أهم خطوات للتعامل مع الولادة المفاجئة والاسعافات الأولية لها

السيدة الحامل ممكن في شهرها الأخير يجيلها شعور يومي إنها هتولد النهاردة وإن الآلام دي هي أعراض الولادة الطبيعية، فإزاي تعرف إن دي علامات الولادة الحقيقية وإنها لازم تروح المستشفى دلوقتي؟ وإيه الإجراءات اللي ممكن الزوج يساعد بيها زوجته وهما في الطريق؟ في المقال ده هنساعدك إنك تعرفي أكتر.

السيدة الحامل ممكن تحس بأعراض مش حقيقية وتروح المستشفى والدكاترة يقولولها إن معاد الولادة لسه مجاش، وممكن الزوج نفسه يكون من النوع اللي بتقلق فياخدها للمستشفى في كل مرة تحس فيها بالألم خاصة لو دي المرة الأولى، عشان كده الزوجين لازم يكونوا عندهم معلومات كويسة عن الطلق.

إيه هو طلق الولادة؟

الطلق هو عبارة عن آلام شديدة أو تحجيرات في منطقة البطن ممكن يتحس بيها عن طريق وضع الإيد على البطن، ويستمر الشعور ده مدة ستين ثانية، بعدين بيتكرر نفس الشعور بصورة متتالية ومنتظمة، لغاية ما يكون بمعدل ثلاث طلقات كل عشر دقائق، ده معناه إن السيدة الحامل بتمر بالمخاض فعلا.

الفرق بين طلق الولادة الحقيقي والطلق الكاذب

نعمل إيه لو جه طلق مفاجئ؟

• وهنا الزوج لازم يخليها ترتاح أكتر وتتنفس بالراحة في الوقت اللي مابين كل طلقة والتانية، ولازم تكون لابسة لبس خفيف وما تعملش عملية الدفع في المرحلة دي عشان ما تتعبش، وجوزها يروح بيها المستشفى.
• في الطريق للمستشفى لازم ياخدوا معاهم منشفة وحاجة لشفط سوائل الأنف من الصيدلية اللي بتستخدم في حالة البرد والرشح، والأدوات دي احتياطي عشان لو حصلت ولادة في الطريق لو المستشفى بعيد شوية.
• أثناء الولادة، إحنا بننصح إن الزوج يكون مع زوجته قاعد جنبها عشان يهديها، والدكتور يبدأ يقولها على تعليمات التنفس وتتنفس إزاي ولما البيبي يبدأ يخرج ما ينفعش أبدًا إنها تقف، عشان كده الأطباء بيوصوا الزوج في حالة الولادة في الطريق للمستشفى إنه ما يوقفش العملية وما يخليش الأم تقفل رجلها ولا يدفع البيبي للرحم تاني، لأ لازم يسيبه ويستقبله بالمنشفة الجافة ويبدأ ينضفه من السوايل اللي حوالين جسمه، ويبدأ بشفط السوائل من أنف البيبي باستخدام أداة الشفط، وفي الوقت ده السيدة أحيانا ممكن تحس في آخر مرحلة من مراحل الولادة إنها عايزة تدخل التواليت، ما ينفعش الزوج يسيبها تعمل كده لأن ده معناه إن الطفل أوشك على الخروج وإن راسه بتضغط على فتحة الشرج.
• في حالات طارئة لازم الزوج يتصل فيها بالدكتور قبل وصوله هو وزوجته للمستشفى زي إن الست تبدأ تنزف بكمية أكتر من 4 أكواب من الدم فساعتها لازم طاقم المستشفى يستعد بغرفة العمليات والأكسجين والدم للأم .

وبنتمنالك ولادة سهلة ويسيرة

المصدر:

https://www.youtube.com/watch?v=jrR0ewRIf7k