محتويات المقال
الهبات الساخنة واحدة من أكتر المشاكل الصحية المزعجة اللي بتواجه السيدات قرب الأربعين، الحقيقة تجربتي مع الهبات الساخنة ارتبطت مع والدتي في مرحلة معينة من عمرها خلتني أعرف قد إيه هي عرض مزعج. كان كل همي وقتها أعرف إمتى هتنتهي الهبات الساخنة خاصةً إن بعض الناس كلمتني عن علاج الهبات الساخنة بالأعشاب وده كان شيء محير جدًا بالنسبة لي.
أعراض الهبات الساخنة للستات في سن اليأس
الهبات السخنة بتكون عبارة عن شعور مفاجئ بالسخونية في الجزء العلوي من الجسم خاصة في الوش والرقبة والصدر، فجأة الجلد بيحمر، ممكن يحصل عرق، أحيانًا بيكون فيه شعور بالبرد بعد وقت. للأسف هو شعور مزعج لدرجة إنه ممكن يسبب إرهاق شديد، وكمان قلق بخصوص السبب اللي بيقف ورا الشعور ده. هل هو مرض مخيف يستدعي استشارة الطبيب؟ ولا عرض مؤقت وهيروح؟ وعمومًا الأعراض اللي هتكون مصاحبة للهبات الساخنة متشابهة، لكن بتختلف في شدتها وقوتها بين الخفة وبين الشدة اللي ممكن تفسد النشاط بالنهار والنوم بالليل.
- بيكون شعور مفاجئ بالسخونية في الصدر والرقبة والوش.
- احمرار وبقع حمراء في أماكن في الجسم.
- سرعة ضربات القلب.
- عرق خاصة في الجزء العلوي من الجسم.
- رعشة في أواخر الهبة.
- شعور بالقلق.
أسباب الهبات الساخنة في الأربعينات
أكتر سبب شائع بيقف ورا الهبات السخنة هو تغير الهرمونات قبل انقطاع الدورة الشهرية، وأثناء انقطاعها وبعد انقطاعها. السبب العلمي اللي بيقف ورا الهبات السخنة هو الانخفاض الشديد في مستويات هرمون الأستروجين واللي بيتسبب في لخبطة في المنطقة المسؤولة عن تنظيم الحرارة في الجسم. لكن المفاجأة إن مش كل السيدات اللي هتنقطع عندهم الدورة الشهرية هيعدوا بالإحساس ده. وغالبًا بيكون فيه أسباب بتخلي الشعور ده عند بعض السيدات بالذات زي:
- التدخين
- البدانة
- إنك تكوني ست أفريقية. السيدات اللي بشرتهم سمرا بيحسوا بالهبات السخنة.
عمومًا الدورة الشهرية مش هي السبب الوحيد للهبات السخنة، غالبًا بيكون فيه أسباب تانية محتملة للهبات السخنة خاصةً لو كانت الدورة الشهرية منتظمة ومش محتمل تنقطع قريب، من الأسباب دي:
- أعراض جانبية لبعض الأدوية.
- مشاكل الغدة الدرقية.
- بعض السرطانات.
- كأثر جانبي لعلاج السرطان.
علاج الهبات الساخنة
لإن السبب ورا الهبات السخنة في الغالب هو نقص الأستروجين، بيكون العلاج عادة هو بأدوية تحتوي على الأستروجين. كمان بيكون من خلال أدوية مضادة للاكتئاب وبعض الأدوية المضادة للنوبات المرضية، وطبعًا بينصح بالابتعاد عن التدخين، وتناول الطعام الصحي خلال فترة انقطاع الدورة الشهرية، والأهم المحافظة على حالة نفسية كويسة، وعمومًا فيه بعض الإجراءات اللي ممكن تتبعيها عشان تساعدك تتصرفي لو بتعاني من الهبات السخنة:
- اقعدي في مكان بارد.
- ارتاحي شوية.
- اتنفسي بعمق.
- اشربي مياه كتير.
- خليكي متأكدة إن كل ده مؤقت وهيروح.
المصادر:
مايو كلينك
ويب طب
التعليق باستخدام حساب فيس بوك