أول لما الولد بيعدي مرحلة الطفولة، ويدخل في مرحلة المراهقة، من أول الحاجات اللي بيعملها إنه بيمسك ماكينة الحلاقة بتاعت باباه ويحاول يحلق دقنة أو شنبه، حتى لو لسا ظاهر منه شعر خفيف وصغير، بس غير إن شكل الشعر ده بيكون مضايقه، وممكن زمايله يتنمروا عليه بسببه، هو بيكون عاوز يحس إنه كبر وبقى راجل، وبيتصرف زي الرجالة علشان كده بيحلق شنبه، طيب إمتى تعرفي إن ده السن المناسب لـ حلاقة الشنب عند الأولاد ؟
-
الوقت المناسب لحلاقة الشنب عند الأولاد
مفيييش.. آه زي ما قرأتي كده، مفيش عمر محدد نقدر نسميه هو ده العمر المناسب لـ حلاقة الشنب عند الأولاد لإن الشنب ده مرتبط بفترة البلوغ، ودي بتختلف من ولد للتاني، ده غير إن طبيعة كل جسم مختلفة، فممكن يكون ولد مشعر، وولد تاني شعر جسمه قليل، ده غير شكل الشعر اللي طالع، ونفسية وتصرف كل ولد تجاه مظهره، فممكن ولد يكون الشكل ده مضايقه جدًا ومقلل ثقته في نفسه، وفي ولد بيكون مش فارق معاه ولا جاي في باله يحلقه، علشان كده محدش يقدر يقولك إن في سن معين لحلاقة الشنب من 9-12 سنة واللي هو بداية علامات البلوغ، واللي من ضمنها نمو شعر الجسم والوجه، علشان كده اتصرفي بناءًا لحالة ابنك كلها، بدون ما تقيسي على حد تاني.
-
نصائح لأمان طفلك وهو بيحلق شنبه
في حالة إنك حددتي الوقت المناسب لطفلك لحلاقة شنبه، ففي بعد النصايح اللي هنقولك عليها، علشان عملية الحلاقة مايكونش فيها أضرار، ويستحسن إن الأب هو اللي يوجه ابنه في الحاجات دي، علشان الابن يحس إنه بيتكلم راجل لراجل، وما يحرجش منك:
- ماكينة الحلاقة الكهربائية: ممتازة وآمنة، لكن مش بتدي نفس نتايج الماكينة التقليدية.
- ماكينة الحلاقة التقليدية: علشان هي بتستخدم الشفرات، فلازم تتوقعي إن هيحصل جروح، ودي حاجة متقلقش بس محتاجة حذر وتطهير، كمان لازم ابنك يستعمل معاها كريم أو جل حلاقة، علشان الترطيب وسهولة الحلاقة، وأهم نصيحة إن لازم يكون له ماكينة خاصة بيه، وما يستعملش بتاعت حد ولا حد يستعمل بتاعته.
-
الخطوات الصحيحة للحلاقة شنب ابنك
- شطف الوجه بالمياه الدافية قبل الحلاقة، علشان يفتح المسام والشعر يتحلق بسهولة أكبر.
- توزيع الجل أو الكريم على الوجه والرقبة.
- الحلاقة بالشفر في اتجاه نمو الشعر.
- لو في أماكن زي الشنب صعبة شوية في الحلاقة، فلازم جلد المنطقة دي يتشد قبل ما يتحلق بالماكينة.
- شطف الوجه والرقبة بعد الانتهاء من الحلاقة.
- التطهير والترطيب بعد الانتهاء من عملية الحلاقة.
- تتكرر العملية دي كل 3 أيام، أو على حسب الحاجة.
ونعيمًا.
ودي مجموعة مقالات هتفيدك لو أولادك في سن المراهقة:
- البلوغ عند الأطفال .. اتكلمي معاهم عنه من غير كسوف
- في بيتنا مراهق .. الحب في زمن المراهقة
- بنتي المراهقة عايزة تسافر أول مرة مع أصحابها
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك