بقالي فترة كل ما حد يسأل على أي جروب فيه ستات: “أجيب كذا منين يا بنات” الكل يردوا عليها: “من النزهة الجديدة” والكذا ده ممكن يكون صاروخ فضاء، أو بودرة العفريت، أو حاجة مستوردة من تنزانيا، أو حاجة إحنا أصلا منعرفش هي إيه، ولما اتكرر الكلام ده كتير قوي، سألت أمهات راحة بالي: بتجيبوا إيه من النزهة الجديدة؟ (بس ماقولتش يابنات ولا ياماميز)، كان رد الأغلبية: “كل حاجة وأي حاجة”.
وفي ناس قالت لعب الأطفال والأدوات المنزلية والمنظفات وكل ما يخص البيت، وطلعت النزهة الجديدة دي دولة لوحدها وليلة كبيرة قوي سعادتك، وفي المقال ده هقولكم ممكن تجيبوا إيه من منها، وتروحي ازاي للنزهة الجديدة وإيه الأماكن المهمة، ونصايح عامة قبل ما تنزلوا تعملوا شوبنج هناك:
اللهم صلي وسلم وبارك على سيدنا محمد وعلى آله وأصحابه أجمعين.. إحم، معلش اندمجت، بس أنا فعلا مش عارفة ليه الستات بيقولوا كده على قنواتهم في اليوتيوب قبل ما يعملوا طبخة أو يفرجونا عزومات حمواتهم وسلايفهم، والأدوات المنزلية اللي اشتروها من سوق دمياط أو النزهة الجديدة.
أواني المطبخ من النزهة الجديدة
- الحلل: الجرانيت والسيراميك والتيفال والصاج والبايركس وبكل المواد اللي ممكن تتخيلوها.
- الأطباق: البورسلين والصيني والميلامين والبلاستيك والأركوبال والإزاز وأي حاجة تانية أنا ما أعرفهاش.
- الكوبايات وفناجيل كل المشروبات.
- الأطقم: الصيني والأركوبال والعشا والغدا والفطار والمقبلات والمكسرات.
- الأواني الموسمية: كل ما يخص رمضان والعيد والفلانتين والجواز.
أجمد 10 أماكن تصميم ديكورات المطابخ في القاهرة
ديكورات البيت من النزهة الجديدة
- شجر وورد صناعي بكل الألوان والأحجام والأشكال والأذواق.
- تابلوهات.
- أنتيكات.
- كريستالات.
- في محلات متخصصة للنجف والإضاءة.
لعب الأطفال:
- لعب البنات والأولاد.
- اللعب التعليمية ولعب الذكاء.
- كل أنواع اللعب وأحجامها المختلفة بأسعار تنافسية جدًا.
الأجهزة المنزلية:
- ودي مش في كل المحلات، بس في محلات متخصصة فيها وفيها أنواع معينة.
منتجات أيكيا من النزهة الجديدة
- هو الحقيقة أنا مش عارفة إدارة أيكيا عارفة الموضوع ده ولا لا، هي منتجات أصلية من أيكيا بالسيريال نمبر والكود بتاع أيكيا، مش تقليد زي ولا (هاي كوبي) زي ما جه في بالكم.
أدوات تجميل:
- المخمريات والجلوسات وكريمات من كل حدب وصوب، بس الحقيقة الحاجات أسعارها مغرية جدًا، بس أنا مش عارفة المنتجات دي فعلا أصلية؟
مستلزمات المطبخ:
كل حاجة أرخص من المول
دي غير الأواني، ورقة وقلم ومعايا يا ست الكل:
- سجاد المطبخ، وألواح التقطيع والمرايل والفوط والمساكات والمعالق،ستيكرز مطابخ،…،….،….
شنط مدارس وأدوات مكتبية.
مستلزمات صور الانستجرام:
النزهة الجديدة كل حاجة أرخص من المول
- مش أول لما بنفتح الانستجرام بنلاقي ماسورة روز وبيبي بلو وحاجات ستايلها تركي ضربت في وشنا؟ دي مش من تركيا، دي من النزهة الجديدة، كل حاجة شوفتيها على الانستجرام هتلاقيها هناك، تقلي جيبك وتوكلي على الله.
مُنظِمات:
النزهة الجديدة كل حاجة أرخص من المول
- هي مش منظمات، هي ثقب أسود بيكركب تحت اسم التنظيم، الستات دلوقتي بقوا يجيبوا منظمات للتلاجة ينظموا فيها الطماطم والخيار والجزر، ماله درج التلاجة؟ ها؟
هدايا:
- مش بس الهدية، والكيس والصندوق واللفة والكارد، وكل حاجة تخص الهدايا.
النزهة الجديدة كل حاجة أرخص من المول
تروحي ازاي النزهة الجديدة
النزهة الجديدة منطقة قريبة من مطار القاهرة، وهي تابعة لمصر الجديدة، لو هتروحي بعربيتك حددي اللوكيشن وامشي على الـ GPS، ومن أهم العلامات المميزة الكبيرة هناك هي المستشفى السعودي الألماني، والشارع الرئيسي في النزهة الجديدة هو شارع “طه حسين” ومتفرع منه شوارع صغيرة جدًا فيها محلات متنوعة.
نصايح عامة قبل ما تشتري من النزهة الجديدة:
- ما تنزليش بأطفال، هيتعبوا من اللف وهيزعلوا وإنتي هتزعلي والنزهة الجديدة كلها هتزعل.
- حددي ميزانية قبل ما تنزلي، لأنك ممكن تصرفي آلاف في حاجات مش محتاجاها وإنتي مش عارفة.
- لو قرايبك وأصحابك محتاجين نفس الحاجة، جمعي عدد واشتري بسعر جملة من هناك هتوفري كتير.
- كل محل في النزهة الجديدة فيه حاجات مش موجودة غير عنده، حتى لو في بضاعة كتير تشبه بعضها.
- إلبسي حذاء مريح لإنك هتلفي كتير.
- كمامتك يا ست الكل إوعي تنسيها.
- ما تتنشطيش قوي وتنزلي من الساعة 8 الصبح عشان تلحقي اليوم من أوله لإنهم مش بيفتحوا قبل 11.
- ماتجيبيش كراكيب، ما تجيبيش حاجة غير وإنتي متأكدة إنك هتستخدميها.
- لو إنتي عروسة وبتجهزي، أو بتجددي مطبخك وبيتك، فالنزهة الجديدة مكان منسب جدًا للتسوق.
ودلوقتي إنتي قوليلنا اشتريتي إيه من النزهة الجديدة؟
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
1 comment
مفيد شكرا على مجهودك 😂😂اصل انا كنت بسال اروح هناك اذااى لقيت المقاله وفى وشى