دائمة يعيش فيها كل من عمل خير في الدنيا” رغم كل الهجوم اللي حصل بسبب مشاركتها في الحدث لإنها تونسية مش مصرية، هند صبري تألقت خلال الحفل بفستان أخضر في دهبي وهي بتتكلم عن عقيدة وإيمان المصريين القدماء وكانت واحدة من الوجوه النسائية المشرفة في الحفلة.
التعليق باستخدام حساب فيس بوك