محتويات المقال
أمهات كتير بتلاحظ إن أطفالها متأخرة في الكلام وتبدأ تسأل وتدوّر وتتجه لتخاطب لمساعدة الطفل، لكن أوقات بيكون في سبب طبي مش كتير يعرفوه بمجرد ما بيتعالج بتزيد حصيلة الطفل اللغوية ويبدأ يتكلم بسهولة، والسبب في تأخر الكلام ده هو تجمع المياه خلف الأذن!
-
طيب إيه من الأساس اللي ممكن يسبب تجمع المياه خلف ودن الطفل؟
من أسباب تجمع السوائل خلف طبلة الأذن هو وجود مشاكل في قناة تصريف السوائل في الودان اللي اسمها قناة استاكيوس، ومن الأسباب اللي بتسبب مشاكل في قناة استاكيوز لما بيكون في حساسية في الجهاز التنفسي أو التهاب اللوز لما بيتكرر أو اللحمية.
-
ليه المشكلة دي بتسبب تأخر الكلام للأطفال؟
مشكلة تراكم المياه خلف الأذن دي منتشرة أكتر بين الأطفال اللي سنهم أقل من 3 سنين، وده العمر اللي بيبدأ فيه يتكون الحصيلة اللغوية للطفل ويتعلم يعبر عن نفسه بالكلام. عشان كده، تجمع السوايل ورا الودان بيسبب صعوبة في السمع عند الطفل وبالتالي بتأثر بشكل كبير علي تطور اللغة وحصيلة الكلمات والتواصل الاجتماعي للطفل.
وده بيتم علاجه عن طريق الطبيب المختص باستخدام المضاد الحيوي أحيانًا وأوقات تانية الحالة بتحتاج لتركيب أنابيب للأذن على حسب ما الطبيب المختص يحدد.
-
ازاي نساعد الطفل المتأخر في الكلام بعد ما نعرف السبب ويبدأ العلاج؟
- نتكلم مع الطفل طول الوقت ونكلمه بكلمات قصيرة وواضحة ونكرر الكلمات المهمة ويكون كلامنا بطريقة هادية.
- قولي أسامي الحاجات اللي شايفينها أو الطفل بيطلبها.
- نزليه حضانة يختلط بأطفال في سنه أو خرّجيه كتير وسط أطفال بيتكلموا عشان يحاول يتجاوب معاهم.
- العبي معاه ألعاب تفاعليه تشجعه يتكلم.
- اقري للطفل كتير قصص مناسبة لسنه وغني له وشجعيه يقلدك.
- اساليه أسئلة حوارية وانتي بتتكلمي وادي له فرصة يجاوب.
- شجعيه يلعب بألعاب اللي بتقول كلمات أو أغاني عشان يحاول يقلدها.
وطبعًا أهم حاجة بعد ما تعرفي سبب تأخر الطفل في الكلام وتبدأي العلاج، ما تتردديش في استشارة أخصائي تخاطب لو طفلك عدى الـ 3 سنوات ولسه مش بيقول أي كلمات.
التعليق باستخدام حساب فيس بوك