محتويات المقال
طلبات الولاد ما بتخلصش. وكل ما بيكبروا، طلباتهم بتزيد. وفجاة بنحس إنهم مش حاسّين بقيمة اللي عندهم ولا حاسّين بقيمة الفلوس. علماء التربية قالوا إن من أحسن الطرق اللي الطفل يتعلم بيها المسؤولية وقيمة الفلوس هي المصروف. ده غير كمان إنه لما ياخد مصروف، ده هيساعده يتعلم ازاي يسيطر على رغباته ويقدر يخطط ويحوّش ويتعب عشان الحاجة اللي عايز يشتريها. عشان كده، مصروف الطفل وسيلة مهمة لتنمية شخصيته، مش بس تلبية رغباته. في مقال النهارده، هاقول لك امتى الطفل يبدأ ياخد مصروف وإيه شروط المصروف.
امتى ابني يبدأ ياخد مصروف؟
الطفل يبدأ ياخد مصروف أول ما نلاقيه فاهم إن الفلوس هي اللي نقدر نشتري بيها احتياجاتنا، ويقدر يحسب عمليات حسابية بسيطة أو على الأقل يفهمها. فممكن من سن 4 – 5 سنين، نقدر نجرب نديهم مصروف، ونمرّنهم على التعامل بالفلوس ونشوف مدى استجابتهم وفهمهم لفكرة المصروف.
لكن مفيش قاعدة ثابتة للسن اللي الطفل مفروض ياخد فيه مصروف كل ما كان بدري كل ما كان أحسن للطفل عشان يقدر يتعود بالتدريج يفرّق بين رغباته واحتياجاته، ويحس بالاستقلال والمسؤولية والتخطيط للمستقبل.
هل مفروض إني أحدد إيه اللي ممكن يصرف مصروفه فيه؟
المطلوب مننا هو التوجيه، بس من غير سيطرة لإن مصروف الطفل ده شيء يخصه. كريستين ليزرمان، مؤلفة كتاب Millionaire Babies or Bankrupt Brats: Love and Logic Solutions to Teaching Kids About Money بتنصح إن بدل ما نقدم للأطفال قايمة بكل الممنوعات، ونقرر احنا إيه اللي يقدروا يشتروه بمصروفهم، إننا نحط قاعدة ثابتة أول ما ابني يبدأ ياخد مصروف: ممكن تستخدم مصروفك في أي حاجة تقررها إلا الحاجات المضرة. وتحت البند ده، أقدر أفكرّه بالقاعدة اللي اتفقنا عليها لما ألاقيه بيشتري طول الوقت أكل غير صحي مثلًا.
إيه شروط المصروف؟
- بعد ما نحط الخطوط العريضة لطريقة الصرف، سيبيه يتصرف ويغلط ويخلص مصروفه أو ينجح يعمل توفير في المصروف ويتحمل النتيجة في كل الأحوال. يعني لو خلص مصروفه ولسه محتاج حاجة تانية، ما تقدميش مساعدات مادية له، وفي نفس الوقت ما تلوميهوش أو تأنبيه. سيبي التجربة تعلّمه عشان يتدرب على حرية الاختيار وتحمل المسؤولية.
- مهم جدًا إننا ما نستخدمش المصروف كوسيلة لعقاب الطفل على غلطات ما لهاش علاقة بالمصروف زي ما كان منتشر زمان لأن ده ممكن يخلّي الطفل يلجأ للكذب أو للسرقة.
- في السن الصغير، يفضل المصروف يكون باليوم وعلى مرحلة إعدادي، يبدأ يكون بالأسبوع وبعدين بالشهر، عشان يطوّروا مهارة التخطيط والتحويش. وتحددي المصروف اللي طفلك هياخده على أساس مستوى معيشتكم والمجتمع اللي ابنك موجود فيه والحاجات اللي بيحتاج يجيبها بمصروفه.
- اتفقي معاه من الأول يخصص جزء للصرف وجزء للتحويش وجزء يساعد بيه حد محتاج. وخليكي قدوة له في الصرف وحوّشي قدامه، وفهميه فكرة إننا بنشتري بس اللي محتاجينه مش كل اللي نفسنا فيه.
- حددي أيام محددة لفتح الحصالة. مثلًا مرة في آخر كل شهر عشان يزيد حماسه والتزامه بالتوفير في المصروف. وممكن تفاجئيه بمكافئة مالية بسيطة عشان يتشجع ويكمل تحويش.
- شجعي ابنك يشتري هدايا لاخواته أو أصحابه في مناسباتهم من الفلوس اللي محوشها. ولو اتسبب في كسر حاجة في البيت، يصلّحها من فلوس مصروفه، عشان يحس بقيمة إنه له ذمة مالية صغيرة منفصلة.
إزاي أعلم طفلي الامتنان والرضا؟
مصادر ساعدتنا في كتابة المقال:
baby center
كتاب Millionaire Babies or Bankrupt Brats: Love and Logic Solutions to Teaching Kids About Money.
1 comment
كلام مفيد و رائع