الوسواس القهري من الإضطرابات اللي بتبقي متعبة للشخص وللي حواليه وبيتعاملوا معاه كمان، وكتير مننا بيتخيل إنها بتيجي للكبار بس لكن حسب الدراسات والإحصائيات فهي ممكن تظهر بنسبة 4% علي الأطفال من سن صغير.
طيب ياتري أي طفل بيحب الترتيب بزيادة أو موسوس نضافة زي ما بنسميه ممكن يكن عنده وسواس قهري؟
أعراض الحجم ض الوسواس القهري للطفل:
- الهوس بالترتيب وتنظيم اللعب وفرزها علي حسب اللون والحجم، بس لازم ناخد بالنا إن ال sorting اصلا من اللعب المهمة لكل طفل لكن لو بدأت تزيد عن حدها وتأثر علي نشاطه ولعبه العادي في اليوم وبقي هاجس يققه ويدخل في نوبة غضب لو اللعب إتحركت من مكانها يبقي نستشير طبيب نفسي.
- تكرار غسيل الإيدين بصورة ملفتة للنظر.
- يبقي شاغل باله وبيطمن علي حاجات ماتخصوش كطفل زي قفل الباب مثلا ويفضل يتأكد كل شوية.
- بيمشي علي القواعد بالحرف وبالمللي يكررها يوميا ويغضب لو إضطر يغير حاجة فيها.
- بيفكر في أفكار عنيفة كتير.
- قلق زايد وإحساس إن في حاجة وجشة هتحصل دايما.
إيه سبب الإصابة بالوسواس القهري؟
الأبحاث لسة محددتش إيه السبب الأول والأكيد لكن باحثين كتير بيقولوا إنها سببها بيبدأ في المخ بسبب نقص في كمية هرمون السيروتونين وفي أحيان كتير بيكون وراثي.
علاج الوسواس القهري؟
العلاج بيتم التشخيص عن طريق الطبيب النفسي وبيعتمد علي عمر الطفل وصحته وبيعتمد العلاج علي مزيج من:
- العلاج السلوكي المعرفي اللي بيساعد الطفل إنه يفهم سبب المخاوف اللي عنده ويقدر يركز فيها وبيتعلم طرق مختلفة للتعامل مع المخاوف ده وحلها وتقليلها، وده طبعا كمان بيكون دور الأهل فيه كبير في الإلتزام بيه وتنفيذه.
- تدخل دوائي وده اللي بيساعد علي رفع هرمون السيروتونين في الدماغ.
طيب إزاي أمنع إصابة طفلي بالوسواس القهري؟
مفيش طريقة معينة تقدر تضمن حماية الطفل من الوسواس القهري لكن العلاج المبكر وإكتشاف الأعراض من بدري والإنتباه ليها والتعامل معاها عن طريق الطبيب ده بيساعد جدا في تحسن الطفل ونموه بشكل طبيعي.
إزاي أقدر أدعم طفلي اللي عنده وسواس قهري؟
- مهم إنك تحافظي وتلتزمي بكل مواعيد المتابعة مع الطبيب المختص بحالته مش مجرد ما تلاحظي تحسن بسيط توقفي.
- خللي دايما في حوار مفتوح بينك وبين طفلك وشجعيه يتكلم ويعبر عن مخاوفه وشكوكه وقلقه الكتير اللي بيحسه من غير ما تصدري أحكام عليه.
- بلغي المدرسة بعد ما الطفل يتم تشخيصه وإشركيهم معاكي في خطة العلاج.
- حاوطي نفسك وطفلك ب support group بيمروا بنفس الظروف.
المصادر:
التعليق باستخدام حساب فيس بوك