شتاء 2020 بيتقال عنه إنه شتاء الألوان – بمعنى إن كل الألوان موضة فيه، لكن طبعًا مش كل درجات الألوان هتكون موضة مع بعض. في المقال ده جمعنا لك درجات الألوان الموضة في شتاء 2020، بالصور.
“كريم دو بيش” الكريمي الخوخي Crème de Pêche
أفتح درجة من درجات الخوخي كانت صيحة عرض أزياء بيربيري Burberry بلوك شيك جدًا للون الفاتح اللي بيدي نعومة وأنوثة وفي نفس الوقت حيادية وشياكة.
“الميرلو” النبيتي Merlot
اللون النبيتي الدافي بغناه موضة شتاء 2020. افتتحت ستيلا ماكارتني عرض أزياء خريف 2019 بفستان باللون النبيتي وكمان أضافت تصميمات بنفس اللون في عرض الأزياء.
“البايكنج ريد” النبيتي البني Biking Red
إضافة البني للنبيتي في لون biking red بيدي كلاس وعمق للون وبيخليه فورمال أكتر، تقدري تلبسيه في شكل جاكيت أو بدلة. اللون ده لو بصيتي في أي كولكشن شتاء 2020، لازم تلاقيه موجود وفارض نفسه بقوة.
“تايجر أورانج” برتقالي النمر Tiger Orange
عروض أزياء كارولينا هيريرا وكريستيان كووان وفاليتينو التلاتة أذهلوا الناس بالدرجة دي من البرتقالي، الجريئة والدافية في نفس الوقت.
“دارك شيدر” الشيدر الغامق Dark Cheddar
من الألوان الممتدة من موضة خريف 2019 لشتاء 2020 لون الشيدر الغامق اللي هو درجة بين الأصفر والبرتقالي وده بيدي طابع شيك ومطرقع في نفس الوقت.
“شوجر آموند” قشر اللوز Sugar Almond
زي الدارك شيدر، الشوجر آموند كمل معانا من خريف 2019 وهو لون قشرة اللوزة أو زي ما بيسموه اللوز بالسكر. اللون ده بيكون جميل وهو سادة وكمان ممكن تلبسيه لو عليه نقشة نمر أو فهد ويليق جدًا على اللون الرمادي التلجي.
“روكي رود” الطريق الصخري Rocky Road
حبيبي لون الشوكولاتة .. لون الشوكولاتة موضة وخصوصًا إنه محايد جدًا وفي نفس الوقت غني ولطيف. يعني بيدي للفورمال لمحة متميزة من الدفء والشياكة.
“إيدين” أخضر عدن Eden
اللون اللي احتل عروض أزياء جوتشي وديور لشتاء 2020. ممكن تلبسيه في كل الأشكال الفورمال والكاجوال، السادة والمنقوش بالأسود.
“بلوستون” الحجر الأزرق Bluestone
لون البلوستون هو لون أزرق شتوي جدًا، البلوستون بيدينا لون السما الأزرق بلمعة فضي زي سما الشتا. ممكن استخدامه مع ألوان الفضي والرمادي والليلا والأسود. وبما إن الشتاء ده فيه درجتين أزرق موضة، فبلوستون هو الدرجة الأفتح الأهدى.
“جالاكسي بلو” أزرق المجرات Galaxy Blue
الدرجة الزرقا التانية اللي في موضة شتاء 2020، ودي الدرجة الأغمق. الدرجة دي درجة ملكية وتقدري تلبسيها في شكل فستان سهرة رائع أو جاكيت جلد.
مصادر ساعدتنا في كتابة المقال
Glowsly
Pinterest
