محتويات المقال
من حوالي 4 شهور ابتديت أأسس بيتي الجديد وقررت إني أعمل التصميم الداخلي للبيت بنفسي من غير مساعدة حد والأهم إني قررت أعمله على الطراز البوهيمي!!
ودي صور البيت أول ما استلمته
“البوهيمية” كلمة فرنسية معناها الغجرية.. أو ستايل قبائل الغجر إللي بيتنقلوا من مكان لمكان.. وفي عالم التصميم الداخلي والديكور، الطراز البوهيمي أصبح بيشكل أحد أهم أنماط الديكور المهمة.. يعني بقى Trendy جدًا..
عادةً البيوت بتعتمد على أُسس تصميم موحدة والوان متناسقة جدًا وخطوط واضحة في ترتيب الأثاث زي المودرن أو الألترا مودرن أو الكلاسيك أو الستايل العربي.. لكن الستايل البوهيمي نوع مستقل، بيعتمد في الأساس على الحرية التامة في الاختيار وعلى خطوط مختلفة جدا عن بعض في التصميم.. والديكورات بتكون مليانة دفا وحميمية وبساطة وبتحسسك أكنك ساكنة في شاليه في الساحل مش في شقة تقليدية..
في البوهيمية مفيش سفر فخمة ولا عفش فخم ولا نيش ولا صالون ولا ليفينج حرف L.. مش لازم الحاجات دي تكون موجودة أصلا..
البوهيمة هي شطارة إنتك تنثري قطع أساس مالهاش علاقة ببعض جنب بعضها ويطلع في النهاية شكلهم لايق مع بعض.
طيب علشان أعمل ستايل بوهيمي محتاجة أفهم شوية خصائص ليه.. تعالوا نستعرضها مع بعض..
مش لازم العفش يكون غالي
الستايل البوهيمي هو أحسن ستايل لحد عايز يعمل بيت بيزانية قليلة.. ده لإنك مش محتاجة تشتري أوضة سفرة على بعضها أو ليفينج كامل أو أوضة نوم كاملة.. إنتي ممكن تشتري الكراسي من حتة، والترابيزة من حتة، ووحدة للأطباق من حتة، وكرسي من هنا على كنبة من هنا.. وده بيخليكي تقدري تختاري أرخض حاجة.. أرخض كنبة من المحل ده تحطيها جنب أرخص كرسي من المحل ده لحد ما تخلّصي فرش.. وفي النهاية طبعا لو عايزة تشتري عفش بوهيمي غالي وخشب طبيعي هتلاقي ولو عايزة قطع أثاث رخيصة جدًا برضه هتلاقي.
عفش متنوع الستايلات
في أنواع التصميم التقليدي بتحددي الستايل كله على بعضه.. يا إما يكون العفش كله الترا مودرن أو مودرن أو كلاسيك أو عربي الخ الستايل البوهيمي بيعتمد على خلط ستايلات مختلفة ببعض.. يعني ممكن كنبة مودرن جنب كرسي كلاسيك وتحتهم كليم بدوي!
زحمة يا دنيا زحمة
التصميمات الألترا مودرن بتعتمد على ترك أكبر مساحات ممكن من الفراغ وبتميل للتقليلية أو المينيماليزم.. عكس الستايل البوهيمي،، إللي بيميزه إنه ستايل بيدعو للدفء.. في البوهيمية بنحط حاجات كتير بنحبها حوالينا.. البوهيمي مناسب جدًا للناس إللي مش بتحب ترمي حاجة والناس إللي بتحب الزرع والبراويز والأنتيكيات.. لازم تحس إنه العفش البوهيمي بيحضنك وبيدفيك..
اديني في الألوان!
الستايل البوهيمي يحب اللألوان وبيكره النمطية والثبات في اللون.. مفيش قانون.. مفيش بالتة الوان ثابتة لازم تليق على بعض.. ممكن نحط عفش بكذا لون سوا: أبيض مع بني فاتح مع رمادي وممكن ندهن الحيطة بأي لون وممكن نعلق اكسسوارت ملونة كتير..
أنا شخصيا في بيتي استخدمت عفش بألوان متنوعة أبيض مع بني مع رمادي واخترت الحيطان تكون بيضا لكن لونت شوية في الاكسسوارت.. علشان أحقق الحرية البوهيمية وفي نفس الوقت ما أعملش زحمة ألوان كتير..
النقشات البوهيمية Bohemian patterns
على جوجل، لو عملنا بحث عن النقشات البوهيمية patterns واتفرجنا على صور كتير هنلاقي إنه فيه نقشات مشهورة جدًا للستايل ده منها الاشكال الهندسية والنقشات البدائية..
أنا بعد ما شفت صور كتير بقيت الف في المحلات وأطلّع الاكسسوارت إللي فيها الباترن دي واستخدمتها في البيت..
الزرع والخوص والبامبو
الستايل البوهيمي لو اتفرجنا على صوره أونلاين هتلاقوا إنه بيميل جدًا لإنه يكون فيه زرع كتير واكسسوارات بامبو أو خوص ودي مفيش أكتر منها في مصر وعرفت الاقيها بسهولة..
الكليم والسجاد البوهيمي
الستايل البوهيمي ما بيحبش السجاجيد التقليدية المصرية إللي في بيوتنا.. لازم السجاد يغلب عليه الطابع الغجري أو البدوي يعني الأفضل نستخدم كليم أو سجاجيد خوص يدوي .. يعني السجاجيد ليها روح معينة ممكن تلاحظوها في الصور..
وأخيرًا.. الستايل البوهيمي مناسب للناس إللي بتحب الفن وبتحب الحرية.. الناس إللي بتحب الجو الدافي القديم.. الناس إللي بتحب الحاجات الهاند ميد.. الناس إللي بتحب تربي زرع.. إللي ما بيحبوش يرموا حاجة وبيحبوا إعادة التدوير..الناس إللي عايزيين يعملوا بيت حلو بتكاليف قليلة وبالعفش المتاح..
قولولي رأيكم في الستايل البوهيمي ومين بيفكر يعمله؟ شاركونا في التعليقات.. وممكن تسألوني عن أي حاجة جبتها منين وبكام..
13 تعليق
جميل اووي ومريح نفسيا جدا الاوان واستغلال المساحات وقطع الأثاث شكلها دافئ ومغري بالقاعدة
كمان حلو اوي استخدام الكليم دايما شكله بيشدني جدا وفعلا تعبير شاليه في الساحل مش في شقة لمسني اوي دايما برتاح لطريقة فرش الشاليهات وبقول ليه البيت ميبقاش كده
تسلم ايدك يا شيماء وربنا يبارك في بيتك ويملاه سكينة وسعادة
شكرا يا سارة.. ربنا يملا البيت نور وسكينة ?
ماشاءالله تبارك الله جميل جدا ? ربنا يعمر بيكي ويملاه بركة وحب ❤️
شكرا يا هنا..الله يخليكي
ماشاء الله حلو فعلا انك تختاري كل حاجه في بيتك احساس مختلف
ربنا يبارك فيه
ويكون فيه خير ليكي وسعاده باذن الله
ماشاء الله ..تحفة
شكرا يا نشوى
جميل و مريح نفسيا الوانه اطيفة و مش زحمة و رقيق و راقي و اجمل حاجة انه منور بالنور الطبيعي ما شاء الله تتهني و ترتاحي فيه
شيك جدااا بس بحس انه بيميل للفراغ واللي بيحبه برضه بيكون جواه فراغ ده مجرد احساس مش حكم
لا حبيبتي بالعكش هو بيميل للناس الدافية إللي بتحب الونس.. وده لا يمنع إنه جوايا فراغ عادي 🙂
انا بحب الستايل دا جداااا
وذوقك جميل وهادي
سؤال ممكن اعرف جبتي السفره بالكراسي منين؟؟؟
شكرا حبيبتي ز. السفرة والكراسي من
furniture hub
بيت جميل ومقال اجمل ما شاء الله ❤