أفضل ولادة هي اللي بتكون في المستشفى، وده لصحة الأم والجنين، لإن هناك فريق طبي كامل مدرب على مساعدتك، ده غير إن لو لاقدر الله حصلت أي مضاعفات هيقدروا يتصرفوا هناك، علشان كده مهم جدًا تكوني متابعة أعراض الولادة الطبيعية أول بأول مع طبيبك، وحاسبة للطلق كويس قوي، لكن في بعض حالات بتحصل فيها الولادة المفاجئة وبتكون الولادة في المنزل للحامل حاجه طارئة خارجه عن ارادتها ، في الحالة دي هنقولك على 5 نصايح هتفيدك لو حصل معاكي كده.
أهم نصائح الولادة المفاجئة في المنزل
-
عند الولادة المفاجئة .. كلمي المستشفى
حتى لو حصلت الولادة في البيت، فلازم تخلي جوزك أو حد مرافق ليكي يبلغ دكتورك والمستشفى اللي انتي كنتي مخططة تولدي فيها في الأصل، واسمعي منهم أي نصايح هيدوها ليكي، ولو في مساعدة طبية يقدروا يبعتوها ليكي علشان تتم الولادة في سلام.
هنا ممكن تشوفي أشياء لم يخبرك أحد عنها عن الولادة القيصرية
-
اطلبي مساعدة الدولا عند الولادة في المنزل
والدولا هي البديلة لوظيفة “الداية” زمان، ودي محتاجة تكوني مرتبة معاها من قبل الولادة بفترة، ولو حصل فعلا ولادة في البيت، فاستدعيها على وجه السرعة، لإن وجودها هيكون مفيد جدًا ليكي وللمرافق اللي معاكي.
-
اعرفي ضرورة النقل للمستشفى
حتى لو بدأت الولادة في البيت، لازم تعرفي إن في حالات ماينفعش أبدًا الولادة تكمل في البيت، علشان صحة الأم والجنين، ولازم تتنقلي للمستشفى فورًا بأي طريقة، ومن الحالات دي:
- لو الأم ملقتش أي تقدم في الولادة الطبيعية.
- ظهور علامات تشير إلى عدم استقرار وضع الطفل.
- وضعية رأس الطفل مش في اتجاهها الطبيعي.
- غدم تحمل الألم
- ارتفاع مستوى ضغط دم الأم.
- التعرض للنزيف.
-
الكشف على المولود
مش معنى إنك ولدتي في البيت، إنك ما تكمليش الفحوصات اللي بتعملها المستشفى في العادي، وأهمها الكشف على المولود والتأكد من حالته الصحية، وإنه مش محتاج حضّانة، ولا بيعاني من أي عيوب خلقية، وده طبيب الأطفال هو اللي هيقدر يحدده، مش انتي ولا مامتك ولا جوزك.
-
تابعي حالتك
مهم جدًا بعد الولادة تتأكدي إنك معندكش نزيف -لا قدر الله- وتتابعي مقياس ضغط الدم، ولو حسيتي بأي أعراض غريبة أو مش عارفة تسيطري عليها، يبقى لازم تتنقلي للمستشفى فورًا قبل ما يحصل أي مضاعفات لا قدر الله، وطبعًا ماتنسيش تاخدي المسكنات اللي بتتاخد بعد الولادة.
وبنفكرك إن في حالات الولادة في البيت لها خطيرة جدًا، زي الحمل في توأم، أو الولادة في أول طفل “البكرية” أو الولادة اللي وضع الطفل فيها مش سليم، وفي الحالات دي لازم تولدي في المستشفى مهما حصل، عشان كده لازم تكوني واخده حذرك جدًا، حتى لو رحتي المستشفى بدري شوية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصدر:
التعليق باستخدام حساب فيس بوك