محتويات المقال
تساقط الشعر مشكلة بتحصل لكتير للسيدات، لكن بتحصل للأمهات أكتر، بسبب الحمل والولادة و الرضاعة وتغير الهرمونات، وفقد الجسم عناصر حيوية كتير مهمة للشعر، لكن لحسن الحظ إن التساقط بقى من مشاكل الشعر اللي ليها حلول كتير، وأسهل وأنجح من المداومة على استعمال زيوت الشعر، واستخدام ماسكات الشعر الطبيعية، واللي هي مفيدة برضه، لكن بتاخد وقت طويل جدًا على ما تبدأ تبان نتيجتها، وممكن الأم ماتكونش ظروفها مناسبة للانتظام على استعمالها، علشان كده حلول زي الميزوثيرابي أو البلازما مفيدة جدًا للأم، بس قبل ما تعمليها دايماً بنفكر الميزوثيرابي أم البلازما للشعر .. ايه الأحسن لعلاج التساقط الشديد؟ هنقولك الفرق بينهم.
-
البلازما للشعر
هي علاج ناجح لتساقط الشعر، عن طريق سحب عينة دم من السيدة، وبعدين تتحط في جهاز طرد مركزي يفصل البلازما عن بقية سوائل الدم، وممكن يتضاف للبلازما بعض العناصر المفيدة للشعر، وبعدين تتحقن في فروة الراس.
وغالبًا بتحتاجي تكرريها على مدار 3 جلسات أو أكتر، والنتيجة بتظهر عادةً خلال 6 شهور.
هنا ممكن تشوفي حقن البلازما للشعر لملء الفراغات .. لها نتائج مضمونة ولا لأ
-
الميزوثيرابي للشعر
هي حقن بتتحط فيها مغذيات وأحماض وعناصر مفيدة ومغذية جدًا للشعر، وبتتحقن بيها فروة الراس، وبرضه بتحتاجي تكرريها لأكتر من جلسة، ونتيجتها سريعة وبتظهر على طول في وقف التساقط.
-
إيه الأفضل لوقف تساقط الشعر، الميزوثيرابي أم البلازما؟
الحقيقة إن مفيش إجاية قاطعة للسؤال ده، فكل حالة بحالتها والطبيب المعالج هو اللي هيقرر على حسب وضع شعرك، لإن في فروق جوهرية بينهم، منها:
- الميزوثيرابي مش بيعالج الصلع، أو حالات التساقط المرضية.
- البلازما سعرها أغلى من الميزوثيرابي.
- حقن البلازما يحتاج تخدير، لكن الميزوثيرابي لا.
- في بعض الناس عندهم حساسية، ففي الحالة دي الميزوثيرابي مش مناسب لهم نهائيًا.
هنا أفضل 8 فيتامينات للشعر من الصيدلية
-
نصائح عامة لعلاج تساقط الشعر
- لو انتي حاسة إن التساقط عندك طارئ ومش كبير، ممكن تستخدمي فيتامينات الشعر من الصيدلية.
- اهتمي بالأكل الصحي واحرصي إن يكون فيه العناصر الغذائية المتكاملة.
- سرحي شعرك باستمرار، ودلكي فروة الراس بزيوت طبيعية زي الخروع.
- لو قررتي تعملي بلازما أو ميزوثيرابي، لازم تروحي لطبيب أمين وموثوق عن تجارب ناس كتير، لإن المجال ده بقى تجاري وفيه نصب كتير قوي.
التعليق باستخدام حساب فيس بوك